ຄະນະຜູ້ແທນກົມພົວພັນຕ່າງປະເທດ ກະຊວງປ້ອງກັນປະເທດ ຢ້ຽມຢາມ ແລະ ເຮັດວຽກ ຢູ່ຣາຊະອານາຈັກກໍາປູເຈຍ

ວັນທີ 26-29 ມິຖຸນາ 2025 ທ່ານ ພັນເອກ ວົງໄຊ ອິນຖະຄໍາ ຫົວໜ້າກົມພົວພັນຕ່າງປະເທດ ຫ້ອງວ່າການ ກະຊວງປ້ອງກັນປະເທດ ນຳພາຄະນະຜູ້ແທນກົມພົວພັນຕ່າງປະເທດ ຫ້ອງວ່າການ ກະຊວງປ້ອງກັນປະເທດ ເດີນທາງໄປຢ້ຽມຢາມ ແລະ ເຮັດວຽກຢູ່ ຣາຊະອານາຈັກກໍາປູເຈຍ.

ໃນການຢ້ຽມຢາມ ແລະ ເຮັດວຽກຢູ່ຄັ້ງນີ້ ໄດ້ພົບປະສອງຝ່າຍກັບກົມພົວພັນຕ່າງປະເທດ, ກະຊວງປ້ອງກັນປະເທດ ຣາຊະອານາຈັກກໍາປູເຈຍ ນໍາໂດຍທ່ານ ພົນໂທ​ ພາດ ວິບົນໂສະເພັຍ ຮອງຫົວໜ້າກົມໃຫຍ່ນະໂຍບາຍ ແລະ ວຽກງານການຕ່າງປະເທດ, ຫົວໜ້າກົມພົວພັນຕ່າງປະເທດ. ໃນການພົບປະ ທັງສອງຝ່າຍ ໄດ້ຕີລາຄາຄືນວຽກງານການພົວພັນຮ່ວມມື ທີ່ສາມາດຈັດຕັ້ງປະຕິບັດ ໃນໄລຍະປີ 2024 ແລະ 6 ເດືອນຕົ້ນປີ 2025 ແລະ ສືບຕໍ່ປຶກສາຫາລືຈັດຕັ້ງແຜນການຮ່ວມມືໃນໄລຍະ 6 ເດືອນ ທ້າຍປີ 2025 ແລະ ປີ 2026

ນອກຈາກນີ້, ຄະນະກົມພົວພັນຕ່າງປະເທດ ໄດ້ເຂົ້າຢ້ຽມຂໍ່ານັບທ່ານ ພົນໂທ ຂຽວ ເຊນ ຮອງລັດຖະມົນຕີກະຊວງປ້ອງກັນປະເທດ ແຫ່ງ ຣາຊະອານາຈັກກໍາປູເຈຍ ເຊິ່ງ ທ່ານ ພັນເອກ ວົງໄຊ ອິນຖະຄໍາ ໄດ້ນໍາເອົາຄວາມຢື້ຢາມຖາມຂ່າວຈາກຄະນະນໍາກະຊວງປ້ອງກັນປະເທດ ແຫ່ງ ສປປລ ລາວ ຝາກເຖິງທ່ານຮອງລັດຖະມົນຕີກະຊວງປ້ອງກັນປະເທດ ກໍຄືຄະນະນໍາກະຊວງປ້ອງກັນປະເທດ ແຫ່ງ ຣາຊະອານາຈັກກໍາປູເຈຍ ແລະ ໄດ້ລາຍງານຜົນຂອງການເຮັດວຽກພົບປະສອງຝ່າຍ ລະຫວ່າງ ກົມພົວພັນຕ່າງປະເທດກະຊວງປ້ອງກັນປະເທດ ລາວ-ກໍາປູເຈຍ ຄັ້ງນີ້ ທີ່ສໍາເລັດດ້ວຍຄວາມຈົບງາມ. ນອກນີ້, ຄະນະຍັງໄດ້ຢ້ຽມຢາມບາງສະຖານທີ່ທ່ຽວທ່ຽວທາງປະຫວັດສາດສໍາຄັນຂອງກໍາປູເຈຍ ຕື່ມອີກ.

ການຢ້ຽມຢາມ ແລະ ເຮັດວຽກຢ່າງເປັນທາງການຢູ່ຣາຊະອານາຈັກກໍາປູເຈຍ ຂອງຄະນະຜູ້ແທນກົມພົວພັນຕ່າງປະເທດ ຫ້ອງວ່າການ ກະຊວງປ້ອງກັນປະເທດ ຄັ້ງນີ້ ເປັນການຮັດແໜ້ນເສີມຂະຫຍາຍສາຍພົວພັນການຮ່ວມມື ລະຫວ່າງກົມພົວພັນຕ່າງປະເທດກະຊວງປ້ອງກັນປະເທດ ລາວ-ກໍາປູເຈຍ ທີ່ມີມາແຕ່ດົນນານໃຫ້ນັບມື້ແໜ້ນແຟ້ນກວ່າເກົ່າ.