ຂໍ້ຂັດແຍ່ງການຖອນຕົວອອກຈາກສະຫະພາບເອີຣົບ(EU)ຂອງອັງກິດນັບມື້ຮ້ອນແຮງຂຶ້ນ

ຮຽບຮຽງໂດຍ: ລູກເມືອງພວນ

ແຫຼ່ງຂ່າວໂທລະພາບ (NBT) ຂອງໄທ, ໃນຕອນເຊົ້າວັນທີ 13ກັນຍານີ້ ໃຫ້ຮູ້ວ່າ: ສານອຸທອນສູງສຸດຂອງ ສະກອັດແລນ ວິນິໄສວ່າ, ການຕັດສິນໃຈ ຂອງນາຍົກລັດຖະມົນຕີ ບໍຣິດ ຈອນສັນ ຂອງອັງກິດທີ່ໃຫ້ມີການລະງັບການປະຊຸມຂອງສະພາເປັນເວລາ 5 ສັບປະດານັ້ນ ຖືວ່າເປັນການຜິດກົດໝາຍ. ການຕັດສິນໃຈຂອງທ່ານ ຈອນສັນ ເປັນການໃຫ້ສະພາປິດການປະຊຸມຈົນເຖິງວັນທີ 14 ຕຸລານັ້ນ, ຝ່າຍຄ້ານເຫັນວ່າ ມັນເປັນການຕັ້ງໃຈຂອງທ່ານ ຈອນສັນ ເພື່ອຂັດຂວາງຄວາມພະຍາຍາມ ຢັບຢັ້ງແຜນການແຍກຕົວອອກຈາກສະຫະພາບ ເອີຣົບ ໂດຍບໍ່ມີຂໍ້ຕົກລົງ ໃນວັນທີ 31 ຕຸລາ.

ຄຳວິນິໄສຂອງຜູ້ພິພາກສາສານອຸທອນສູງສຸດຂອງ ສະກອັດແລນຄັ້ງນີ້, ຖືວ່າເປັນການຄັດກັບຄຳວິນິໄສເດີມຂອງສານຂັ້ນຕົ້ນຂອງສະກອັດແລນທີ່ວ່າ: ສານບໍ່ມີອຳນາດແຊກແຊງ ຄວາມຕັດສິນໃຈທາງການເມືອງຂອງນາຍົກລັດຖະມົນຕີຕໍ່ລັດຖະສະພາ. ພາຍຫຼັງໄດ້ຮັບການຟ້ອງຮ້ອງຈາກສະມາຊິກຝ່າຍຄ້ານລັດຖະສະພາ 75 ຄົນ. ຫຼັງຈາກນີ້ ລັດຖະບານອັງກິດຈະຢື່ນອຸທອນຕໍ່ສານສູງສຸດຂອງສະຫະລັດ ອານາຈັກ ຕໍ່ການຕັດສິນໃຈຄັ້ງຫຼ້າສຸດຂອງສານສະກອັດແລນ, ຊຶ່ງສານສູງສຸດນັດໄຕ່ສວນສຸກເສີນໃນວັນທີ 17 ກັນຍານີ້.