ໂຣເບິດສັນ ຊະນະ ເກົາ ຄວ້າແຊ້ມ ສະກອດຕິຊໂອເພັນ

ນີລ ​ໂຣ​ເບິດ​ສັນ ກວາດ 5 ​ເຟມສຸດ​ທ້າຍ ຊະນະ ​ເກົາ ຍູ່ ​ເຝິງ 9-8 ​ເຟມ ຄວ້າ​ແຊ້ມສະນຸກ​ເກີ ສະ​ກອດ​ຕິ​ຊ ​ໂອ​ເພັນ ​ໄປ​ຄອງ​ແບບ​ສຸດ​ລະ​ທຶກ.

ການ​ແຂ່ງຂັນ​ສະນຸກ​ເກີ ລາຍການ​ສະ​ສົມຄະ​ແນນ​ໂລກ ​ໃນ​ລາຍການ ສະ​ກອດ​ຕິ​ຊ ​ໂອ​ເພັນ ຊີງ​ເງິນ​ລາງວັນ​ລວມ 366.000 ປອນ ຢູ່​ສະໜາມ​ເອມິ​ເຣດ ອາຣີນາ ​ໃນ​ເມືອງ​ກລາສ​ໂກ ສະ​ກອດ​ແລນ ​ໃນ​ວັນ​ທີ 17 ທັນວາ ​ເປັນ​ການ​ແຂ່ງຂັນ​ໃນ​ຮອບ​ຊີງ​ຊະນະ​ເລີດ ​ໃຊ້​ລະບົບ​ຊະນະ 9 ​ໃນ 17 ​ເຟມ ​ໂດຍ​ເປັນ​ການ​ພົບ​ກັນ​ລະຫວ່າງ ນີລ ​ໂຣ​ເບິດ​ສັນ ອະດີດ​ແຊ້ມ​ໂລກ 1 ສະ​ໄໝ​ຈາກ​ອົດ​ສະຕຣາລີ ​ເຊິ່ງ​ປັດຈຸບັນ​ເປັນ​ມື 20 ຂອງ​ໂລກ ພົບ​ກັບ ​ເກົາ ຍູ່ ​ເຝິງ ມື 37 ຂອງ​ໂລກ​ຈາກ​ຈີນ ​ໂດຍ​ໃນ​ໄລຍະ​ເຊ​ສຊັນ​ທຳ​ອິດ 8 ​ເຟມນັ້ນ ​ເປັນ​ນັກ​ສະນຸກ​ເກີ​ຈາກ​ຈີນ​ທີ່​ຫລິ້ນ​ໄດ້​ດີ ຂຶ້ນນຳ​ກ່ອນ 5-3 ​ເຟມ.

​ເຂົ້າສູ່​ເຊ​ສຊັນ​ທີ 2 ​ເກົາ ຍັງ​ຫລິ້ນ​ໄດ້​ດີ ຂຶ້ນນຳ​ເຖິງ 8-4 ​ເຟມ ຕ້ອງການ​ອີກ​ພຽງ​ເຟມດຽວ​ກໍ​ຈະ​ຄວ້າ​ແຊ້ມລາຍການ​ສະ​ສົມຄະ​ແນນ​ໂລກ​ໄປ​ຄອງ​ເປັນ​ລາຍການ​ທຳ​ອິດ​ໃນ​ຊີວິດ, ​ແຕ່​ນັກ​ສະນຸກ​ເກີ ອາຍຸ 35 ປີ ຈາກ​ອົດ​ສະຕຣາລີ ບໍ່​ຍອມ​ງ່າຍໆ​ກວາດ 5 ​ເຟມລວດ ​ແຊງ​ຊະນະ​ຫວຸດ​ຫວິດ 9-8 ​ເຟມ ຄວ້າ​ແຊ້ມ​ໄປ​ຄອງ​ໄດ້​ສຳ​ເລັດ ​ເຊິ່ງຖື​ເປັນ​ແຊ້ມລາຍການ​ສະ​ສົມຄະ​ແນນ​ໂລກ​ລາຍການ​ທຳ​ອິດ​ຂອງ ​ໂຣ​ເບິດ​ສັນ ນັບ​ແຕ່​ເດືອນ​ມິຖຸນາ​ປີຜ່ານມາ.