ເມືອງໄຊຍະບູລີ ກວດພົບສິນຄ້າໝົດອາຍຸ ແລະ ອາຫານທະເລມີສານເຈືອປົນ

ຖວທ ເມືອງໄຊຍະບູລີ ລາຍງານວັນທີ 1 ກໍລະກົດ 2025 ນີ້ວ່າ: ທ່ານ ນາງ ທອງສະໝຸດ ອຸໄລສອນ ຮອງຫົວໜ້າ ຫ້ອງການອຸດສາຫະກຳ ແລະ ການຄ້າ ເມືອງ​ໄຊຍະບູລີ​ ແຂວງໄຊຍະບູລີ ພ້ອມດ້ວຍຄະນະກຳມະການກວດກາສິນຄ້າໝົດອາຍຸ ແລະ ສິນຄ້າເກືອດຫ້າມຂັ້ນເມືອງ ລົງຕິດຕາມກວດກາສິນຄ້າໝົດອາຍຸ, ສິນຄ້ານອກລະບົບ, ສິນຄ້າເກືອດຫ້າມຢູ່ບັນດາຮ້ານຂາຍຍົກ-ຂາຍຍ່ອຍ ແລະ ຕະຫລາດພາຍໃນເມືອງໄຊຍະບູລີ.

ຜ່ານການກວດກາທັງໝົດ 36 ຮ້ານ, ກວດພົບສິນຄ້າໝົດອາຍຸ 5 ຮ້ານ, ສິນຄ້າເກືອດຫ້າມ 2 ຮ້ານ, ອາຫານທະເລທີ່ມີສິນຄ້າເຈືອປົນ 2 ຮ້ານ ໃນນັ້ນມີ: ຢາສີຟັນຄອນເກດ, ແປ້ງເດັກ, ສີຍ້ອມຜົມ, ຄຣີມດອກກຸຫລາບ(ທີ່ປອມແປງ), ເຂົ້າໝົມ, ສະບູ່, ແຊມພູ, ແກ່ນຕາເວັນ, ນໍ້າໝາກນາວ, ໝີ່ຈີນ, ກາເຟ, ຢາສູບ, ຢາປົວພະຍາດ, ຍໍ່ຂາວ, ປາເມິກ ລວມທັງໝົດ 16 ລາຍການ ເປັນມູນຄ່າ 8,110,000 ກີບ. ສິນຄ້າທັງໝົດນີ້ໄດ້ຖືກທໍາລາຍດ້ວຍການຈູດໄຟ ແລະ ຂຸດຂຸມຝັງຕາມລະບຽບການ.