ທ່ານ ໂດນັລ ທຣຳ ກຽມເດີນທາງຮ່ວມກອງປະຊຸມສຸດຍອດອາຊຽນທີ່ມາເລເຊຍ ເລັ່ງຟື້ນຟູສາຍພົວພັນ ສະຫະລັດ-ອາຊີ

ສຳນັກຂ່າວ Reuters ລາຍງານວັນທີ 25 ຕຸລາ 2025 ວ່າ: ປະທານາທິບໍດີ ໂດນັລ ທຣຳ ແຫ່ງສະຫະລັດອາເມລິກາ ໄດ້ກຽມເດີນທາງໄປນະຄອນຫລວງກົວລາລຳເປີ ປະເທດມາເລເຊຍ ເພື່ອເຂົ້າຮ່ວມກອງປະຊຸມສຸດຍອດອາຊຽນ (ASEAN Summit) ໃນລະຫວ່າງວັນທີ 26–28 ຕຸລາ 2025 ນີ້. ກອງປະຊຸມຈະມີການນຳຈາກ 10 ປະເທດສະມາຊິກອາຊຽນ ແລະ ບັນດາຄູ່ຮ່ວມເຈລະຈາຫລັກເຂົ້າຮ່ວມ.

ການຢ້ຽມຢາມຄັ້ງນີ້ຖືເປັນການເດີນທາງຢ້ຽມຢາມອາຊີຄັ້ງທຳອິດຂອງ ທ່ານ ທຣຳ ໃນວາລະດຳລົງຕຳແໜ່ງໃໝ່ ແລະ ເປັນສັນຍານທີ່ຊີ້ໃຫ້ເຫັນວ່າ ສະຫະລັດ ຕ້ອງການ ຟື້ນຟູພາລະບົດບາດ ໃນພາກພື້ນອາຊີ-ປາຊີຟິກ ພາຍຫລັງທີ່ສາຍພົວພັນກັບຫລາຍປະເທດໃນພາກພື້ນເລີ່ມຫລຸດລົງໃນໄລຍະທີ່ຜ່ານມາ.

ເຈົ້າໜ້າທີ່ທຳນຽບຂາວເປີດເຜີຍວ່າ: ທ່ານ ທຣຳ ຈະໃຊ້ໂອກາດນີ້ໃນການຫາລືສອງຝ່າຍກັບຜູ້ນຳຫລາຍປະເທດໃນອາຊຽນ ລວມທັງຜູ້ນຳຂອງ ອິນໂດເນເຊຍ, ຟີລິບປິນ ແລະ ໄທ, ເພື່ອເພີ່ມທະວີການຮ່ວມມືດ້ານເສດຖະກິດ ແລະ ຄວາມໝັ້ນຄົງ. ພ້ອມກັນນີ້, ຍັງໄດ້ເນັ້ນຢໍ້າເຖິງ “ຍຸດທະສາດອິນໂດ-ປາຊີຟິກ ເສລີ ແລະ ເປີດກວ້າງ” (Free and Open Indo-Pacific) ທີ່ສະຫະລັດ ຕ້ອງການຊຸກຍູ້ໃຫ້ເປັນການຮ່ວມມືຫລັກໃນພາກພື້ນ.

ກອງປະຊຸມຄັ້ງນີ້ເກີດຂຶ້ນໃນໄລຍະທີ່ພາກພື້ນອາຊີຕາເວັນອອກສຽງໃຕ້ ກຳລັງປະເຊີນກັບແຮງກົດດັນຈາກການແຂ່ງຂັນລະຫວ່າງ ຈີນ ແລະ ສະຫະລັດ ທັງໃນດ້ານເສດຖະກິດ, ເຕັກໂນໂລຊີ ແລະ ຄວາມໝັ້ນຄົງໃນທະເລຈີນໃຕ້. ມາເລເຊຍ ໃນຖານະປະເທດເຈົ້າພາບ ໄດ້ຢືນຢັນວ່າຈະຮັກສາພາລະບົດບາດເປັນ “ຕົວແທນທີ່ເປັນກາງ” ແລະ ເປີດພື້ນທີ່ໃຫ້ທຸກປະເທດໄດ້ຫາລືຢ່າງເທົ່າທຽມກັນ.

ນອກຈາກນີ້, ຍັງມີລາຍງານວ່າ ທ່ານ ທຣຳ ອາດຈະໃຊ້ເວທີອາຊຽນນີ້ ເພື່ອຫາລືກ່ຽວກັບປະເດັນ ຂໍ້ຕົກລົງຢຸດຍິງຊາຍແດນໄທ–ກຳປູເຈຍ ລວມທັງການຮ່ວມມືທາງດ້ານເສດຖະກິດລະດັບພາກພື້ນ ເຊິ່ງລວມເຖິງການລົງທຶນດ້ານ ໂຄງສ້າງພື້ນຖານ ແລະ ພະລັງງານສະອາດ ໃນອາຊີຕາເວັນອອກສຽງໃຕ້.