ເມື່ອທາງລົດ ເປັນຄອງນໍ້າ

​ໂດຍ: ມຶກບໍ່​ແຫ້ງ

ພໍແຕ່ຝົນຕົກບໍ່ພໍເທົ່າໃດກໍເຮັດໃຫ້ເສັ້ນທາງຫຼາຍ​ສາຍ​ໃນ​ຕົວ​ເມືອງ ຫຼວງວຽງຈັນກາຍເປັນນໍ້າແກ່ງທັນທີເຊິ່ງບັນຫານີ້ເກີດມາດົນສົມຄວນແລ້ວ.

ເມື່ອ 4-5 ມື້ທີ່ຜ່ານມາ ຝົນໄດ້ຕົກລົງທົ່ວນະຄອນຫຼວວຽງຈັນ ແລະ ເຂດ​ແຂວງອື່ນໆ ຂອງປະເທດໜັກສົມຄວນ ເຊິ່ງນອກຈາກ ຈະກັງວົນໃຈນຳ ນໍ້າຖ້ວມໄຮ່ນາຕາກ້າ, ເຮືອນຊານບ້ານ​ຊ່ອງຂອງປະຊາຊົນ ຜູ້ທີ່ອາໄສ ບ່ອນທີ່ມີຄວາມສ່ຽງແລ້ວ ພວກເຮົາຍັງເຫັນວ່າການສັນຈອນ ຕາມທ້ອງຖະໜົນຂອງນະຄອນຫຼວງຫຼາຍຈຸດນັ້ນ ເກືອບວ່າ ອຳມະພາດລົງ ຍ້ອນນໍ້າອັ່ງ.

ຕາມການລາຍງານ ຂອງປະຊາຊົນ ທາງສື່ອອນລາຍ ແລະ ຜູ້ຂຽນໄດ້ພົບພໍ້ ດ້ວຍຕົນເອງນັ້ນ ມີຫຼາຍຈຸດ ທົ່ວນະຄອນຫຼວງ​ເຮົາ ທີ່ມີນໍ້າອັ່ງ ໂດຍສະເພາະ ເຂດສີ່ແຍກໄຟແດງທາດຫຼວງ, ດົງໂດກ ແລະ ເຂດອື່ນໆ ເຮັດໃຫ້ການສັນຈອນໄປມາຕິດຂັດ​ຫຼາຍກວ່າເກົ່າ.

ສີ່ແຍກໄຟແດງທາດຫຼວງ ເປັນບ່ອນທີ່ເກີດມີນໍ້າຖ້ວມຂັງເລື້ອຍທີ່ສຸດ ນອກຈາກຫົນທາງ ​ໄດ້ກາຍເປັນບ່ອນໄຫຼຂອງນໍ້າ ແທນຄອງລະ​ບາຍ ທີ່ສ້າງຄຽງຄູ່ກັບຫົນທາງນັ້ນແລ້ວນໍ້າຍັງໄຫຼເຂົ້າຖ້ວມ ເຮືອນປະຊາຊົນ ທີ່ຢູ່ເຂດຕໍ່າ ສ້າງຄວາມເດືອດຮ້ອນບໍ່ແມ່ນໜ້ອຍ. ນອກນັ້ນ, ຈຸດດັ່ງກ່າວ ກໍເປັນທີ່ຮັບຮູ້ດີວ່າ ລົດອັ່ງອໍ ທຸກມື້ ເມື່ອນໍ້າຖ້ວມຂັງ ຄືດັ່ງວ່າ ຄວາມແອອັດ ຍິ່ງເພີ່ມທະວີ.

ພວກເຮົາຫຼາຍຄົນ ສາມາດບອກສາເຫດໄດ້ງ່າຍໆ ວ່າ ນໍ້າຖ້ວມຂັງ ຖະໜົນຫົນທາງກາຍເປັນນໍ້າແກ່ງຍາມຝົກນີ້ກໍເນື່ອງຈາກວ່າຄອງລະບາຍນໍ້າ ທີ່ສ້າງຂຶ້ນຄູ່ຂະໜານກັບເສັ້ນທາງນັ້ນບໍ່ເຮັດວຽກ ຫຼື ອຸດຕັນ ເຊິ່ງເກີດມາຈາກ ຂາດການບົວລະບັດຮັກສາອະນາໄມເປັນປະຈຳ, ການທັບຖົມຄອງນໍ້າ ທີ່ບໍ່ມີໃຜຫົວຊາ ແລະ ອື່ນໆ.

