ຮອງປະທານສະພາແຫ່ງຊາດ ລົງເຄື່ອນໄຫວເຮັດວຽກ ຢູ່ແຂວງໄຊສົມບູນ
ທ່ານ ພົນໂທ ແສງນວນ ໄຊຍະລາດ, ຮອງປະທານສະພາແຫ່ງຊາດ, ຮອງຫົວໜ້າອະນຸກຳມະການໂຄສະນາຂະບວນການ ກອງປະຊຸມໃຫຍ່ ຄັ້ງທີ XI ຂອງພັກ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ໃນລະຫວ່າງວັນທີ 13-14 ກໍລະກົດນີ້ ໂດຍການຕ້ອນຮັບຂອງທ່ານ ພົນຕີ ຄຳລຽງ ອຸທະໄກສອນ, ເຈົ້າແຂວງໄຊສົມບູນ ແລະ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງພະແນກ ແລະ ການກະກຽມດຳເນີນກອງປະຊຸມໃຫຍ່ 3 ຂັ້ນ ຂອງພັກ ຢູ່ແຂວງຂອງຕົນ. ໂດຍຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ແກ້ໄຂຄວາມທຸກຍາກຂອງປະຊາຊົນ.
ທ່ານເຈົ້າແຂວງກ່າວວ່າ: ໃນ 6 ເດືອນຜ່ານມາຍ້ອນຜົນກະທົບຈາກການລະບາດພະຍາດໂຄວິດ-19 ເຮັດໃຫ້ອັດຕາເຕີບໂຕເສດຖະກິດມະຫາພາກ ໄດ້ພຽງ 3 %, ລວມຍອດຜະລິດຕະພັນພາຍໃນ (GDP) ບັນລຸກວ່າ 508 ຕື້ກີບ, ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ກໍໄດ້ຮັບການຈັດຕັ້ງປະຕິບັດ ຢ່າງຕັ້ງໜ້າ, ວຽກງານວັດທະນະທຳ-ສັງຄົມມີຄວາມໜັກແໜ້ນເຂັ້ມແຂງ ເປັນກ້າວໆ.
ສ່ວນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ມາຮອດປັດຈຸບັນບັນດາຮາກຖານພັກ, ຄະນະພັກຮາກຖານ, ອົງຄະນະພັກເມືອງ, ກອງບັນຊາການ ປກສ-ປກຊ ແລະ ກອງປະຊຸມໃຫຍ່ຜູ້ແທນ ສະຫະພັນແມ່ຍິງ ແຂວງ ໄດ້ສຳເລັດ 100 %. ການກະກຽມເນື້ອໃນກອງປະຊຸມໃຫຍ່ ກໍໄດ້ປະຕິບັດຕາມວິທີການ ແລະ ຂັ້ນຕອນ ທີ່ລະບຸໄວ້ ແລະ ດ້ານບຸກຄະລາກອນ ກໍມີຜົນສຳເລັດ ໂດຍພື້ນຖານ.
ໃນໂອກາດດັ່ງກ່າວ ທ່ານ ຮອງປະທານສະພາ ໄດ້ມີຄຳເຫັນໂອ້ລົມ ເນັ້ນໃຫ້ແຂວງສຸມໃສ່ກະກຽມດຳເນີນ ກອງປະຊຸມໃຫຍ່ 3 ຂັ້ນໃຫ້ສຳເລັດ ຕາມທີ່ກຳນົດໄວ້ ທັງຮັບປະກັນຖືກຕ້ອງ ແລະ ສອດຄ່ອງ ກັບສະພາບຄວາມເປັນຈິງ. ພ້ອມນີ້ ທ່ານໄດ້ເນັ້ນໃຫ້ສືບຕໍ່ປ້ອງກັນໂຄວິດ-19 ໃຫ້ທົ່ວສັງຄົມມີຄວາມເປັນເຈົ້າການສູງ ເພື່ອສະກັດກັ້ນບໍ່ໃຫ້ພະຍາດ ດັ່ງກ່າວ ກັບມາແຜ່ລະບາດອີກເທື່ອໃໝ່, ທັງຍູ້ແຮງຂະບວນການສ້າງພັກໃຫ້ປອດໃສ, ເຂັ້ມແຂງ ແລະ ໜັກ ແໜ້ນ ໂດຍຮັບປະກັນລັກສະນະນຳໜ້າ ແລະ ນຳພາ ຢ່າງມີປະສິດທິພາບ.
ຕໍ່ມາໃນຕອນເຊົ້າຂອງວັນທີ 14 ກໍລະກົດ ທ່ານ ຮອງປະທານສະພາ ພ້ອມຄະນະ ໄດ້ພົບປະພະນັກງານຫຼັກແຫຼ່ງ ຂອງແຂວງໄຊສົມບູນ ທີ່ສະໂມສອນເມືອງອະນຸວົງ ຕື່ມອີກ.
