ຊາວຍີ່ປຸ່ນບໍ່ເຫັນພ້ອມຮັບຕ່າງປະເທດ ເຮັດວຽກໃນປະເທດເພີ່ມ

      ຜົນສຳ​ຫລວດ​ຂອງ​ສຳນັກງານ​ກຽວ​ໂຕ ລະບຸ​ວ່າ: ຊາວ​ຍີ່ປຸ່ນ 65,8% ບໍ່​ເຫັນ​ພ້ອມ​ທີ່​ສະພາ​ຜ່ານ​ຮ່າງ​ກົດໝາຍ​ຮັບ​ຊາວ​ຕ່າງປະ​ເທດ​ເຂົ້າມາ​ເຮັດ​ວຽກ​ເພີ່ມ​ຂຶ້ນນັບ​ແຕ່​ເດືອນ​ເມສາ​ປີໜ້າ.

      ຜົນສຳ​ຫລວດ​ທົ່ວ​ປະ​ເທດ ​ເຊິ່ງຈັດ​ຂຶ້ນ​ໃນ​​ໄລຍະ​ວັນ​ເສົາ ​ແລະ ວັນ​ອາທິດ ຜູ້​ຕອບ​​ແບບ​ສອບ​ຖາມ 24,8% ລະບຸ​ວ່າ: ພວກ​ເຂົາ​ສະໜັບສະ​ໜູນການ​ຜ່ານ​ຮ່າງ​ກົດໝາຍ​ທີ່​ຈະ​ເປີດ​ຮັບ​ແຮງ​ງານ​ຈາກ​ຕ່າງປະ​ເທດ 345.150 ຄົນ​ເຂົ້າມາ​ເຮັດ​ວຽກ​ໃນ​ຍີ່ປຸ່ນ ​ເພື່ອ​ແກ້​ໄຂ​ບັນຫາ​ແຮງ​ງານ​ຂາດ​ເຂີນ.

      ລັດຖະບານ​ຂອງ​ນາຍົກລັດຖະມົນຕີ ຊິນ​ໂຊ ອາ​ເບະ ​ໄດ້​ຜ່ານ​ຮ່າງ​ກົດໝາຍ​ດັ່ງກ່າວ​ຜ່ານ​ທາງ​ສະພາ​ຕໍ່າ​ໃນ​ທ້າຍ​ເດືອນ​ພຶດສະພາ​ຜ່ານ​ມາ, ​ເຖິງ​ວ່າ​ຈະ​ຖືກ​ວິຈານ​ຢ່າງ​ໜັກ ​ໂດຍ​ສະພາ​ສູງ​ມີ​ມະ​ຕິ​ຜ່ານ​ຮ່າງ​ກົດໝາຍ​ໃນ​ວັນ​ທີ 8 ທັນວານີ້.

      ​ເຖິງ​ຢ່າງ​ໃດ​ກໍ​ຕາມ, ຄະ​ແນນ​ນິຍົມ​ຂອງ​ຄະນະ​ລັດຖະບານ​ຂອງ​ທ່ານ ອາ​ເບະ ຫລຸດ​ລົງຢູ່​ລະດັບ 42,4% ຈາກ​ລະດັບ 47,3% ​ໃນ​ການ​​ສຳ​ຫລວດ​ຕົ້ນ​ເດືອນ​ພຶດສະພາ. ຂະນະ​ທີ່​ຄະ​ແນນ​ຄວາມ​ບໍ່​ນິຍົມ​ເພີ່ມ​ຂຶ້ນ 4,6 ຈຸດ ບັນລຸ 44,1%.