ທ່ານ ກິມ ຈ໋ອງອຸນ ຜູ້ນຳສູງສຸດ ສປປ ເກົາຫລີ ພົບປະເຈລະຈາກັບ ປະທານາທິບໍດີ ສ.ເກົາຫລີ
ຂ່າວສານສູນກາງເກົາຫລີແຈ້ງຂ່າວໃນວັນທີ 27 ເມສານີ້ວ່າ: ຕອນເຊົ້າວັນທີ 27 ເມສານີ້, ທ່ານ ກິມ ຈ໋ອງອຸນ ຜູ້ນຳສູງສຸດ ສປປ ເກົາຫລີ ໄດ້ເດີນທາງຜ່ານຊາຍແດນປານມູນຈອມ ເພື່ອເລີ່ມຈັດການເຈລະຈາກັບທ່ານ ມູນ ແຈອິນ ປະທານາທິບໍດີ ສ.ເກົາຫລີ ຢ່າງເປັນທາງການແລ້ວ.
ທ່ານ ກິມ ຈ໋ອງອຸນ ກາຍເປັນຜູ້ນຳ ສປປ ເກົາຫລີ ຄົນທຳອິດທີ່ຢ່ວງບາດກ້າວລົງແຜ່ນດິນ ສ.ເກົາຫລີ ນັບແຕ່ສົງຄາມເກົາຫລີ ລະຫວ່າງປີ 1950-1953. ໃນຂະນະທີ່ຈັບມືກັນນັ້ນ ໂດຍບໍ່ມີການວາງແຜນໄວ້ລ່ວງໜ້າ ທ່ານ ກິມ ຈ໋ອງອຸນ ໄດ້ເຊີນປະທານາທິບໍດີ ມຸນ ແຈອິນ ໃຫ້ຍ່າງຂ້າມເສັ້ນແບ່ງເຂດແດນໄປດິນແດນ ສປປ ເກົາຫລີ ເປັນໄລຍະເວລາສັ້ນໆ ກ່ອນທີ່ຜູ້ນຳທັງສອງຈະຍ່າງກັບໄປດິນແດນ ສ.ເກົາຫລີ ໂດຍຍັງຈັບມືກັນ.
ຫລັງຈາກກວດແຖວທະຫານກອງກຽດຕິຍົດຮ່ວມກັນແລ້ວ, ທ່ານ ກິມ ຈ໋ອງອຸນ ຢຸດແວ່ລົງນາມໃນປຶ້ມຢ້ຽມຢາມ ທີ່ອາຄານສັນຕິພາບ ເຊິ່ງຕັ້ງຢູ່ໃນເຂດ ສ.ເກົາຫລີ ໂດຍທ່ານຂຽນຂໍ້ຄວາມວ່າ: “ປະຫວັດສາດໜ້າໃໝ່ໄດ້ເລີ່ມຕົ້ນຂຶ້ນແລ້ວ ເປັນຍຸກແຫ່ງສັນຕິພາບ ຈາກຈຸດເລີ່ມຕົ້ນຂອງປະຫວັດສາດ”. ປະທານາທິບໍດີ ມຸນ ແຈອິນ ແລະ ທ່ານ ກິມ ຈ໋ອງອຸນ ຈະຫາລືໃນເລື່ອງການເຮັດໃຫ້ແຫລມເກົາຫລີປອດຈາກອາວຸດນິວເຄຼຍ ແລະ ການແລກປ່ຽນລະຫວ່າງສອງເກົາຫລີ. ຈາກນັ້ນຈະມີການປູກຕົ້ນໄມ້ທີ່ລະນຶກຮ່ວມກັນ ຢູ່ບໍລິເວນບ້ານປານມູນຈອມ.
https://www.facebook.com/kbsnews/videos/1841382425920728/
ສ່ວນທຳນຽບຂາວຂອງອາເມລິກາ ອອກຖະແຫລງການສະແດງຄວາມຫວັງວ່າ: ກອງປະຊຸມສຸດຍອດຜູ້ນຳສອງເກົາຫລີໃນຄັ້ງນີ້ຈະປະສົບຜົນສຳເລັດໃນການນຳໄປສູ່ສັນຕິພາບ ແລະ ຄວາມມັ່ງຄັ່ງຢູ່ແຫລມເກົາຫລີໃນອະນາຄົດ. ນອກຈາກນີ້ ຍັງລະບຸວ່າ: ອາເມລິກາລໍຄອຍທີ່ຈະໄດ້ເຫັນກອງປະຊຸມສຸດຍອດລະຫວ່າງຜູ້ນຳ ສປປ ເກົາຫລີ ກັບ ປະທານາທິບໍດີ ໂດນັນ ທຣຳ ຂອງອາເມລິກາ ໃນມໍ່ໆນີ້.
https://www.facebook.com/kbsnews/videos/1841400099252294/
