ສປປ ລາວ ໄດ້ຮັບ 4 ລາງວັນມາດຕະຖານການທ່ອງທ່ຽວອາຊຽນ

 

ວັນທີ 26 ມັງກອນ 2024, ພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນ ປະຈໍາປີ 2024 ເນື່ອງໃນໂອກາດ ງານມະຫະກໍາການທ່ອງທ່ຽວອາຊຽນ, ໂດຍການເຂົ້າຮ່ວມ ຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງ ຖະແຫຼງຂ່າວ, ວັດທະນາທຳ ແລະ ທ່ອງທ່ຽວ, ທ່ານ ກາວ ຄິມ ຮຸນ ເລຂາທິການໃຫຍ່ອາຊຽນ

ການມອບ-ຮັບລາງວັນມາດຕະຖານການທ່ອງທ່ຽວອາຊຽນ ປະຈຳປີ 2024 ຄັ້ງນີ້ ລວມມີ 4 ປະເພດຄື:

1. ມາດຕະຖານໂຮງແຮມຂຽວອາຊຽນ ຄັ້ງທີ 9 ປະເທດລະ 5 ລາງວັນ

 

2. ມາດຕະຖານເມືອງທ່ອງທ່ຽວສະອາດອາຊຽນ ຄັ້ງທີ 4 ປະເທດລະ 3 ລາງວັນ

 

3. ມາດຕະຖານສະຖານທີ່ຈັດງານອາຊຽນ:

 

–       ປະເພດສະຖານທີ່ຈັດກອງປະຊຸມ ຄັ້ງທີ 4 ປະເທດລະ 5 ລາງວັນ

 

–       ປະເພດສະຖານທີ່ຈັດງານວາງສະແດງ ຄັ້ງທີ 2 ປະເທດລະ 5 ລາງວັນ

 

–       ປະເພດສະຖານທີ່ຈັດງານເທດສະການ ຄັ້ງທີ 1 ປະເທດລະ 5 ລາງວັນ

 

4. ລາງວັນການທ່ອງທ່ຽວແບບຍືນຍົງອາຊຽນ ຄັ້ງທີ 4 ປະເທດລະ 2 ລາງວັນ

 

ສໍາລັບປີ 2024 ນີ້ ລາງວັນທີ່ໄດ້ຮັບທັງໝົດ ຢູ່ບັນດາປະເທດອາຊຽນ ມີຈໍານວນ 192 ລາງວັນ ດັ່ງນີ້:

 

1. ລາງວັນມາດຕະຖານໂຮງແຮມຂຽວອາຊຽນ ຈໍານວນ 46 ລາງວັນ

 

2. ລາງວັນມາດຕະຖານເມືອງທ່ອງທ່ຽວສະອາດອາຊຽນ ຈໍານວນ 22 ລາງວັນ

 

3. ລາງວັນມາດຕະຖານສະຖານທີ່ຈັດງານອາຊຽນ ຈໍານວນ 108 ລາງວັນ:

 

–       ປະເພດສະຖານທີ່ຈັດກອງປະຊຸມ ຈໍານວນ 43 ລາງວັນ

 

–       ປະເພດສະຖານທີ່ຈັດງານວາງສະແດງ ຈໍານວນ 32 ລາງວັນ

 

–       ປະເພດສະຖານທີ່ຈັດງານເທດສະການ ຈໍານວນ 33 ລາງວັນ

 

4. ລາງວັນການທ່ອງທ່ຽວແບບຍືນຍົງອາຊຽນ ຈໍານວນ 16 ລາງວັນ

 

ໃນນີ້, ສປປ ລາວ ໄດ້ຮັບທັງ 4 ປະເພດລາງວັນມາດຕະຖານ ລວມມີ 20 ລາງວັນຄື: ມາດຕະຖານໂຮງ ແຮມຂຽວອາຊຽນ 5 ລາງວັນ, ມາດຕະຖານເມືອງທ່ອງທ່ຽວສະອາດອາຊຽນ 2 ລາງວັນ, ມາດຕະຖານສະຖານທີ່ຈັດງານອາຊຽນ, ປະເພດຫ້ອງປະຊຸມ 5 ລາງວັນ,  ປະເພດສະຖານທີ່ຈັດງານວາງສະແດງ 1 ລາງວັນ, ປະເພດ ສະຖານທີ່ຈັດງານເທດສະການ 5 ລາງວັນ ແລະ ລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ (ຜະລິດຕະພັນການທ່ອງທ່ຽວເຂດຕົວເມືອງ 01 ລາງວັນ ແລະ ຜະລິດຕະພັນການທ່ອງທ່ຽວເຂດຊົນນະບົດ 01 ລາງວັນ) ມີລາຍລະອຽດດັ່ງລຸ່ມນີ້:

