ປາກິດສະຖານຢຸດການອອກວີຊາໃຫ້ຊາວອິນເດຍ ການພົວພັນເຄັ່ງຕຶງ

        ປາກິດສະຖານຕອບໂຕ້ທາງການທູດຢ່າງຮຸນແຮງຕໍ່ອິນເດຍ ໂດຍການສັ່ງຢຸດອອກວີຊາໃຫ້ຊາວອິນເດຍ ພາຍຫລັງເກີດເຫດຄົນຮ້າຍຍິງນັກທ່ອງທ່ຽວໃນແຄວ້ນແຄຊາເມຍ ເຊິ່ງເປັນເຂດປົກຄອງຂອງອິນເດຍ ແລະ ເປັນພື້ນທີ່ຂັດແຍ່ງລະຫວ່າງທັງສອງປະເທດນັບແຕ່ປີ 1947 ຫລັງໄດ້ຮັບເອກະລາດຈາກອັງກິດ ເຮັດໃຫ້ມີຜູ້ເສຍຊີວິດຢ່າງໜ້ອຍ 26 ຄົນ.

       ນອກຈາກນີ້ ປາກິດສະຖານຍັງໄດ້ຂັບໄລ່ນັກການທູດອິນເດຍບາງສ່ວນອອກຈາກປະເທດ, ຢຸດການຄ້າ ແລະ ຈໍາກັດເຈົ້າໜ້າທີ່ທາງທະຫານຂອງອິນເດຍໃນສະຖານທູດໃຫ້ເຫລືອພຽງ 30 ຄົນ ລວມທັງປິດນ່ານຟ້າ ບໍ່ໃຫ້ສາຍການບິນຂອງອິນເດຍບິນຜ່ານ, ພ້ອມທັງປະຕິເສດຂໍ້ກ່າວຫາຂອງອິນເດຍວ່າປາກິດສະຖານມີສ່ວນກ່ຽວຂ້ອງກັບກຸ່ມມືປືນທີ່ກໍ່ເຫດໃນຄັ້ງນີ້.

        ສ່ວນທ່ານ ນາເຣນທຣາ ໂມດີ ນາຍົກລັດຖະມົນຕີອິນເດຍ ໄດ້ອອກມາຖະແຫລງຫລັງເກີດເຫດວ່າ: ອິນເດຍຈະຕາມລ່າ ແລະ ລົງໂທດຜູ້ກໍ່ເຫດ ແລະ ຜູ້ຢູ່ເບື້ອງຫລັງຢ່າງສາສົມ, ສັດຕູຂອງປະເທດກ້າທໍາຮ້າຍຈິດວິນຍານຂອງປະເທດ, ແຕ່ຈິດວິນຍານຂອງອິນເດຍຈະບໍ່ມີວັນຖືກທໍາລາຍດ້ວຍການກໍ່ການຮ້າຍ.

         ອິນເດຍເອງກໍຕອບໂຕ້ດ້ວຍການປິດດ່ານຊາຍແດນ Attari-Wagah ແລະ ຢຸດອອກວີຊາຊາວປາກິດສະຖານ ໂດຍເບື້ອງຕົ້ນທາງການອິນເດຍກໍາລັງເລັ່ງສອບສວນຄະດີນີ້. ພ້ອມກ່າວວ່າ: ຜູ້ຖືກສົງໄສ 3 ຄົນໃນຄະດີນີ້ເປັນສະມາຊິກກຸ່ມຕິດອາວຸດ Lashkar-e-Taiba (LeT) ເຊິ່ງມີຖານຢູ່ປາກິດສະຖານ ເຊິ່ງກຸ່ມຕິດອາວຸດນີ້ເຄີຍກໍ່ເຫດໂຈມຕີຢູ່ອິນເດຍມາແລ້ວຫລາຍຄັ້ງເຊັ່ນ: ເຫດໂຈມຕີຢູ່ມຸມໄບໃນປີ 2008 ທີ່ມີຜູ້ເສຍຊີວິດ 170 ກວ່າຄົນ.

        ເຫດການນີ້ເຮັດໃຫ້ຄວາມເຄັ່ງຕຶງລະຫວ່າງອິນເດຍ ແລະ ປາກິດສະຖານເລີ່ມຂຶ້ນອີກ ໂດຍມີການຕອບໂຕ້ທາງການທູດ, ການຄ້າລະຫວ່າງປະເທດ ແລະ ການໃຊ້ມາດຕະການທີ່ອາດນໍາໄປສູ່ຄວາມຂັດແຍ່ງໃນວົງກວ້າງ ຖ້າບໍ່ມີການເຈລະຈາ ຫລື ໄກ່ເກ່ຍຢ່າງຮີບດ່ວນ.

ອ້າງອີງ:

• https://www.bbc.com/news/articles/cwy76y52l9eo 
• https://www.aljazeera.com/news/2025/4/24/pakistan-announces-retaliatory-measures-against-india-after-kashmir-attack 
• https://apnews.com/article/kashmir-india-pakistan-pahalgam-tourist-attack-tensions-242c7a600a51793f5484e4f620402fdd