ມວນຊົນຂັ້ນທ້ອງຖິ່ນ ຍັງມີສິ່ງທ້າທາຍຫລາຍດ້ານ ທີ່ຈະຕ້ອງໄດ້ສູ້ຊົນ

ຕະຫລອດ​ໄລຍະ 10 ປີ​ຜ່ານ, ສື່​ມວນ​ຊົນ​ແຂວງ​ບໍລິ​ຄຳ​ໄຊ ​ໄດ້ຮັບການສ້າງຕັ້ງ, ເຄື່ືອນໄຫວ ແລະ ມີການປັບປຸງພັດທະນາເທື່ອລະກ້າວຢ່າງບໍ່ຢຸດຢັ້ງ ​ເປັນ​ແຕ່ລະ​ໄລຍະ ​ເພື່ອ​ຮັບປະກັນ​ໃຫ້​ແກ່​ການເຜີຍແຜ່ແນວທາງການເມືອງຂອງພັກ, ລະບຽບກົດໝາຍຂອງລັດ, ຂໍ້ມູນຂ່າວສານ-ສາລະໜ້າຮູ້, ການບັນເທີງອື່ນໆ ໄດ້ເປັນຢ່າງດີ ​ແລະ ​ເພື່ອ​ຕອບ​ສະໜອງ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ​ໄລຍະ​ໃໝ່ ແລະ ສື່​ມວນ​ຊົນ ຍັງ​ມີ​ສິ່ງ​ທ້າ​ທາຍ​ຫລາຍ​ດ້ານ ທີ່​ຈະ​ຕ້ອງ​ໄດ້​ສູ້​ຊົນ.

ທ່ານ ອຸດອນ ສອນ​ສຸລິນ ຫົວໜ້າ​ພະ​ແນ​ກຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ​ໄດ້​ໃຫ້​ສຳພາດ​ຕໍ່​ສື່​ມວນ​ຊົນ ໃນ​​ໂອ​ກາດ​ວັນ​ສ້າງ​ຕັ້ງສື່​ມວນ​ຊົນ ​ແລະ ການ​ພິມ​ຈຳໜ່າຍ ຄົບຮອບ 70 ປີ ​ເມື່ອ​ບໍ່​ດົນ​ມານີ້​ວ່າ: ​ໃນ​ຍຸກ​ປັດຈຸບັນ ສື່ມວນຊົນພວກ​ເຮົາ​ຍັງ​ມີ​ສິ່ງ​ທ້າ​ທາຍຫລາຍ​ດ້ານ ໂດຍສະເພາະສື່ມວນຊົນຢູ່ຂັ້ນທ້ອງຖິ່ນ ແຂວງ-ເມືອງ, ກ່ອນອື່ນໝົດແມ່ນດ້ານບຸກຄະລາກອນຍັງບໍ່ພຽງພໍ, ຄວາມຮູ້ຄວາມສາມາດສະເພາະດ້ານຍັງຈໍາກັດ, ພື້ນຖານດ້ານວັດຖຸເຕັກນິກ, ເຄື່ອງມືອຸປະກອນ, ພາຫະນະ ແລະ ງົບປະມານ ນໍາໃຊ້ເຂົ້າວຽກງານສື່ມວນຊົນ ຍັງຕອບສະໜອງບໍ່ທັນໄດ້ຕາມຄວາມຮຽກຮ້ອງຕ້ອງການອັນຈໍາເປັນ, ແຕ່ ສື່ແບບໃໝ່ມີການຂະຫຍາຍຕົວ ກະທົບຕໍ່ລະບົບສື່ມວນຊົນແບບເກົ່າ ທີ່ເຄີຍນໍາໃຊ້ຜ່ານມາ ບໍ່ສາມາດເຄື່ອນໄຫວຕາມແບບກຸ້ມຕົນເອງໄດ້, ການນໍາໃຊ້ສື່ແບບໃໝ່ກໍ່ແມ່ນຄວາມຮູ້ໃໝ່ ຍັງຂາດຄວາມຊໍານິຊໍານານງານ. ອີກດ້ານໜຶ່ງແຂວງບໍລິຄໍາໄຊ ມີຊາຍແດນຕິດກັບປະເທດເພື່ອນບ້ານ ເບື້ອງຕາເວັນຕົກຍາວເກືອບ 200 ກິໂລແມັດ ສາມາດສື່ສານດ້ານພາສາຢ່າງສະບາຍ ມີພື້ນຖານສື່ມວນຊົນທີ່ແຂງແຮງ ໄດ້ຄວບຄຸມເຂົ້າມາພື້ນທີ່ແຂວງບໍລິຄຳໄຊ ສົ່ງຜົນສະທ້ອນທາງກົງ ແລະ ທາງອ້ອມ ໃນແຕ່ລະດ້ານຢ່າງຫລີກ ລ່ຽງບໍ່ໄດ້.

