ຈີນປະກາດຢາປົວພະຍາດໂຄວິດ-19 ດີ 95%
ລູກເມືອງພວນ
ຫວ່າງບໍ່ດົນມານີ້, ວົງການການແພດຈີນໄດ້ປະກາດຢາຊະນິດໃໝ່ທີ່ສາມາດປົວພະຍາດໂຄວິດ-19 ດີ 95%. ຢາຊະນິດດັ່ງກ່າວມີຊື່ວ່າ Tocilizumab ແລະ ໄດ້ຂາຍທົ່ວໄປຢູ່ໃນທ້ອງຕະຫຼາດ ໂດຍມີຊື່ວ່າ Actemrao 20 (ຢາປົວອັກເສບຄໍ) ໂດຍໄດ້ຮັບການຢັ້ງຢືນຈາກບັນດານັກວິທະຍາສາດ ພາຍຫຼັງນຳໃຊ້ປິ່ນປົວໃຫ້ 19 ຄົນທີ່ຕິດເຊື້ອ, ເຫັນວ່າ ສາມາດອອກຈາກໂຮງໝໍໄດ້ພາຍໃນ 2 ອາທິດ.
ວົງການແພດຈີນ ໄດ້ຮັບຮອງຢາດັ່ງກ່າວ ເອົາໄປປິ່ນປົວໃຫ້ຜູ້ຕິດເຊື້ອອັກເສບປອດຮຸນແຮງໄດ້ຮັບຜົນດີ, ຊຶ່ງແພດຈີນໄດ້ນຳໃຊ້ທົດລອງເພື່ອສະກັດກັ້ນການປ່ຽນແປງຂອງລະບົບພູມຄຸ້ມກັນຂອງຮ່າງກາຍ. ເມື່ອນຳໃຊ້ຢາດັ່ງກ່າວເຫັນວ່າ ຜູ້ຕິດເຊື້ອທັງໝົດທີ່ມີອາການໄຂ້ນັ້ນຫຼຸດລົງຢ່າງຈະແຈ້ງ, ອຸນຫະພູມຂອງຮ່າງກາຍກັບຄືນສູ່ປົກກະຕິ.
ປັດຈຸບັນຢາດັ່ງກ່າວໄດ້ກາຍເປັນຄວາມຫວັງໃໝ່ຕໍ່ກັບຜູ້ຕິດເຊື້ອໄວຣັດ ໂຄວິດ-19, ໃນຂະນະທີ່ບັນດາຊາດອື່ນໆກຳລັງແຂ່ງຂັນກັນຜະລິດວັກຊິນຊະນິດຕ່າງໆເພື່ອປິ່ນປົວພະຍາດຮ້າຍນີ້.
