ກວດພົບສານຟໍມາລິນ ກັບ ສານບໍແລັກ ໃນໝາກແອັບເປິ້ນ ແລະ ໝາກກ້ຽງ ຢູ່ຕະຫລາດເມືອງແອດ
March 13, 2025 - 5:14 PM
ວັນທີ 13 ມີນາ 2025 ນີ້, ທີມງານກວດກາອາຫານ ແລະ ຢາ ເມືອງແອດ ແຂວງຫົວພັນ ນຳໂດຍ ດຣ ບຸນທ່ຽງ ແກ້ວມີໄຊ ອຳນວຍການໂຮງໝໍເມືອງແອດ ພ້ອມດ້ວຍພາກສ່ວນກ່ຽວຂ້ອງ, ຫ້ອງການການຄ້າ, ຫ້ອງການ ຖວທ ໄດ້ລົງເຄື່ອນໄຫວກວດກາວັດແທກສານຟໍມາລິນ ແລະ ສານບາຫຼອດ(ບໍແລັກ) ທີ່ເຈືອປົນຢູ່ກັບ ພືດຜັກ-ໝາກໄມ້ ແລະ ອາຫານສຳເລັດຮູບຈຳນວນໜຶ່ງ ເຊິ່ງກວດກາຄັ້ງນີ້ມີອາຫານແຊ່ແຂງປະເພດ ຮອດດັອກ, ລູກຊີ້ນ, ຕີນໄກ່ ແລະ ພືດຜັກ ແລະ ໝາກໄມ້ປະເພດ ໝາກແອັບເປິ້ນ, ໝາກກ້ຽງ, ໝາກສາລີ່, ຜັກຫອມບົ່ວ-ຫອມແປ້ນ ທີີີ່ນຳເຂົ້າຈາກຕ່າງປະເທດ.
ຜົນການກວດກາ ພົບວ່າ ໝາກແອັບເປິ້ນ ແລະ ໝາກກ້ຽງ ມີສານດັ່ງກ່າວເຈືອປົນຫລາຍກວ່າໝູ່. ດັ່ງນັ້ນ, ເພື່ອຄວາມປອດໄພຂອງຜູ້ບໍລິໂພກ ທີມງານຍັງຈະສືບຕໍ່ກວດກາພືດຜັກ-ໝາກໄມ້ອຶ່ນໆຕື່ມອີກ.
ທີ່ມາ: ຫ້ອງການ ຖວທ ເມືອງແອດ
