ສິງກະໂປຍັງຄອງແຊ້ມປະເທດທີ່ປອດໄພທີ່ສຸດໃນໂລກ 12 ປີຊ້ອນ ສ່ວນລາວຢູ່ໃນລະດັບຄວາມປອດໄພປານກາງ
ວັນທີ 20 ກັນຍາ 2025 – ບົດລາຍງານ Gallup Global Safety Report 2025 ໄດ້ເປີດເຜີຍຜົນສຳຫຼວດຄວາມຮູ້ສຶກດ້ານຄວາມປອດໄພຂອງປະຊາຊົນໃນ 144 ປະເທດທົ່ວໂລກ. ບົດລາຍງານພົບວ່າ ສິງກະໂປ ຍັງຄົງຄອງແຊ້ມເປັນປະເທດທີ່ປະຊາຊົນຮູ້ສຶກປອດໄພທີ່ສຸດໃນໂລກ ເປັນຄັ້ງທີ 12 ຕິດຕໍ່ກັນ, ໂດຍ 98% ຂອງຊາວສິງກະໂປລະບຸວ່າຮູ້ສຶກປອດໄພເມື່ອຍ່າງຄົນດຽວໃນຊ່ວງກາງຄືນ.
ອັນດັບຕໍ່ມາແມ່ນ: ທາຈິກິສະຖານ (95%), ຈີນ (94%), ໂອມານ (94%) ແລະ ຊາອຸດີອາຣາເບຍ ເຊິ່ງລ້ວນແຕ່ຢູ່ໃນລະດັບສູງກວ່າຄ່າສະເລ່ຍຂອງໂລກທີ່ 73%.
ສຳລັບ ປະເທດລາວ, ເຖິງແມ່ນຈະບໍ່ມີການເປີດເຜີຍຕົວເລກຢ່າງເປັນທາງການໃນບົດລາຍງານ, ແຕ່ຂໍ້ມູນຈາກ TravelSafe Abroad ລະບຸວ່າ ລາວຖືກຈັດຢູ່ໃນປະເພດປະເທດທີ່ມີ ຄວາມປອດໄພໂດຍລວມໃນລະດັບປານກາງ (medium risk). ນັກທ່ອງທ່ຽວສາມາດເດີນທາງໄດ້ຢ່າງປອດໄພໃນຕົວເມືອງໃຫຍ່ ແຕ່ຍັງມີຄວາມສ່ຽງຈາກການລັກຂະໂມຍເລັກນ້ອຍ, ສະພາບເສັ້ນທາງແລະການຄົມມະນາຄົມທີ່ຍັງບໍ່ທັນໄດ້ມາດຕະຖານ ລວມທັງໄພທີ່ແຝງມາຈາກ ລະເບີດທີ່ຍັງບໍ່ທັນແຕກ (UXO) ໃນບາງພື້ນທີ່ຊົນນະບົດເຊິ່ງຍັງຄົງເປັນອັນຕະລາຍ.
ນັກວິເຄາະຊີ້ວ່າ: ສິງກະໂປຍັງຄົງໄດ້ປຽບດ້ານການບັງຄັບໃຊ້ກົດໝາຍຢ່າງເຂັ້ມງວດແລະອັດຕາການເກີດອາດຊະຍາກຳຕໍ່າ, ເຮັດໃຫ້ສາມາດຄອງອັນດັບສູງສຸດຢ່າງຕໍ່ເນື່ອງ. ໃນຂະນະດຽວກັນ, ບັນດາປະເທດອື່ນໆໃນອາຊີຕາເວັນອອກສຽງໃຕ້ ລວມທັງປະເທດລາວ, ຍັງຕ້ອງປະເຊີນກັບສິ່ງທ້າທາຍດ້ານຄວາມປອດໄພແລະໂຄງສ້າງພື້ນຖານທີ່ແຕກຕ່າງກັນໄປ.
ບົດລາຍງານສະບັບນີ້ໄດ້ເກັບກຳຂໍ້ມູນຈາກຜູ້ໃຫຍ່ຫຼາຍກວ່າ 145,000 ຄົນ ໃນ 144 ປະເທດ ແລະ ເຂດແຄວ້ນທົ່ວໂລກ, ຖືເປັນໜຶ່ງໃນການສຳຫຼວດດ້ານຄວາມປອດໄພທີ່ໃຫຍ່ທີ່ສຸດຂອງໂລກ.
