ເມຍນອນກັບຊາກສົບຂອງຜົວເສຍຊີວິດຍ້ອນ ໂຄວິດ-19
ລູກເມືອງພວນ
ສຳນັກຂ່າວ ຊີເອັນເອັນ ໂດຍອ້າງອີງຕາມຄຳໃຫ້ການຂອງເຈົ້າຄອງນະຄອນ Borghetto Santo Spirito (ອີຕາລີ), ທ່ານ Giancarlo Canepa ເມື່ອວັນທີ 11 ມີນາຜ່ານມາ ໃຫ້ຮູ້ວ່າ: ຜູ້ຍິງຄົນໜຶ່ງຕ້ອງໄດ້ຢູ່ກັບຊາກສົບຂອງຜົວຕົນເອງ ຍ້ອນມີຂໍ້ກຳນົດການແຍກຕົວສະເພາະ ພະຍາດ ໂຄວິດ-19.
ຜົວຂອງເຂົາຕິດເຊື້ອ ໄວຣັສ SARS-CoV-2 ແລະ ໄດ້ເສຍຊີວິດລົງໃນວັນທີ 9 ມີນາ ຜ່ານມາ.
ເຈົ້າຄອງນະຄອນເປີດເຜີຍວ່າ: ອີງຕາມຂໍ້ກຳນົດຂອງລັດພວກເຮົາວາງອອກ ແມ່ນຫ້າມບໍ່ໃຫ້ຜູ້ໃດເຂົ້າໄປໃກ້ ຫຼື ຕິດພັນກັບຊາກສົບຄົນຕາຍຍ້ອນພະຍາດໂຄວິດ-19. ດັ່ງນັ້ນ, ເມຍຂອງລາວຈຳເປັນຕ້ອງໄດ້ຢູ່ກັບຊາກສົບຂອງຜົວຈົນເຖິງວັນທີ 11 ມີນາ.
ທ່ານ Giancarlo ຍັງໃຫ້ຮູ້ອີກວ່າ: ຜົວຂອງເຂົາປະຕິເສດ ບໍ່ຍອມໄປໂຮງໝໍ ໃນທີ່ສຸດກໍເສຍຊີວິດໄປ. ເຫດການດັ່ງກ່າວ, ໄດ້ສ້າງກະແສຄວາມຕື່ນຕົກໃຈໃຫ້ຊາວບ້ານເປັນຢ່າງຍິ່ງ.
ໂທລະທັດທ້ອງຖິ່ນ IVG.IT ໄດ້ອອກລາຍການວີດີໂອສຳພາດຊາວບ້ານຄົນໜຶ່ງໃຫ້ຮູ້ວ່າ: ຜູ້ຍິງຄົນນັ້ນ ເຂົາຮ້ອງໄຫ້ ແລະ ຮ້ອງຂໍຄວາມຊ່ວຍເຫຼືອຈາກທາງການ, ແຕ່ ບໍ່ມີໃຜຈະກ້າເຂົ້າໄປໃກ້ ແລະ ໃຫ້ການຊ່ວຍເຫຼືອ ກໍຄືໃຫ້ກຳລັງໃຈແກ່ລາວໄດ້ ເພາະມີລາວຄົນດຽວຢູ່ກັບຊາກສົບຂອງຜົວເທົ່ານັ້ນ.