 

1. ມາດຕະຖານໂຮງແຮມຂຽວອາຊຽນ (ASEAN Green Hotel Standard): ເປັນມາດຕະຖານທໍາອິດທີ່ໄດ້ຮັບການຈັດຕັ້ງປະຕິບັດຢູ່ໃນອາຊຽນ ຊຶ່ງເລີ່ມມີການມອບລາງວັນ ແຕ່ປີ 2008 ໂດຍຈັດຂຶ້ນໃນທຸກໆ 2 ປີ ຊຶ່ງປີນີ້ເປັນຄັ້ງທີ 9 ໂດຍມີຈຸດປະສົງ ເພື່ອຊຸກຍູ້ໃຫ້ ບັນດາຫົວໜ່ວຍທຸລະກິດໂຮງແຮມ ແລະ ຣີສອດ ດໍາເນີນທຸລະກິດແບບມີຄວາມຮັບຜິດຊອບຕໍ່ສິ່ງແວດລ້ອມ, ຕໍ່ສັງຄົມ, ຕໍ່ຊຸມຊົນ, ມີການປົກປັກຮັກສາສິ່ງແວດລ້ອມ ລວມເຖິງການນໍາໃຊ້ຜະລິດຕະພັນທີ່ເປັນມິດກັບສິ່ງແວດລ້ອມ, ນໍາໃຊ້ພະລັງງານໄຟຟ້າ ແລະ ນ້ຳຢ່າງມີປະສິດທິພາບ, ສົ່ງເສີມໃຫ້ມີການສ້າງວຽກເຮັດງານທຳພາຍໃນປະເທດ ແລະ ສົ່ງເສີມໃຫ້ນໍາໃຊ້ຜະລິດຕະພັນພາຍໃນປະເທດ. ຊຶ່ງປີນີ້ ຢູ່ໃນອາຊຽນ ມີບັນດາໂຮງແຮມ ແລະ ຣີສອດ ທີ່ໄດ້ຮັບລາງວັນທັງໝົດ 46 ລາງວັນ.

 

ສຳລັບ ສປປ ລາວ ໄດ້ຮັບ 5 ລາງວັນ ດັ່ງມີລາຍຊື່ລຸ່ມນີ້:

 

1. ໂຮງແຮມອາມານຕາກາ ແຂວງຫຼວງພະບາງ

 

2. ໂຮງແຮມຢູນນານເໜີງໂຖຈຸເຈີ້ງ ຫຼວງພະບາງ (ໂຮງແຮມພູແມນ) ແຂວງຫຼວງພະບາງ

 

3. ໂຮງແຮມພູວ່າວ ແຂວງຫຼວງພະບາງ

 

4. ໂຮງແຮມຄລາວພລາຊາ ນະຄອນຫຼວງວຽງຈັນ

 

5. ຣີສອດເລີແກຣນ ແຂວງອຸດົມໄຊ

 

2. ມາດຕະຖານເມືອງທ່ອງທ່ຽວສະອາດອາຊຽນ (ASEAN Clean Tourist City Standard) ຊຶ່ງມາດຕະຖານດັ່ງກ່າວນີ້ ໄດ້ເລີ່ມມອບລາງວັນແຕ່ປີ 2018 ແລະ ປີນີ້ເປັນຄັ້ງທີ 3 ຊຶ່ງມີຈຸດປະສົງເພື່ອສົ່ງເສີມໃຫ້ບັນດາເມືອງທ່ອງທ່ຽວຂອງອາຊຽນ ມີການ​ຮັກສາ​ສິ່ງ​ແວດ​ລ້ອມ, ປ້ອງ​ກັນ​ບໍ່​ໃຫ້​ມີ​ຜົນ​ກະທົບ​ຈາ​ກການ​ປ່ຽນ​​ແປງຂອງ​ສະພາບ​ອາກາດ ​ແລະ ​ເປັນ​ການ​ປະກອບສ່ວນ​ພັດທະນາ​ບັນດາ​ເມືອງຕ່າງໆ ​ໃນ​ປະ​ເທດ​ສະມາຊິກ​ອາ​ຊຽນ​ໃຫ້​ມີ​ຄວາມ​ຢືນ​ຍົງ. ຊຶ່ງປີນີ້ ຢູ່ໃນອາຊຽນ ມີເມືອງທ່ອງທ່ຽວ ທີ່ໄດ້ຮັບລາງວັນ ທັງໝົດ 23 ລາງວັນ.

