ຟີລິບປິນ ສັ່ງຫ້າມຖ້ຽວບິນເຂົ້າປະເທດເປັນການຊົ່ວຄາວ
ແຫລງຂ່າວ ມະນີລາ ຂອງຟີລິບປິນລາຍງານເມື່ອບໍ່ດົນມານີ້ວ່າ: ຟີລິບປິນ ໄດ້ສັ່ງຫ້າມຖ້ຽວບິນໂດຍສານລົງຈອດໃນປະເທດຕັ້ງແຕ່ ວັນທີ 3 ພືດສະພາ ເປັນຕົ້ນໄປ ເປັນເວລາ 1 ອາທິດ ເພື່ອຄວບຄຸມການແຜ່ລະບາດຂອງພະຍາດໂຄວິດ-19 ແລະ ຊ່ວຍຫລຸດຜ່ອນຄວາມແອອັດໃນສະຖານທີ່ໃຊ້ກັກໂຕ ເພື່ອກວດເບິ່ງອາການຊາວຟີລິບປິນ ຫລາຍພັນຄົນ.
ຄະນະເຮັດວຽກຝ່າຍສະກັດກັ້ນການແຜ່ລະບາດຂອງພະຍາດໂຄວິດ-19 ກ່າວວ່າ: ຈຸດປະສົງຕົ້ນຕໍໃນການສັ່ງຫ້າມຖ້ຽວບິນເພື່ອຫລຸດຜ່ອນຄວາມແອອັດ ແລະ ແຮງງານຟິລິບປີນທ່ີເຮັດວຽກຢູ່ຕ່າງປະເທດຈະໄດ້ຮັບການເອົາໃຈໃສ່ເປັນຢ່າງດີເມື່ອພວກເຂົາເດີນທາງກັບມາຟິລິບປີນ. ປະເທດຟີລິບປິນ ໄດ້ນຳໃຊ້ມາດຕະການ ຄວບຄຸມຢ່າງເຂັ້ມງວດກ່ຽວກັບການກວດຄົນເຂົ້າເມືອງ, ການເດີນທາງ, ການຄ້າ ແລະ ການເຕົ້າໂຮມຂອງປະຊາຊົນນັບແຕ່ກາງເດືອນ ມີນາ ຜ່ານມາຫລັງຈາກ ກວດພົບຜູ້ຕິດເຊື້ອພະຍາດໂຄວິດ-19 ຄົນທຳອິດ, ຟີລິບປິນຍັງປິດປະເທດຫ້າມຄົນຕ່າງປະເທດເຂົ້າຟິລິບປີນອີກດ້ວຍ , ຂະນະນີ້ມີຊາວຟີລິບປິນປະມານ 20.000 ຄົນທີ່ຖືກກັກໂຕ ເພື່ອກວດເບິ່ງອາການໃນນະຄອນຫລວງມະນີລາ. ປັດຈຸບັນ, ຟິລິບປິນ ມີຜູ້ຕິດເຊື້ອພະຍາດ ໂຄວິດ-19 ຈຳນວນ 8.928 ຄົນ ແລະ ເສຍຊີວິດ 603 ຄົນ.
