ປີໃໝ່ຂະແໜງພາສີຈະເລັ່ງປັບປຸງການເກັບລາຍຮັບໃຫ້ທັນສະໄໝ
ເພື່ອແກ້ໄຂບັນດາຂໍ້ຄົງຄ້າງ ແລະ ວາງມາດຕະການໃນການຈັດເກັບລາບຮັບເຂົ້າງົບປະມານແຫ່ງລັດ ໃນປີ 2020 ໃຫ້ມີປະສິດທິຜົນສູງຂຶ້ນ. ດັ່ງນັ້ນ ຂະແໜງພາສີຈະຫັນເປັນທັນສະໄໝຂອງລະບົບອາຊິກູດາ, ລະບົບ ບ53, ລະບົບແຈ້ງພາສີປະຕູດຽວ ແລະ ລະບົບການຄຸ້ມຄອງຂົນສົ່ງສິນຄ້າຜ່ານແດນອາຊຽນ ແລະ ເລັ່ງຕິດຕັ້ງເຄື່ອງສະແກນເນີຢູ່ບັນດາດ່ານພາສີໃນຂອບເຂດທົ່ວປະເທດໃຫ້ສຳເລັດ.
ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ກະຊວງການເງິນ ໃຫ້ຮູ້ວ່າ: ໃນປີ 2019 ຜ່ານມາ, ຂະແໜງພາສີໄດ້ເລັ່ງປັບປຸງກົງຈັກຕ້ານ ແລະ ສະກັດກັ້ນການລັກລອບໜີພາສີ ທັງໄດ້ປະກອບເຄື່ອງມືທັນສະໄໝເຂົ້າໃນການປະຕິບັດວຽກງານວິຊາສະເພາະຂອງຂະແໜງພາສີ ເປັນຕົ້ນລະບົບຕິດຕາມຄຸ້ມຄອງພາຫະນະທ່ອງທ່ຽວຢ້ຽມຢາມ (ບ53), ລະບົບການຈັດເກັບຄ່າທຳນຽມແບບເອເລັກໂຕຣນິກ, ລະບົບການແຈ້ງພາສີປະຕູດຽວ ແລະ ອື່ນໆ. ນອກນັ້ນ ຍັງໄດ້ເອົາໃຈໃສ່ພັດທະນາບຸກຄະລາກອນໃຫ້ມີຄວາມຮູ້ຄວາມສາມາດ ຕອບສະໜອງກັບຄວາມຮຽກຮ້ອງຕ້ອງການຂອງວຽກງານ ເຮັດໃຫ້ການຈັດເກັບລາຍຮັບເຂົ້າງົບປະມານໃນ 11 ເດືອນຂອງປີ 2019 ບັນລຸໄດ້ 6.116 ຕື້ກວ່າກີບ ຊຶ່ງລາຍຮັບສ່ວນໃຫຍ່ຍັງແມ່ນການນຳເຂົ້ານໍ້າມັນເຊື້ອໄຟກວມ 39,7%, ພາຫະນະກວມ 24,92%, ເຄື່ອງອຸປະໂພກ-ບໍລິໂພກກວມ 12,76% ຂອງລາຍຮັບທັງໝົດ.
ຢ່າງໃດກໍຕາມ ເຖິງວ່າການຈັດເກັບລາຍຮັບໃນປີຜ່ານມາ ມີລັກສະນະທ່າກ້າວ, ແຕ່ກໍຍັງມີຂໍ້ຫຍຸ້ງຍາກຫລາຍດ້ານ ເປັນຕົ້ນແມ່ນຜົນກະທົບທີ່ເກີດຈາກໄພທຳມະຊາດ, ການນຳເຂົ້າ-ສົ່ງອອກສິນຄ້າຢູ່ບາງດ່ານຊາຍແດນຢຸດສະງັກ, ບໍລິສັດຂາດສະພາບຄ່ອງທາງດ້ານການເງິນ ແລະ ເງິນຕາໃນການຊໍາລະສິນຄ້າທີ່ສັ່ງຊື້ຈາກຕ່າງປະເທດ ເຮັດໃຫ້ສະພາບການນຳເຂົ້າສິນຄ້າເສຍພາສີມີລັກສະນະຫລຸດລົງ, ແຫລ່ງລາຍຮັບເກືອບ 90% ຂອງສິນຄ້ານຳເຂົ້າມີອັດຕາຫລຸດຜ່ອນພາສີ 0% ຂອງວັດຖຸອຸປະກອນຕາມນະໂຍບາຍສົ່ງເສີມການລົງທຶນ ແລະ ການຜະລິດເພື່ອທົດແທນການນຳເຂົ້າ. ນອກນັ້ນ, ມາດຕະການໃນການບັງຄັບໃຊ້ກົດໝາຍຍັງບໍ່ທັນເຂັ້ມງວດ ແລະ ຄວາມເປັນເອກະພາບ ເປັນຕົ້ນແມ່ນການປະຕິບັດມູນຄ່າແຈ້ງພາສີຂອງບັນດາບໍລິສັດ, ການແກ້ໄຂລົດນຳເຂົ້າບໍ່ຖືກຕ້ອງຢູ່ບັນດາທ້ອງຖິ່ນຍັງບໍ່ທັນເຂັ້ມງວດ ແລະ ມີລັກສະນະບໍ່ສິ້ນສຸດ, ສະພາບການລັກລອບສິນຄ້າໜີພາສີຍັງມີແຜ່ຫລາຍ ແລະ ມີຫລາຍຮູບແບບ ໂດຍສະເພາະນໍ້າມັນເຊື້ອໄຟ.
ທ່ານ ບຸນປະເສີດ ສີກຸນລະບຸດ ເນັ້ນຕື່ມວ່າ: ເພື່ອປະຕິບັດບາງມາດຕະການຂອງວຽກງານພາສີໃຫ້ມີຜົນສຳເລັດໃນປີ 2020 ຕ້ອງໄດ້ເພີ່ມທະວີການປະສານສົມທົບກັບຜູ້ຊ່ຽວຊານໄຈກາ, ທະນາຄານໂລກ ເພື່ອດໍາເນີນແຜນງານຫັນພາສີເປັນທັນສະໄໝ, ປັບປຸງ ແລະ ພັດທະນາລະບົບບໍລິຫານຄວາມສ່ຽງທີ່ນອນໃນລະບົບອາຊິກູດາໃຫ້ມີປະສິດທິພາບ ແລະ ສອດຄ່ອງກັບສະພາບຂອງຜູ້ນໍາເຂົ້າ-ສົ່ງອອກຕົວຈິງ.