 

ສຳລັບ ສປປ ລາວ ໄດ້ຮັບ 02 ລາງວັນ ດັ່ງມີລາຍຊື່ລຸ່ມນີ້:

 

1. ນະຄອນຫຼວງວຽງຈັນ

 

2. ນະຄອນໄກສອນ ພົມວິຫານ, ແຂວງສະຫວັນນະເຂດ

 

3. ມາດຕະຖານສະຖານທີ່ຈັດງານອາຊຽນ (ASEAN MICE Venue Standard)

 

–       ປະເພດຫ້ອງປະຊຸມ ຊຶ່ງມາດຕະຖານດັ່ງກ່າວນີ້ ໄດ້ມີການມອບລາງວັນ ເປັນຄັ້ງທີ 4 ຊຶ່ງມີຈຸດປະສົງເພື່ອແນໃສ່ເພື່ອສົ່ງເສີມໃຫ້ພາກພື້ນອາຊຽນມີຫ້ອງປະຊຸມທີ່ມີມາດຕະຖານ, ຄຸນນະພາບສູງ ແລະ ສາມາດແຂ່ງຂັນກັບສາກົນໄດ້ ເພື່ອດຶງດູດນັກທ່ອງທ່ຽວ ແລະ ສ້າງລາຍຮັບໃຫ້ພາກພື້ນ ອາຊຽນໃຫ້ຫຼາຍຂຶ້ນ. ຊຶ່ງປີນີ້ ຢູ່ໃນອາຊຽນ ມີຫ້ອງປະຊຸມທີ່ໄດ້ຮັບລາງວັນທັງໝົດ 43 ລາງວັນ.

 

ສຳລັບ ສປປ ລາວ ໄດ້ຮັບ 5 ລາງວັນ ດັ່ງມີລາຍຊື່ລຸ່ມນີ້:

 

1. ໂຮງແຮມຢູນນານເໜີງໂຖຈຸເຈີ້ງ ຫຼວງພະບາງ (ໂຮງແຮມພູແມນ) ແຂວງຫຼວງພະບາງ

 

2. ຫໍປະຊຸມແຫ່ງຊາດ ນະຄອນຫຼວງວຽງຈັນ

 

3. ໂຮງແຮມເລີປາເລ ຊຽງແກ້ວເດິຫຼວງພະບາງ ແຂວງຫຼວງພະບາງ

 

4. ໂຮງແຮມຫຼວງພະບາງວິວ ແຂວງຫຼວງພະບາງ

 

5. ໂຮງແຮມດອກຈໍາປາ ແຂວງບໍລິຄໍາໄຊ

 

–       ປະເພດສະຖານທີ່ຈັດງານວາງສະແດງ ຊຶ່ງມາດຕະຖານດັ່ງກ່າວນີ້ໄດ້ມີການມອບລາງວັນເປັນຄັ້ງທີ 2 ຊຶ່ງມີຈຸດປະສົງເພື່ອແນໃສ່ເພື່ອສົ່ງເສີມໃຫ້ພາກພື້ນອາຊຽນມີສະຖານທີ່ຈັດງານວາງສະແດງ ທີ່ມີມາດ ຕະຖານ, ຄຸນນະພາບສູງ ແລະ ສາມາດແຂ່ງຂັນກັບສາກົນໄດ້ ເພື່ອດຶງດູດນັກທ່ອງທ່ຽວ ແລະ ສ້າງລາຍຮັບໃຫ້ພາກພື້ນອາຊຽນໃຫ້ຫຼາຍຂຶ້ນ. ຊຶ່ງປີນີ້ ຢູ່ໃນອາຊຽນ ມີສະຖານທີ່ຈັດງານວາງສະແດງທີ່ໄດ້ຮັບລາງວັນທັງໝົດ 32 ລາງວັນ.

