ຫົກແຂວງພາກໃຕ້ແລກປ່ຽນບົດຮຽນການຈັດຕັ້ງປະຕິບັດ ສົນທິສັນຍາວ່າດ້ວຍສິດທິເດັກ

ໃນວັນທີ 6 ສິງຫານີ້ ທີ່ແຂວງຈໍາປາສັກ ບັນດາຮອງເຈົ້າແຂວງ ແລະ ພະແນກການຕ່າງໆ​ໃນແຂວງພາກໃຕ້​ເຊັ່ນ: ຈໍາປາສັກ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ ແລະ ແຂວງອັດຕະປື ໄດ້ປະຊຸມຮ່ວມກັນ ເພື່ອປຶກສາຫາລື ​ແລະ ​ແລກປ່ຽນ​ບົດຮຽນໃນການຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກ ເພື່ອພັດທະນາທ່າແຮງເດັກລາວບັນດາເຜົ່າ ແຕ່ນີ້ຮອດປີ 2030 ແລະ ການບັນລຸເປົ້າໝາຍການພັດທະນາແບບຍືນຍົງ 1.2 ແລະ ປຶກສາຫາລືບັນດາວຽກຈຸດສຸມ ແລະ ຕົວຊີ້ວັດ ເພື່ອຕິດ ຕາມການແກ້ໄຂຄວາມທຸກຍາກຂອງເດັກໃນລາວ.

ຮອງ​ປະທານ​ຄະນະ​ກຳມະການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ​ແລະ ​ແມ່-​ເດັກ ໄດ້ກ່າວເປີດກອງປະຊຸມວ່າ: “ກອງປະຊຸມນີ້, ເປັນກອງປະຊຸມໜຶ່ງທີ່ສໍາຄັນ ​ເພື່ອພວກເຮົາຈະໄດ້ພ້ອມກັນປຶກສາຫາລືການຈັດຕັ້ງຜັນຂະຫຍາຍເນື້ອໃນຄວາມໝາຍໝັ້ນ​ຂອງບັນ​ດາຮອງເຈົ້າແຂວງໃນການ​ຈັດ​ຕັ້ງ​ປະ​ຕິ​ບັດສົນທິສັນຍາ ວ່າດ້ວຍສິດທິເດັກ ແລະ ການບັນລຸເປົ້າໝາຍການ​ພັດ​ທະ​ນາ​ແບບ​ຍືນ​ຍົງ 1.2 ທີ່ລົງນາມ ແລະ ຮັບຮອງເອົາໃນປີ 2019 ຢ່າງມີວິທະຍາສາດ ໂດຍອີງໃສ່ຜົນການວິໄຈຄວາມຂາດເຂີນແບບທັບຊ້ອນຫລາຍມິຕິສໍາລັບເດັກຢູ່ ສປປ ລາວ ເພື່ອພ້ອມກັນກໍານົດບັນດາຕົວຊີ້ວັດ ແລະ ວຽກຈຸດສຸມ ເພື່ອແກ້ໄຂຄວາມທຸກຍາກຂອງເດັກໃນຫລາຍມິຕິຢູ່ ສປປ ລາວ ​ໃຫ້​ມີ​ປະສິດທິ​ຜົນ’’.