ນາງ ທາຄາອິຈິ ດຳລົງຕໍາແໜ່ງນາຍົກລັດຖະມົນຕີຜູ້ຍິງຄົນທໍາອິດຂອງຍີ່ປຸ່ນ ຫລັງພັກ LDP ດຶງຝ່າຍຄ້ານ ຮ່ວມລັດຖະບານໄດ້ສໍາເລັດ
ທ່ານ ນາງ ຊານາເອະ ທາຄາອິຈິ ຫົວໜ້າພັກເສລີປະຊາທິປະໄຕຍີ່ປຸ່ນ (Liberal Democratic Party: LDP) ຂຶ້ນເປັນຜູ້ນໍາຍີ່ປຸ່ນຄົນທີ 104 ຕໍ່ຈາກທ່ານ ຊິເງຣຸ ອິຊິບະ ຫລັງລັດຖະສະພາໄດເອັດລົງຄະແນນໂຫວດຊະນະຂາດນັບແຕ່ຮອບທໍາອິດ ເຮັດໃຫ້ນາງກາຍເປັນນາຍົກລັດຖະມົນຕີຜູ້ຍິງຄົນທໍາອິດໃນປະຫວັດສາດ.
ວັນທີ 21 ຕຸລາ 2025, ລັດຖະສະພາໄດເອັດເປີດປະຊຸມສະພາສະໄໝວິສາມັນ ເພື່ອເລືອກນາຍົກລັດຖະມົນຕີຄົນໃໝ່ຕໍ່ຈາກທ່ານ ຊິເງຣຸ ອິຊິບະ ທີ່ລາອອກຈາກຕໍາແໜ່ງໃນເດືອນກັນຍາຜ່ານມາ ໂດຍນາງ ທາຄາອິຈິ ໄດ້ຮັບເລືອກດ້ວຍຄະແນນສຽງສ່ວນຫລາຍເຖິງ 237 ສຽງ ເອົາຊະນະທ່ານ ໂຍຊິຮິໂກະ ໂນດະ (Yoshihiko Noda) ຈາກພັກປະຊາທິປະໄຕແຫ່ງລັດຖະທໍາມະນູນຍີ່ປຸ່ນ (Constitutional Democratic Party of Japan: CDP).
ເຖິງວ່າຈະມີອຸປະສັກລະຫວ່າງການຈັດຕັ້ງລັດຖະບານຊຸດໃໝ່ ຫລັງພັກໂຄເມ (Komeito) ພັນທະມິດພັກຮ່ວມທີ່ຢູ່ຄູ່ພັກ LDP ມາປະມານ 25 ປີ ຖອນຕົວສາຍຟ້າແລບ ເນື່ອງຈາກບໍ່ພໍໃຈແນວຂວາຈັດຂອງນາງ ທາຄາອິຈິ ທີ່ກົງກັນຂ້າມກັບອຸດົມການກາງຊ້າຍຂອງພັກ, ແຕ່ພັກ LDP ກໍໄດ້ແກ້ໄຂສະຖານະການດ້ວຍການເຊີນພັກຝ່າຍຄ້ານ ຄືພັກນິບປອນອິຊິນ (Nippon Ishin) ເຂົ້າຮ່ວມລັດຖະບານ ເຊິ່ງມີການຍື່ນຂໍ້ຕົກລົງແລກປ່ຽນຮ່ວມຕົງກັນເຊັ່ນ: ການຫລຸດຈໍານວນສະມາຊິກສະພາໄດເອັດ 10% ຫລື ການຍົກເລີກການບໍລິຈາກເງິນໃຫ້ພັກການເມືອງ.
ເຖິງຢ່າງໃດກໍຕາມ, ອະນາຄົດທາງການເມືອງຂອງພັກ LDP ຍັງບໍ່ແນ່ນອນ ເພາະຍັງເປັນລັດຖະບານສຽງສ່ວນຫລາຍ ໂດຍໄດ້ຮັບສຽງສະໜັບສະໜູນພຽງ 231 ສຽງ ເຊິ່ງຂາດອີກ 2 ສຽງ ຈຶ່ງຈະຄອງສຽງສ່ວນຫລາຍໃນລັດຖະສະພາຈາກ 465 ສຽງ.
ນາງ ທາຄາອິຈິ ຈະດໍາລົງຕໍາແໜ່ງຢ່າງເປັນທາງການ ຫລັງເຂົ້າພົບຈັກກະພັດ ດິນາຣູຮິໂຕະ (Naruhito) ໂດຍມີໜຶ່ງໃນພາລະກິດສໍາຄັນລໍຖ້າຄື: ການຕ້ອນຮັບທ່ານ ໂດນັລ ທຣໍາ ຜູ້ນໍາອາເມລິກາ ທີ່ມາຢ້ຽມຢາມຍີ່ປຸ່ນໃນວັນທີ 27-29 ຕຸລາ 2025.
ປັດຈຸບັນ, ພັກ LDP ຄອງບ່ອນນັ່ງຫລາຍທີ່ສຸດໃນສະພາ 196 ບ່ອນນັ່ງ, ຮອງລົງມາແມ່ນພັກ CDP 148 ບ່ອນນັ່ງ ແລະ ພັກນິບປອນອິຊິນ 35 ສຽງ.
ອ້າງອີງ:
- https://www.asahi.com/ajw/articles/16103056
- https://www.nippon.com/en/news/yjj2025101400684/japan-to-elect-new-prime-minister-on-oct-21.html
- https://www.france24.com/en/live-news/20251021-china-hawk-takaichi-set-to-be-japan-s-first-woman-pm
- https://www.reuters.com/world/japan-live-parliament-set-elect-sanae-takaichi-first-female-pm-after-coalition-2025-10-21/
- https://www.japantimes.co.jp/news/2025/10/21/japan/politics/sanae-takaichi-elected-prime-minister/
