ກຳປູເຈຍຄາດປີນີ້ອຸດສາຫະກຳທ່ອງທ່ຽວ ຮັບນັກທ່ອງທ່ຽວຕ່າງຊາດຢ່າງໜ້ອຍ 6 ລ້ານຄົນ
ກຳປູເຈຍຄາດວ່າ ປີນີ້ອຸດສາຫະກຳການທ່ອງທ່ຽວຈະຂະຫຍາຍຕົວຢ່າງຕໍ່ເນື່ອງ ຫລັງຈາກປີຜ່ານມາມີນັກທ່ອງທ່ຽວເພີ່ມຂຶ້ນເປັນປະຫວັດສາດ.
ຈາກການສຳຫລວດພົບວ່າ: ສະເພາະ 10 ເດືອນທຳອິດຂອງປີ 2017 ກຳປູເຈຍຮັບນັກທ່ອງທ່ຽວເກືອບ 5 ລ້ານຄົນ ເພີ່ມຂຶ້ນ 10% ຈາກໄລຍະດຽວກັນຂອງປີ 2016 ກຸ່ມນັກທ່ອງທ່ຽວທີ່ມີສ່ວນຊຸກຍູ້ໃຫ້ອຸດສາຫະກຳທ່ອງທ່ຽວກຳປູເຈຍເຕີບໃຫຍ່ຫລາຍທີ່ສຸດ ຄືນັກທ່ອງທ່ຽວຈາກຈີນ ໂດຍໃນປີຜ່ານມາ ມີຊາວຈີນເດີນທາງທ່ອງທ່ຽວໃນກຳປູເຈຍ 1 ລ້ານຄົນ ເພີ່ມຂຶ້ນ 45% ພາຍໃນປີດຽວ.
ທ່ານ ເມນ ພິຣົມ ຜູ້ອຳນວຍການສຳນັກວາງແຜນ ສັງກັດກະຊວງການທ່ອງທ່ຽວກຳປູເຈຍ ຄາດວ່າ: ປີນີ້ ອຸດສາຫະກຳການທ່ອງທ່ຽວກຳປູເຈຍຈະເຕີບໃຫຍ່ຕໍ່ເນື່ອງ ໂດຍຈະມີນັກທ່ອງທ່ຽວຕ່າງປະເທດເຂົ້າກຳປູເຈຍຢ່າງໜ້ອຍ 6 ລ້ານຄົນ ສ້າງລາຍຮັບເຂົ້າປະເທດໄດ້ຕາມເປົ້າໝາຍ 4.000 ລ້ານໂດລາສະຫະລັດ. ຂະນະດຽວກັນກໍຄາດວ່າ: ຈະຮອງຮັບນັກທ່ອງທ່ຽວພາຍໃນປະເທດໄດ້ 15 ລ້ານຄົນ. ທັງນີ້ ກຳປູເຈຍວາງແຜນຈະເພີ່ມຖ້ຽວບິນ ເພື່ອອຳນວຍຄວາມສະດວກ ແລະ ດຶງດູດນັກທ່ອງທ່ຽວໃຫ້ເພີ່ມຂຶ້ນທຸກປີ, ແຕ່ສິ່ງທີ່ລັດຖະບານຈຳເປັນຕ້ອງດຳເນີນການ ຄືວາງມາດຕະການຮັກສາຄວາມໝັ້ນຄົງປອດໄພ ໂດຍຍັງເພີ່ມຖ້ຽວບິນໂດຍກົງເຂົ້າກຳປູເຈຍ ແລະ ປັບປຸງໂຄງລ່າງພື້ນຖານພາຍໃນປະເທດໃຫ້ດີຂຶ້ນ.
ກ່ອນໜ້ານີ້, ນັກທ່ອງທ່ຽວຕ່າງປະເທດ 5 ອັນດັບທຳອິດທີ່ເດີນທາງມາທ່ຽວກຳປູເຈຍ ຄືປະເທດຈາກຕາເວັນຕົກ ໄດ້ແກ່ອາເມລິກາ, ຝຣັ່ງ, ອັງກິດ, ແຕ່ປັດຈຸບັນ ນັກທ່ອງທ່ຽວຈາກອາຊີເຂົ້າມາທ່ຽວກຳປູເຈຍຫລາຍຂຶ້ນ ໄດ້ແກ່ຈີນ, ຫວຽດນາມ, ລາວ, ສ.ເກົາຫລີ ແລະ ໄທ.