 

ສຳລັບ ສປປ ລາວ ໄດ້ຮັບ 01 ລາງວັນ ດັ່ງມີລາຍຊື່ລຸ່ມນີ້:

 

–        ສູນການຄ້າລາວ-ໄອເຕັກ     ນະຄອນຫຼວງວຽງຈັນ

 

–       ປະເພດສະຖານທີ່ຈັດງານເທດສະການ ຊຶ່ງມາດຕະຖານດັ່ງກ່າວນີ້ໄດ້ມີການມອບລາງວັນເປັນຄັ້ງ ທໍາອິດ ຊຶ່ງມີຈຸດປະສົງເພື່ອແນໃສ່ເພື່ອສົ່ງເສີມໃຫ້ພາກພື້ນອາຊຽນມີສະຖານທີ່ຈັດງານເທດສະການ ທີ່ມີມາດຕະຖານ, ຄຸນນະພາບສູງ ແລະ ສາມາດແຂ່ງຂັນກັບສາກົນໄດ້ ເພື່ອດຶງດູດນັກທ່ອງທ່ຽວ ແລະ ສ້າງລາຍຮັບໃຫ້ພາກພື້ນອາຊຽນໃຫ້ຫຼາຍຂຶ້ນ. ຊຶ່ງປີນີ້ ຢູ່ໃນອາຊຽນ ມີສະຖານທີ່ຈັດງານເທດສະ ການ ທີ່ໄດ້ຮັບລາງວັນທັງໝົດ 33 ລາງວັນ.

 

ສຳລັບ ສປປ ລາວ ໄດ້ຮັບ 5 ລາງວັນ ດັ່ງມີລາຍຊື່ລຸ່ມນີ້:

 

1. ພັດຕະຄານ ເຊັນພິລາ ນະຄອນຫຼວງວຽງຈັນ

 

2. ໂຮງແຮມຄລາວພລາຊາ ນະຄອນຫຼວງວຽງຈັນ

 

3. ໂຮງແຮມແລນມາກແມ່ຂອງຣີເວີໄຊ ນະຄອນຫຼວງວຽງຈັນ

 

4. ໂຮງແຮມດອນຈັນພາເລດ ນະຄອນຫຼວງວຽງຈັນ

 

5. ໂຮງແຮມຈໍາປາສັກແກຣນ ແຂວງຈໍາປາສັກ

 

4. ລາງວັນການທ່ອງທ່ຽວແບບຍືນຍົງອາຊຽນ (ASEAN Sustainable Tourism Awards) ລາງວັນດັ່ງກ່າວແມ່ນການລິເລີ່ມຂອງ ສປປ ລາວ ໃນໄລຍະ ສປປ ລາວ ເປັນປະທານອາຊຽນໃນປີ 2016. ສໍາລັບປີ 2024 ແມ່ນມອບລາງວັນເປັນຄັ້ງທີ 4 ຊຶ່ງ​ມີຈຸດ​ປະ​ສົງ​ ເພື່ອ​ເປັນການ​ສ້າງ​ແຮງ​ຈູງ​ໃຈ​ໃຫ້​ແກ່​ຈຸດ​ໝາຍ​ປາຍ​ທາງ​ການ​ທ່ອງ​ທ່ຽວ​ອາ​ຊຽນ ແລະ ພາກ​ສ່ວນ​ທີ່​ກ່ຽວ​ຂ້ອງ; ເພື່ອຮ່ວມ​ກັນ​ພັດ​ທະ​ນາຜະລິດຕະພັນການ​ທ່ອງ​ທ່ຽວ ແລະ ເພື່ອ​ຫຼຸດ​ຜ່ອນ​ບັນ​ຫາ​ດ້ານ​ສິ່ງ​ແວດ​ລ້ອມ, ວັດ​ທະ​ນະ​ທໍາ-ສັງ​ຄົມ ແລະ ເສດ​ຖະ​ກິດ ທີ່​ເກີດ​ຈາ​ກການ​ຂະ​ຫຍາຍ​ຕົວ​ຂອງ​ການ​ທ່ອງ​ທ່ຽວຢ່າງວ່ອງ​ໄວ. ຂະ​ນະ​ດຽວ​ກັນ​ ກໍ່ໃຫ້​ຄໍາແນະນຳ ແລະ ສ້າງແຮງ​ຈູງ​ໃຈ​ທີ່​ເປັນ​ປະ​ໂຫຍດ​ໃຫ້​ແກ່​ພາກ​ລັດ ແລະ ພາກ​ທຸ​ລະ​ກິດ ເພື່ອ​ປັບ​​ປຸງ​ຜະ​ລິດ​ຕະ​ພັນ ແລະ ການ​ບໍ​ລິ​ການ​​ຂອງຕົນ​ໃຫ້​​ໄດ້​ຕາມ​ມາດ​ຕະ​ຖານອາຊຽນ.  ສໍາລັບຫົວຂໍ້ຂອງລາງວັນການທ່ອງທ່ຽວແບບຍືນຍົງອາຊຽນ  ປີ 2024 ແມ່ນ “ການສົ່ງເສີມອາຫານເພື່ອການທ່ອງທ່ຽວ” ໂດຍເນັ້ນໃສ່ການໂຄສະນາສົ່ງເສີມລາຍການ ອາຫານຂອງແຕ່ລະປະເທດສະມາຊິກອາຊຽນ ເພື່ອສົ່ງເສີມໃຫ້ກາຍເປັນຜະລິດຕະພັນການທ່ອງທ່ຽວໜຶ່ງ ທີ່ມີສີສັນຫຼາກຫຼາຍ ໂດດເດັ່ນ ໂດຍອີງຕາມເອກະລັກສະເພາະຂອງແຕ່ລະທ້ອງຖິ່ນຂອງແຕ່ລະປະເທດ.   ຢູ່ໃນອາຊຽນ ມີຜະລິດຕະພັນການທ່ອງທ່ຽວ ທີ່ໄດ້ຮັບລາງວັນທັງໝົດ 16 ລາງວັນ ລວມມີຜະລິດຕະພັນການທ່ອງທ່ຽວເຂດຕົວເມືອງ ແລະ ຜະລິດຕະພັນການທ່ອງທ່ຽວເຂດຊົນນະບົດ.

