ອິຕາລີສັ່ງປິດສະຖາບັນການສຶກສາທົ່ວປະເທດ

      ອິຕາ​ລີ​ສັ່ງ​ປິດ​ສະ​ຖາ​ບັນ​ການ​ສຶກສາ​ທົ່ວ​ປະ​ເທດ ຫລັງ​ຈຳນວນ​ຜູ້​ເສຍ​ຊີວິດ “​ໂຄ​ວິດ-19” ​ເພີ່ມ​ເປັນ 107 ຄົນ ​ແລະ ຈຳນວນ​ຜູ້​ຕິດ​ເຊື້ອ​ເພີ່ມ​ເປັນ 3.000 ຄົນ.

      ສຳນັກ​ຂ່າວ​ເອ​ເອັຟພີ ລາຍ​ງານ​ໃນ​ວັນ​ທີ 4 ມີນາ​ວ່າ: ລັດຖະບານ​ອິຕາ​ລີ​ສັ່ງ​ປິດ​ໂຮງຮຽນ ​ແລະ ມະຫາວິທະຍາ​ໄລ​ທຸກ​ແຫ່ງ​ທົ່ວ​ປະ​ເທດ​ຈົນ​ຮອດ​ວັນ​ທີ 15 ມີນາ ທ່າມກາງວິ​ກິດ​ໂຣກ​ໂຄ​ວິດ-19 ລະບາດ ສົ່ງ​ຜົນ​ໃຫ້​ຈຳນວນ​ຜູ້​ເສຍ​ຊີວິດ​ຈາກ​ການ​ແຜ່​ລະບາດ​ຂອງ​ໂຣກ​ໂຄ​ວິດ-19 ​ເພີ່ມ​ເປັນ 107 ຄົນ.

       ​ເຈົ້າໜ້າ​ທີ່​ອິຕາ​ລີ ຢືນຢັນ​ວ່າ: ພົບ​ຜູ້​ເສຍ​ຊີວິດ​ຈາກ​ໂຣກ​ໂຄ​ວິດ-19 ​ເພີ່ມ​ອີກ 28 ຄົນ​ໃນ​ວັນ​ທີ 4 ມີນາ ສົ່ງ​ຜົນ​ໃຫ້​ຈຳນວນ​ລວມຜູ້​ເສຍ​ຊີວິດ​ຢູ່​ອິຕາ​ລີ​ມີ 107 ຄົນ ໜ້ອຍ​ກວ່າ​ຈີນ​ພຽງ​ປະ​ເທດ​ດຽວ, ສ່ວນ​ຈຳນວນ​ຜູ້​ຕິດ​ເຊື້ອພາຍ​ໃນ​ປະ​ເທດ​ເພີ່ມ​ເປັນ 3.000 ຄົນ.

     ອິຕາ​ລີ ​ເປັນ​ສູນ​ກາງ​ການ​ແຜ່​ລະບາດ​ຂອງ​ໂຣກ​ໂຄ​ວິດ-19 ​ໃນ​ເອີຣົບ. ຂະນະ​ທີ່​ຄະນະ​ລັດຖະບານ​ຂອງ​ອິຕາ​ລີ ປະຊຸມ​ເພື່ອ​ຫາ​ທາງ​ອອກ​ຈາກ​ວິ​ກິດ​ດ້ານ​ສາທາລະນະ​ສຸກຄັ້ງຮ້າຍ​ແຮງ​ນີ້ ທີ່​ກຳລັງ​ດຶງ​ເສດຖະກິດ​ຂອງ​ປະ​ເທດ ​ເຊິ່ງບອບ​ບາງ​ຢູ່​ແລ້ວ​ເຂົ້າສູ່​ສະພາບ​ຫລຸດ​ຖອຍ.