ກຸ່ມຮາມັດປ່ອຍຕົວປະກັນທັງໝົດ ແລກກັບຜູ້ຕ້ອງຫາຊາວປາແລັສຕິນ ຕາມແຜນສັນຕິພາບໄລຍະທໍາອິດ
ກຸ່ມຮາມັດເລີ່ມທະຍອຍປ່ອຍຕົວປະກັນທັງໝົດ ແລກປ່ຽນກັບຜູ້ຕ້ອງຫາຊາວປາແລັສຕິນທີ່ຖືກກັກຂັງໂດຍທາງການອິດສະລາແອນ ຕາມແຜນສັນຕິພາບໄລຍະທໍາອິດຂອງທ່ານ ໂດນັລ ທຣໍາ ໂດຍລົດຂອງຄະນະກໍາມະການກາຊາດສາກົນ (ICRC) ຈະເປັນຜູ້ຮັບຕົວປະກັນ ກ່ອນຈະສົ່ງມອບໃຫ້ໜ່ວຍກອງທັບປ້ອງກັນອິດສະລາແອນ (IDF) ທີ່ໄດ້ຮັບມອບໝາຍພິເສດ.
ຫລັງຈາກນັ້ນໜ່ວຍນີ້ຈະນໍາເອົາຕົວປະກັນໄປຖານທັບຣີອິມ (Re’im Military Base) ໃນຕອນໃຕ້ຂອງອິດສະລາແອນ. ຂະນະທີ່ຄອບຄົວຂອງຕົວປະກັນຈະລໍຖ້າຮັບຢູ່ຈຸດນັດຮັບ ຈາກນັ້ນພວກເຂົາຈະເດີນທາງດ້ວຍເຮລິກົບແຕໄປໂຮງໝໍເພື່ອຮັບການປິ່ນປົວຕໍ່ໄປ. ໃນກໍລະນີທີ່ຕ້ອງການປິ່ນປົວຢ່າງຮີບດ່ວນ ການອົບພະຍົບຈະໄປໂຮງພະຍາຍາມໂດຍບໍ່ແວ່ພັກຢູ່ຈຸດຮັບ.
ເບື້ອງຕົ້ນ, ກອງກໍາລັງ IDF ຢືນຢັນວ່າ: ຕົວປະກັນກຸ່ມທໍາອິດ 7 ຄົນ ໄດ້ເດີນທາງອອກຈາກເຂດກາຊາຂ້າມມາຊາຍແດນດ້ານອະທິປະໄຕຂອງອິດສະລາແອນແລ້ວ. ຂະນະທີ່ທ່ານ ທຣໍາ ເດີນທາງເຖິງສະໜາມບິນເບນກູຣຽນໃນອິດສະລາແອນແລ້ວ.
ສ່ວນອິດສະລາແອນກຽມພ້ອມສົ່ງຜູ້ຕ້ອງຫາຊາວປາແລັສຕິນກັບໄປເຂດກາຊາ ທ່າມກາງການເຝົ້າຕິດຕາມສະຖານະການຂອງພົນລະເມືອງທັງສອງຝ່າຍ ລວມທັງບັນດາຜູ້ນໍາໂລກທີ່ເດີນທາງໄປເຂົ້າຮ່ວມກອງປະຊຸມສຸດຍອດວ່າດ້ວຍສັນຕິພາບຢູ່ກາຊາ (Gaza Peace Summit) ຢູ່ອີຢິບໃນວັນນີ້.
ອ້າງອີງ:
- https://www.aljazeera.com/news/liveblog/2025/10/13/live-israel-hamas-set-to-free-captives-trump-says-gaza-war-is-over
- https://www.bbc.com/news/live/cx2r2z0gyp7t
- https://www.theguardian.com/world/live/2025/oct/13/gaza-ceasefire-live-updates-israel-hostages-release-hamas-trump-middle-east