 

ສຳລັບ ສປປ ລາວ ໄດ້ຮັບ 02 ລາງວັນ ຄື:

 

–     ຮ້ານອາຫານຄົວລາວ (ຜະລິດຕະພັນການທ່ອງທ່ຽວເຂດຕົວເມືອງ) ນະຄອນຫຼວງວຽງຈັນ.

 

–     ຮ້ານອາຫານຕາດເຍືອງ (ຜະລິດຕະພັນການທ່ອງທ່ຽວເຂດຊົນນະບົດ) ແຂວງຈໍາປາສັກ.

 

ໃນງານມອບ-ຮັບລາງວັນມາດຕະຖານການທ່ອງທ່ຽວອາຊຽນໃນຄັ້ງນີ້ ໄດ້ມອບລາງວັນໃຫ້ພາກ ສ່ວນຕ່າງໆ ຈາກພາກລັດ ແລະ ບັນດາຜູ້ປະກອບການຈາກພາກທຸລະກິດ  ໃນບັນດາປະເທດສະມາຊິກອາຊຽນ ທີ່ສາມາດປະຕິບັດໄດ້ຕາມເງື່ອນໄຂຕ່າງໆ ທີ່ໄດ້ກຳນົດໄວ້ຢູ່ໃນແຕ່ລະມາດຕະຖານການທ່ອງ ທ່ຽວອາຊຽນ.

 

ນອກຈາກນີ້, ສປປ ລາວ ຍັງໄດ້ຮັບລາງວັນ ອີກຈໍານວນ 52 ລາງວັນ ຊຶ່ງຈະມີການຈັດພິທີ ມອບລາງວັນ ໃນພາຍຫຼັງ ໂດຍຈະຈັດຂຶ້ນໃນເດືອນກຸມພາ 2024 ດັ່ງລຸ່ມນີ້:

 

–          ລາງວັນມາດຕະຖານໂຮງແຮມຂຽວອາຊຽນ ຈໍານວນ 45 ລາງວັນ

 

–          ລາງວັນມາດຕະຖານສະຖານທີ່ຈັດງານອາຊຽນ: ປະເພດສະຖານທີ່ຈັດງານເທດສະການ ຈໍານວນ 6 ລາງວັນ

 

–          ລາງວັນການທ່ອງທ່ຽວແບບຍືນຍົງອາຊຽນ ຈໍານວນ 01 ລາງວັນ

 

ຜົນສໍາເລັດການຈັດຕັ້ງປະຕິບັດບັນດາມາດຕະຖານການທ່ອງທ່ຽວອາຊຽນ ຢູ່ ສປປ ລາວ ທັງໝົດແມ່ນໄດ້ຮັບການຊີ້ນໍາ-ນໍາພາຈາກການນໍາຂັ້ນສູນກາງ, ຂັ້ນແຂວງ ແລະ ການມີສ່ວນຮ່ວມຈາກພາກລັດ, ພາກທຸລະກິດ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາທີ່ກ່ຽວຂ້ອງ ໂດຍໄດ້ຮັບການສະໜັບສະໜູນດ້ານງົບປະມານຈາກລັດຖະບານແຫ່ງ ສປປ ລາວ, ໂຄງການພັດທະນາໂຄງລ່າງພື້ນຖານເພື່ອສົ່ງເສີມການ ທ່ອງທ່ຽວໄລຍະ 2 (ADB) (Second GMS Tourism Infrastructure for Inclusive Growth Project-TIIGP2).