ອິດສະລາແອນຍິງປືນໃຫຍ່ຖະຫລົ່ມ ຖານທີ່ໝັ້ນກຸ່ມຮາມັດຢູ່ເຂດກາຊາ

ກອງທັບ​ອິດສະ​ລາ​ແອນຍິງ​ປືນ​ໃຫຍ່​ໂຈມ​ຕີ​ຖານ​ທີ່​ໝັ້ນຂອງ​ກຸ່ມ​ຮາ​ມັດ​ຢູ່​ເຂດ​ກາຊາ ຕອບ​ໂຕ້​ອີກ​ຝ່າຍ​ພະຍາຍາມ​ຍິງ​ຈະ​ຫລວດ​ຂ້າມ​ຊາຍ​ແດນ.

The IDF holds Hamas responsible for any terror activity perpetrated against Israel from the Gaza Strip.

— Israel Defense Forces (@IDF) October 8, 2017

ສຳນັກ​ຂ່າວ​ຕ່າງປະ​ເທດ​ລາຍ​ງານ​ຈາກ​ນະຄອນຫລວງ​ເຢຣູຊາ​ເລ​ມ ປະ​ເທດ​ອິດສະ​ລາ​ແອນ ​ໃນ​ວັນ​ທີ 9 ຕຸລາ​ວ່າ: ກອງ​ກຳລັງ​ປ້ອງ​ກັນ​ຕົນ​ເອງ​ຂອງ​ອິດສະ​ລາ​ແອນ (IDF) ອອກ​ຖະ​ແຫລ​ງການ​ວ່າ: ​ໄດ້​ຍິງ​ປືນ​ໃຫຍ່​ໂຈມ​ຕີ​ຖານ​ທີ່​ໝັ້ນຂອງ​ກຸ່ມ​ຮາ​ມັດ ​ໃນ​ບໍລິ​ເວນ​ເຂດ​ກາຊາ ​ໃນ​ຄືນວັນ​ທີ 8 ຕຸລາ, ພາຍຫລັງ​ກຸ່ມ​ຫົວ​ຮຸນ​ແຮງ​​ເຊິ່ງປົກຄອງ​ປາ​ແລັສຕິນພະຍາຍາມ​ຍິງ​ຈະ​ຫລວດ​ຂ້າມ​ຊາຍ​ແດນ ຈຶ່ງ​ຈຳ​ເປັນ​ຕ້ອງ​ມີ​ການ​ຕອບ​ໂຕ້. ​ເຖິງ​ຢ່າງ​ໃດ​ກໍ​ຕາມ ຍັງ​ບໍ່​ມີ​ລາຍ​ງານ​ພົບ​ຜູ້​ເສຍ​ຊີວິດ ຫລື ​ໄດ້​ຮັບ​ບາດ​ເຈັບ ຈາກ​ເຫດການ​ໂຈມ​ຕີ​​ໂດຍ​ຝີ​ມື​ຂອງ​ທັງ​ສອງ​ຝ່າຍ.

ທັງ​ນີ້ ອິດສະ​ລາ​ແອນ ​ແລະ ກຸ່ມ​ຮາ​ມັດ ​ເຮັດ​ສົງຄາມ​ກັນ​ຕໍ່​ເນື່ອງ​ມາ​ແຕ່​ປີ 2008 ຫລື 1 ປີ​ຫລັງ​ກຸ່ມ​ຮາ​ມັດ​ປົກຄອງ​ເຂດ​ກາຊາ ສົ່ງ​ຜົນ​ໃຫ້​ລັດຖະບານ​ປາ​ແລັສຕິນພາຍ​ໃຕ້​ການ​ນຳ​ຂອງ​ພັກ​ຟາ​ຕາ​ຕ້ອງ​ຍ້າຍ​ຖິ່ນ​ຖານ​ໄປ​ເຂດ​ເວສ​ແບ​ງ, ຂະນະ​ທີ່​ກອງທັບ​ອິດສະ​ລາ​ແອນ​ໂຈມ​ຕີ​ເຂດ​ກາ​ຊາຄັ້ງ​ໃຫຍ່​ທີ່​ສຸດ​ໃນ​ປີ 2014 ​ເພື່ອ​ຕອບ​ໂຕ້​ກຸ່ມ​ຮາ​ມັດ​ລັກ​ພາ​ຕົວ​ຊາວ​ຢິວ 3 ຄົນ ​ເຊິ່ງຜົນ​ຂອງ​ການ​ສູ້​ຮົບ​ໃນ​ຄັ້ງນັ້ນ​ເຮັດ​ໃຫ້​ມີ​ພົນລະ​ເຮືອນ​ປາ​ແລັສຕິນ​ເສຍ​ຊີວິດ​ເກືອບ 1.500 ຄົນ, ທະຫານ​ອິດສະ​ລາ​ແອນ​ເສຍ​ຊີວິດ 67 ຄົນ ​ແລະ ສະມາຊິກ​ກຸ່ມ​ຮາ​ມັດ​ເສຍ​ຊີວິດ​ຢ່າງ​ໜ້ອຍ 789 ຄົນ ຕາມ​ການ​ຕີ​ລາຄາ​ຂອງ​ສະຫະ​ປະຊາ​ຊາດ (UN).