ສະຫະລັດເຄັ່ງຄັດການອອກ ວີຊາ (visa) ເພື່ອປົກປ້ອງວຽກເຮັດງານທຳພາຍໃນປະເທດ
ໃນຂະນະທີ່ໃຫ້ສຳພາດຕໍ່ວິທະຍຸ Fox News ໃນວັນທີ 20 ມີຖຸນານີ້, ຜູ້ນຳສະຫະລັດອາເມລິກາໃຫ້ຮູ້ວ່າ: ຈະມີໜ້ອຍກໍລະນີທີ່ສຸດທີ່ຈະໄດ້ຮັບອະນຸຍາດເປັນພິເສດໃຫ້ເຂົ້າມາໃນສະຫະລັດ ຊຶ່ງສວນຫຼາຍຈະເປັນແຮງງານທີ່ບໍລິສັດຍັກໃຫ່ຍຂອງສະຫະລັດມີຄວາມຕ້ອງການ.
ທ່ານ ທຣຳ ເວົ້າຕໍ່ວິທະຍຸ Fox News ວ່າ: “ຂ້າພະເຈົ້າຈະປະກາດນະໂຍບາຍວີຊ່າ(visa) ໃນມື້ອື່ນມື້ຮືນີ້”. ທ່ານກ່າວໃນຂະນະທີ່ຊາວສະຫະລັດອາເມລິກາກຳລັງຊອກຫາວຽກເຮັດງານທຳ ພາຍຫຼັງໂຄວິດ-19 ນັ້ນວ່າ: ການເຄັ່ງຄັດອອກວີຊ່າໃຫ້ແຮງງານຕ່າງປະເທດນັ້ນ ແມ່ນເພື່ອປົກປ້ອງວຽກເຮັດງານທຳຢູ່ພາຍໃນປະເທດ.
ສຳນັກຂ່າວ Reutersໃຫ້ຮູ້ວ່າ: ຫຼາຍຄົນໄດ້ອອກມາວິພາກວິຈານນະໂຍບາຍ ວີຊ່າ ໃໝ່ຂອງ ທຣຳ ວ່າ: ທຣຳ ສວຍໂອກາດໄລຍະໂຄວິດ ເພື່ອວາງໂຄງການທີ່ສຳຄັນຂອງເຂົາ ເພື່ອຍາດແຍ່ງເອົາຫາງສຽງຂອງຊາວຜູ້ອອກແຮງງານ ໃນການເລືອກຕັ້ງປະທານາທິບໍດີຂອງຕົນ.
ທ່ານ ທຣຳ ໄດ້ສະແດງທ່າທີແຂງກ້າວ ຕໍ່ການອົບພະຍົບເຂົ້າເມືອງຂອງຊາວຕ່າງປະເທດ ນັບແຕ່ມື້ເຂົາເຂົ້າຮັບຕຳແໜ່ງເປັນຕົ້ນມາ, ທັດສະນະດັ່ງກ່າວບໍ່ມີຫຍັງປ່ຽນແປງ ແຕ່ຫາກຍັງຈະສືບຕໍ່ ເພື່ອດຶງດູດເອົາຫາງສຽງໃນການລົງເລືອກຕັ້ງປະທານາທິບໍດີ ກັບຄູ່ແຂ່ງຂອງເຂົາ.
ຂ່າວ: ລູກເມືອງພວນ
