ຫວຽດນາມຍຶດງາຊ້າງ ແລະ ເກັດຫລິ່ນຈາກອາຟຣິກາໄດ້ 2 ກວ່າໂຕນ
ສື່ທາງການຫວຽດນາມລາຍງານໃນວັນທີ 24 ທັນວາວ່າ: ເຈົ້າໜ້າທີ່ຍຶດງາຊ້າງ ແລະ ເກັດຫລິ່ນລັກລອບນຳເຂົ້າຈາກອາຟຣິກາ ນ້ຳໜັກຫລາຍກວ່າ 2 ໂຕນ.
ໜັງສືພິມຂອງກົມພາສີຫວຽດນາມ ລາຍງານວ່າ: ເຈົ້າໜ້າທີ່ພາສີໃນເມືອງຮາຍຟອງ ທາງຕອນເໜືອຂອງປະເທດ ຍຶດງາຊ້າງນ້ຳໜັກ 330 ກິໂລ ແລະ ເກັດຫລິ່ນນ້ຳໜັກ 1,7 ໂຕນ ຢູ່ໃນຕູ້ຄອນເທນເນີໄມ້ 3 ຕູ້ໄດ້ໃນເດືອນນີ້ ທັງໝົດຖືກສົ່ງມາຈາກນີເຊຣີ. ການຄ້າງາຊ້າງ ແລະ ເກັດຫລິ່ນເປັນສິ່ງຜິດກົດໝາຍຢູ່ຫວຽດນາມ, ແຕ່ຍັງມີຜູ້ລັກລອບຄ້າຂາຍຢ່າງກວ້າງຂວາງ. ຊາວຫວຽດນາມບາງຄົນເຊື່ອວ່າ: ເກັດຫລິ່ນມີສັບພະຄຸນບຳລຸງຮ່າງກາຍ, ແຕ່ນັກວິໄຈເປີດເຜີຍຜົນການວິໄຈວ່າ: ເກັດຫລິ່ນປະກອບມີເຄຣາຕິນ ເປັນສານປະເພດດຽວກັບເລັບນິ້ວຕີນຂອງຄົນ ຈຶ່ງບໍ່ມີຜົນປະໂຫຍດຕໍ່ຮ່າງກາຍແຕ່ຢ່າງໃດ.
