ຫາລື ການຈັດຕັ້ງປະຕິບັດ ດໍາລັດ ວ່າດ້ວຍ ການຄຸ້ມຄອງທຸລະກິດຍານພາຫະນະທາງບົກ

ທ່ານ ບົວວັນ ວິລະວົງ ໄດ້ມີຄຳເຫັນວ່າ: ເພື່ອທົບທວນການຈັດຕັ້ງປະຕິບັດ ດໍາລັດ ວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ສະບັບເລກທີ 470/ລບ ແລະ ຂໍ້ຕົກລົງວ່າດ້ວຍຊິ້ນສ່ວນຍານພາຫະນະທາງບົກ ສະບັບເລກທີ 0221/ອຄ.ກອຫ ແລະ ປຶກສາຫາລືແລກປ່ຽນບົດຮຽນກັບຂະແໜງການທີ່ກ່ຽວຂ້ອງ ທັງພາກລັດ ແລະ ເອກະຊົນ ດ້ານຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດດໍາລັດ ແລະ ຂໍ້ຕົກລົງດັ່ງກ່າວ ໂດຍສະເພາະສະພາບການນໍາເຂົ້າ, ການຜະລິດ, ການປະກອບລົດ ແລະ ການຈໍາໜ່າຍ ໃນສະພາບປັດຈຸບັນ. ໃນໄລຍະຜ່ານມາ ພັກ ແລະ ລັດ ໄດ້ວາງທິດທາງ ແລະ ນະໂຍບາຍສົ່ງເສີມການຜະລິດ, ການປະກອບໃຫ້ໄດ້ມາດຕະຖານ, ຍົກລະດັບສະມັດຕະພາບການຜະລິດ, ສ້າງມູນຄ່າເພີ່ມ, ເຮັດໃຫ້ຜະລິດຕະພັນມີຄຸນນະພາບ ແລະ ມີຄວາມປອດໄພ, ໃນຂະນະທີ່ສະພາບລວມຂອງທຸລະກິດຕ່າງໆ ມີການແຂ່ງຂັນໃນຫລາຍດ້ານ ເປັນຕົ້ນ ການພັດທະນາຜະລິດ ຕະພັນ, ມາດຕະຖານການຜະລິດ ກ້າວໄປສູ່ທັນສະໄໝ ແລະ ເປັນມິດກັບສິ່ງແວດລ້ອມ, ການແຂ່ງຂັນດ້ານການບໍລິການທາງການຄ້າ ແລະ ອື່ນໆ. ໃນສະພາບເສດຖະກິດມີຄວາມຫຍຸ້ງຍາກ ນັບແຕ່ການລະບາດຂອງພະຍາດໂຄວິດ-19 ເປັນຕົ້ນມາ ປະກອບໃສ່ສະພາບເສດຖະກິດຝືດເຄືອງຈາກຄວາມຂັດແຍ່ງຂອງໂລກ, ບັນຫາເງິນເຟີ້, ນໍ້າມັນແພງ ອັດຕາການນໍາເຂົ້າຫລຸດລົງ ຈຶ່ງເຮັດໃຫ້ການຜະລິດ, ການປະກອບ ແລະ ການຈໍາໜ່າຍຫລຸດລົງ, ຄາດວ່າປະມານ 60% ຂອງການຜະລິດໃນທົ່ວປະເທດ ທຽບໃສ່ໄລຍະກ່ອນການແພ່ລະບາດພະຍາດໂຄວິດ-19.

ໃນກອງປະຊຸມ, ຜູ້ເຂົ້າຮ່ວມ ໄດ້ຮັບຟັງການນໍາສະເໜີ ດໍາລັດວ່າດ້ວຍ ການຄຸ້ມຄອງຍານພາຫະນະທາງ ບົກ ເລກທີ 470/ລບ, ລົງວັນທີ 27 ທັນວາ 2019, ການກໍານົດມາດຕະຖານເຕັກນິກຄາມປອດໄພ ຂອງຍານພາ ຫະນະທາງບົກ ຂອງ ສປປ ລາວ ແລະ ສະພາບການຜະລິດ ແລະ ການປະກອບລົດ. ຂະນະດຽວກັນ, ກໍໄດ້ເປີດເວທີປະກອບຄໍາຄິດເຫັນແລກປ່ຽນບົດຮຽນຢ່າງກົງໄປ-ກົງມາ ດ້ວຍຄວາມຮັບຜິດຊອບສູງ ເພື່ອໃຫ້ການຈັດຕັ້ງປະຕິບັດມີຜົນສໍາເລັດ ແລະ ສາມາດນຳໄປຈັດຕັ້ງປະຕິບັດປະກົດຜົນເປັນຈິງ.