ມີຜູ້ເສຍຊີວິດແລ້ວ 1 ຄົນ ຈາກວິກິດການເມືອງຢູ່ສີລັງກາ

ຄວາມ​ຂັດ​ແຍ່ງ​ທາງ​ການ​ເມືອງ​ພາຍ​ໃນ​ສີ​ລັງ​ກາ ​ເຊິ່ງມີ​ສາ​ເຫດ​ຈາກ​ກໍລະນີ​ປະທານາທິບໍດີ​ໄລ່​ນາຍົກລັດຖະມົນຕີອອກຈາກຕຳ​ແໜ່​ງ ​ເລີ່​ມລຸກລາມ​ເປັນ​ການ​ປະ​ທະ​ກັນ​ ລະຫວ່າງ ຜູ້​ສະໜັບສະໜູນກຸ່ມ​ການ​ເມືອງ​ຕ່າງ​ຝ່າຍ ມີ​ຜູ້​ເສຍ​ຊີວິດ​ແລ້ວ 1 ຄົນ.

When Arjuna Ranatunga tried to enter his office at the state-run Ceylon Petroleum Corporation, his official security guard shot one and injured two othershttps://t.co/wELjqr4LgD

— The Indian Express (@IndianExpress) October 28, 2018

ສຳນັກ​ຂ່າວ​ຕ່າງປະ​ເທດ​ລາຍ​ງານ​​ວ່າ: ສຳນັກງານ​ຕຳຫລວດ​ນະຄອນຫລວງ​ໂກລຳ​ໂບລາຍ​ງານ​ໃນ​ວັນ​ທີ 28 ຕຸລາ​ວ່າ: ​ເກີດ​ເຫດ​ປະ​ທະລະຫວ່າງ​ປະຊາຊົນ​ກຸ່ມ​ໜຶ່ງ ກັບ​ເຈົ້າໜ້າ​ທີ່​ຮັກສາ​ຄວາມ​ປອດ​ໄພ​ຂອງ​ທ່ານ ອາ​ຈູ​ນາ ຣານາ​ຕຸ​ງຄະ ອະດີດ​ລັດຖະມົນຕີ​ກະຊວງ​ນ້ຳມັນ ​ເຊິ່ງ​ປະທານາທິບໍດີ ​ໄມຕຣີປາລະ ສິຣິ​ເສນາ ຫາ​ກໍ​ສັ່ງ​ໄລ່​ອອກ​ຈາກ​ຕຳ​ແໜ່​ງ ​ໂດຍ​ທ່ານ ຣານາ​ຕຸ​ງຄະ ພະຍາຍາມ​ເຂົ້າມາ​ບໍລິ​ເວນ​ສຳນັກງານ​ບໍລິສັດ ຊີ​ລອນ ປິ​ໂຕຣລ້ຽມ, ​ແຕ່​ຖືກ​ຝ່າຍ​ຕໍ່ຕ້ານ​ຂັດຂວາງ​ໄວ້ ​ແລະ ​ເຈົ້າໜ້າ​ທີ່​ຮັກສາ​ຄວາມປອດ​ໄພ​ຂອງ​ອະດີດ​ລັດຖະມົນຕີ​ຍິງ​ປືນ​ໃສ່​ຊາຍ​ໄວ 34 ປີ​ຄົນ​ໜຶ່ງ​ເສຍ​ຊີວິດ.

​​ເຫດການ​ດັ່ງກ່າວ​ຖື​ເປັນຄວາມ​ຮຸນ​ແຮງ​ທີ່​ເກີດ​ຂຶ້ນ​ເທື່ອ​ທຳ​ອິດ ທ່າມກາງ​ວິ​ກິດ​ລັດຖະທຳ​ມະນູນ​ຄັ້ງ​ໃໝ່​ຂອງ​ສີ​ລັງ​ກາ ຈາກ​ກໍລະນີ​ທີ່​ທ່ານ ສິຣິ​ເສນາ ​ໄລ່​ທ່ານ ຣານິລ ວິ​ກຳ​ສິງ​ເຫ ອອກ​ຈາກ​ຕຳ​ແໜ່​ງນາຍົກລັດຖະມົນຕີ ພ້ອມ​ຄະນະ​ລັດຖະບານທັງ​ໝົດ ​ໃນ​ອາທິດ​ຜ່ານ​ມາ ​ໂດຍ​ແຕ່ງຕັ້ງອະດີດ​ປະທານາທິບໍດີ ມະຫິ​ນທາ ຣາປັກສາ ​ໃຫ້​ດຳລົງ​ຕຳ​ແໜ່​ງນາຍົກລັດຖະມົນຕີຄົນ​ໃໝ່.

​ເຖິງ​ຢ່າງ​ໃດ​ກໍ​ຕາມ, ທ່ານ ວິ​ກຳ​ສິງ​ເຫ ຢືນຢັນ​ວ່າ: ຍັງ​ຄົງ​ເປັນ​ນາຍົກລັດຖະມົນຕີ “ຕາມ​ກົດໝາຍ” ​ແລະ ພັກ​ແນວ​ຮ່ວມ​ແຫ່ງ​ຊາດ (UNP) ຂອງ​ທ່ານ ​ເຊິ່ງ​ເປັນ​ສ່ວນ​ໜຶ່ງ​ຂອງ​ແນວ​ຮ່ວມ​ແຫ່ງ​ຊາດ​ເພື່ອ​ທຳ​ມາ​ພິບານ (UNFGG). ສ່ວນ​ທ່ານ ກາຣູ ຈາ​ຍະ​ສຸຣິຍາ ປະທານ​ສະພາ​ຜູ້​ແທນ​ລາຊະ​ດອນ ປະກາດ​ຮັບຮອງ​ທ່ານ ວິ​ກຳ​ສິງ​ເຫ ​ໃນ​ຖານະ​ນາຍົກລັດຖະມົນຕີ, ​ແຕ່​ທ່ານ ຣາປັກສາ ປະກາດ​ວ່າ: ທ່ານ​ຈະ​ຈັດຕັ້ງ “ລັດຖະບານ​ສະ​ເພາະ​ການ”.