ອາຣັບບີ ຊາອຸດິດ-UAE ມອບເງິນມະຫາສານຊ່ວຍເຫລືອຊູດັງ

      ອາຣັບບີ ຊາ​ອຸ​ດິດ ​ແລະ ສະຫະ​ນະຄອນ ​ເອ​ເມຣັດ ອາຣັບ ມອບ​ເງິນ​ຊ່ວຍ​ເຫລືອ​ລວມກັນ 3.000 ລ້ານ​ໂດ​ລາ​ສະຫະລັດ ​ໃຫ້​ແກ່​ຊູ​ດັງ ທ່າມກາງ​ກະ​ແສ​ຂ່າວ​ວ່າ​ທັງ​ສອງ​ປະ​ເທດ​ “ກ່ຽວຂ້ອງ” ກັບ​ເຫດ​ລັດຖະປະຫານ​ຄັ້ງຫລ້າ​ສຸດ, ສ່ວນ​ການ​ເຈລະຈາ​ລະຫວ່າງ​ກອງທັບ​ກັບ​ຝ່າຍ​ປະຊາຊົນ​ຍັງ​ບໍ່​ໄດ້​ຂໍ້​ສະຫລຸບ.

      ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ລັດຖະບານ​ອາຣັບບີ ຊາ​ອຸ​ດິດ ​ແລະ ສະຫະ​ນະຄອນ ​ເອ​ເມຣັດ ອາຣັບ (UAE) ອອກ​ຖະ​ແຫລ​ງການ​ຮ່ວມ​ກັນ​ໃນ​ວັນ​ທີ 21 ​ເມສາ ​ເລື່ອງ​ການ​ມອບ​ຄວາມ​ຊ່ວຍ​ເຫລືອ​ໃນ​ທຸກ​ດ້ານ​ທີ່​ຈຳ​ເປັນ​ໃຫ້​ແກ່​ຊູ​ດັງ ​ມູນ​ຄ່າ 3.000 ລ້ານ​ໂດ​ລາ​ສະຫະລັດ ​ໂດຍ​ແບ່ງ​ເປັນ​ງົບປະມານ​ສະໜັບສະໜູນ 500 ລ້ານ​ໂດ​ລາ​ສະຫະລັດ ​ເພື່ອ​ສົ່ງ​ເສີມ​ສະຖຽນ​ລະ​ພາບ​ໃຫ້​ແກ່​ທະນາຄານ​ກາງ​ຊູ​ດັງ ​ແລະ ທີ່​ເຫລືອ​ອີກ 2.500 ລ້ານ​ໂດ​ລາ​ສະຫະລັດ ສຳລັບ​ຈັດ​ສັນ​ການ​ຊ່ວຍ​ເຫລືອ​ດ້ານ​ມະນຸດສະທຳ ບໍ່​ວ່າ​ຈະ​ເປັນ​ອາຫານ, ຢາ​ປິ່ນປົວ ​ແລະ ​ເຊື້ອ​ໄຟ.

       ​ເຖິງ​ຢ່າງ​ໃດ​ກໍ​ຕາມ, ຖະ​ແຫລ​ງການ​ຮ່ວມ​ຂອງ​ລັດຖະບານ​ທັງ​ສອງ​ປະ​ເທດ​ບໍ່​ໄດ້​ລະບຸ​ວ່າ: ​ເງິນ​ທັງ​ໝົດຄື “​ເງິນ​ກູ້” ຫລື “​ເງິນ​ຊ່ວຍ​ເຫລືອ​ລ້າ” ທ່າມກາງ​ກະ​ແສ​ຂ່າວ​ວ່າ: ທັງ​ສອງ​ປະ​ເທດ “ຢູ່​ເບື້ອງຫລັງ” ການ​ສະໜັບສະໜູນກອງທັບ​ຊູ​ດັງ​ກໍ່​ລັດຖະປະຫານ​ໂຄ່ນ​ລົ້ມອຳນາດ​ອະດີດ​ປະທານາທິບໍດີ ​ໂອ​ມາ ອັລ-ບ​າ​ເຊຍ ​ໄວ 75 ປີ ​ເຊິ່ງຄອງ​ອຳນາດ​ມາກ​ວ່າ 30 ປີ ​ໃນ​ວັນ​ທີ 11 ​ເມສາ.