ຕໍ່ໜ້າສະພາບການດັ່ງກ່າວ, ໃນຕໍ່ໜ້ານີ້ແຂວງບໍລິຄໍາໄຊ ຈະສູ້ຊົນປັບປຸງ ແລະ ພັດທະນາວຽກງານສື່ມວນຊົນ ໂດຍການຫັນເປັນທັນສະໄໝເທື່ອລະກ້າວ, ສ້າງຕັ້ງ ແລະ ນໍາໃຊ້ສື່ແບບໃໝ່ທີ່ເປັນທາງການຢູ່ຂັ້ນເມືອງ, ພະແນກການກົມກອງ ເພື່ອໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງພັກຢ່າງກວ້າງຂວາງ ເຂົ້າເຖິງເປົ້າໝາຍໄດ້ທຸກສະຖານທີ່-ທຸກເວລາ, ບໍາລຸງຍົກລະດັບພະ ນັກງານບັນນາທິການ, ວິຊາການດ້ານສື່ມວນຊົນໃຫ້ສົມຄູ່ກັບໜ້າທີ່ຄວາມຮັບຜິດຊອບສູງຂຶ້ນ ເພື່ອປັບປຸງຮູບການ ແລະ ເນື້ອໃນໃຫ້ມີຄວາມຫລາກຫລາຍອຸດົມສົມບູນ, ຫັນໜັງສືພິມເຈ້ຍ ໄປເປັນໜັງສືພິມເອເລັກໂຕນິກ, ປັບປຸງຂອດປະສານງານ ຕາໜ່າງການພົວພັນໃນລະບົບສື່ມວນຊົນ ຈາກເມືອງຫາແຂວງ, ຈາກແຂວງຫາສູນກາງໃຫ້ມີຄວາມຄ່ອງໂຕວ່ອງໄວ ທັນເຫດການ. ພ້ອມນີ້, ກໍສຸມໃສ່ຊຸກຍູ້ການນໍາໃຊ້ໂທລະໂຄ່ງຢູ່ຂັ້ນບ້ານ ໄດ້ນໍາເອົາຂໍ້ມູນຂ່າວສານຕ່າງໆ ໄປຈັດຕັ້ງເຜີຍແຜ່ເຂົ້າສູ່ຊີວິດຕົວຈິງຂອງປະຊາຊົນໃຫ້ເປັນປົກກະຕິຕໍ່ເນື່ອງ. ເພື່ອເຮັດໃຫ້ສື່ມວນຊົນກ້າວສູ່ຈຸດໝາຍປາຍທາງອັນທັນສະໄໝ ສິ່ງ​ສຳຄັນແມ່ນຄວາມ​ເປັນເຈົ້າການຂອງສື່ມວນຊົນເອງ ແລະ ການມີສ່ວນຮ່ວມຈາກຫລາຍພາກສ່ວນ ທັງພາກລັດ, ເອກະຊົນ ແລະ ສັງຄົມ ຢ່າງແໜ້ນແຟ້ນ ຈຶ່ງຈະເຮັດໃຫ້ສື່ມວນຊົນກ້າວສູ່ການພັດທະນາໃນຕໍ່ໜ້າ.