KFC ໃນນະຄອນຫລວງ ມອສໂກ ສຸດລ້ຳສະໄໝພັດທະນາຫຸ່ນຍົນເປັນພະນັກງານເສີບອາຫານ
June 28, 2020 - 3:01 PM
ໃນວັນທີ 28 ມິຖຸນານີ້, ແຫລ່ງຂ່າວຕ່າງປະເທດ abcnews ລາຍງານວ່າ: KFC ໃນນະຄອນຫລວງ ມອສໂກ ປະເທດ ຣັດເຊຍ ເຜີຍນະວັດຕະກຳສຸດລ້ຳສະໄໝຕາມແນວຄິດ “ຮ້ານແຫ່ງອະນາຄົດ” ໂດຍການໃຊ້ຫຸ່ນຍົນແທນພະນັກງານເສີບອາຫານພາຍໃນຮ້ານ.
ໂຄສົກທາງຮ້ານລະບຸວ່າ: ພວກເຂົາໄດ້ຄິດຄົ້ນ ແລະ ພດທະນາຫຸ່ນຍົນເສີບອາຫານມາກ່ອນໜ້າທີ່ຈະມີການລະບາດໃຫຍ່ຂອງພະຍາດໂຄວິດ-19 ເພື່ອໃຫ້ສອດຄ່ອງກັບການເຕີບໃຫຍ່ຂອງໂລກໃນອະນາຄົດທີ່ພັດທະນາໄປເລື້ອຍໆຢ່າງບໍ່ຢຸດຢັ້ງ ແລະ ທີ່ສຳຄັນກໍເພື່ອສຸຂະອະນາໄມທີ່ດີກວ່າເກົ່າ.
ຫຸ່ນຍົນດັ່ງກ່າວ, ຈະມາຮັບອາຫານຈາກພະນັກງານທັນທີ ຫລັງຈາກທີ່ລູກຄ້າປ້ອນຄຳສັ່ງຊື້ ແລະ ໃສ່ລະຫັດບາໂຄດການສັ່ງຊື້ຂອງຕົນເອງຜ່ານຈໍຕູ້ສັ່ງລາຍການອາຫານອັດຕະໂນມັດ, ເຊິ່ງຖືເປັນເຕັກໂນໂລຊີທີ່ລ້ຳສະໄໝ ແລະ ຕອບໂຈດໃນການຊ່ວຍຫລຸດການສຳພັດກັນຢ່າງໃຫ້ຊິດໄດ້ເປັນຢ່າງດີໃນຊ່ວງທີ່ມີການລະບາດພະຍາດໂຄວິດ-19 ໃນຂະນະນີ້.