ຍິ່ງກວ່ານັ້ນປະຊາຊົນຈຳນວນໜຶ່ງທີ່ອາໄສໃກ້ກັບຄອງນໍ້າ ອາດເຫັນຜົນກະທົບແລ້ວວ່າບັນດາຖົງຢາງ, ເຄື່ອງຂອງທີ່ເຂົາເຈົ້າ ຖິ້ມລົງໄປໃນຄອງນໍ້ານັ້ນຈະເຮັດໃຫ້ ຕົນເອງ ແລະ ຜູ້ຄົນຈຳນວນຫຼາຍຕ້ອງ ໄດ້ຮັບຜົນກະທົບເຊັ່ນນີ້.

ເມື່ອທວງເຖິງພາກສ່ວນທີ່ຮັບຜິດຊອບວຽກງານນີ້ໂດຍກົງກໍແມ່ນ ຫ້ອງການຄຸ້ມຄອງ ແລະ ບໍລິການຕົວເມືອງເຖິງວ່າພວກເພິ່ນຈະພະຍາຍາມ ສຸດຄວາມສາມາດໃນການປະຕິບັດໜ້າທີ່ຂອງຕົນໃນການນຳພາ ປະຊາຊົນອະນາໄມຄອງນໍ້າ, ເກັບຂີ້ເຫຍື້ອຕາມຈຸດຕ່າງໆ ແຕ່ມັນກໍຍັງບໍ່ທັນພຽງພໍທີ່ເຮັດໃຫ້ຄອງນໍ້າ ທົ່ວທຸກແຈມູນຂອງນະຄອນຫຼວງວຽງຈັນ ໄຫຼສະດວກ ໄດ້ໝົດ.

ແນ່ນອນການຮັກສາຄອງນໍ້າເປັນໜ້າທີ່ຮັບຊອບຊ່ວຍກັນ ໂດຍສະເພາະ ຜູ້ຢູ່ອາໄສໃກ້ກັບຄອງນໍ້ານັ້ນນອກຈາກຈະບໍ່ຖິ້ມຂີ້ເຫຍື້ອຕ່າງໆ ທີ່ອາດຈະເກີດການອຸດຕັດຂອງຄອງແລ້ວກໍຍັງໄດ້ອະນາໄມເປັນປະຈຳ, ນອກນັ້ນ ພາກສ່ວນທີ່ກ່ຽວຂ້ອງຕ້ອງໄດ້ມີການກວດກາຕິດຕາມສະພາບ ຂອງບັນດາຄອງນໍ້າຕ່າງໆໂດຍສະເພາະແມ່ນຈຸດທີ່ມັກມີນໍ້າຖ້ວມຂັງ ຢ່າງໄວວາ ເມື່ອຝົນຕົກມາ ຕ້ອງໄດ້ມີການອະນາໄມ ແລະ ບົວລະບັດຮັກສາ ເປັນຢ່າງດີ.

ໃນນະຄອນຫຼວງວຽງຈັນ ພວກເຮົາ ນອກຈາກ ຈະຖືເອົາວັນເສົາແດງ ເປັນວັນອະນາໄມຂີ້ເຫຍື້ອ, ໃບໄມ້ຕາມຄອກແຄແຈຮົ້ວແລ້ວ ອາດເປັນການດີ ຖ້າຫາກພວກເຮົາສ້າງຂະບວນການອະນາໄມຄອງນໍ້າ ຕາມຖະໜົນຫຼວງເພື່ອເຮັດໃຫ້ນໍ້າໄຫຼແລ່ນສະດວກດີຂຶ້ນກວ່າເກົ່າ.