ກະກຽມພິຈາລະນາສະເໜີວັດພະທອງ 3 ສີ ເປັນມໍລະດົກວັດທະນະທໍາລະດັບທ້ອງຖິ່ນ

ທ່ານ ຈະເລີນ ປຸນທະເຮືອງສີ ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງວຽງຈັນ, ທ່ານ ຄໍາພອນ ຈັນທະວົງສັກ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເມືອງທຸລະຄົມ ພ້ອມດ້ວຍຂະແໜງ ແລະ ໜ່ວຍງານກ່ຽວຂ້ອງຈາກຂັ້ນແຂວງ ແລະ ເມືອງ ໄດ້ລົງເຄື່ອນໄຫວເຮັດວຽກຢູ່ທີ່ບ້ານຫຼ່ງຊັນ ເມືອງທຸລະຄົມ ແຂວງວຽງຈັນ ເມື່ອບໍ່ດົນມານີ້. ຈຸດປະສົງຂອງການລົງເຮັດວຽກເທື່ອນີ້ ເພື່ອຄົ້ນຄວ້າພິຈາລະນາ, ປະເມີນມາດຖານ ແລະ ເງື່ອນໄຂໃນການສະເໜີຮັບຮອງເອົາວັດພະທອງ 3 ສີ ເປັນມໍຣະດົກວັດທະນະທໍາລະດັບທ້ອງຖິ່ນຂອງແຂວງວຽງຈັນ; ພາຍຫຼັງຄະນະດັ່ງກ່າວໄປຮອດບ້ານຫຼິ່ງຊັນ ໄດ້ເຮັດວຽກຮ່ວມກັບອົງການຈັດຕັ້ງຂອງບ້ານດັ່ງກ່າວຢູ່ທີ່ວັດກາງ.

ທ່ານ ນາງ ກິ່ງສີດາ ແກ້ວປະເສີດ ຮອງຫົວໜ້າຂະແໜງວັດທະນະທໍາ ໄດ້ຜ່ານມາດຖານ, ເງື່ອນໄຂ, ນິຕິກໍາກ່ຽວຂ້ອງ ຂອງການສະເໜີຮັບຮອງມໍຣະດົກລະດັບທ້ອງຖິ່ນ, ຮັບຟັງການປະກອບຄໍາເຫັນຂອງຜູ້ເຂົ້າຮ່ວມ, ຟັງຄວາມອາດສາມາດຂອງບ້ານ ຊຶ່ງອີງຕາມການປຶກສາຫາລືເບື້ອງຕົ້ນ ກໍຄືທ່າແຮງຂອງບ້ານທີ່ມີແລ້ວ ເຫັນວ່າມີຄວາມເປັນໄປໄດ້, ແຕ່ກອງປະຊຸມສະເໜີໃຫ້ບ້ານຮຽບຮຽງປະຫວັດຂອງບ້ານ, ປະຫວັດຂອງວັດພະທອງ 3 ສີ, ແຕ່ງຕັ້ງຄະນະກໍາມະການຂັ້ນບ້ານເພື່ອຮັບຜິດຊອບວຽກງານ, ຊຸກຍູ້ໃຫ້ບ້ານກໍານົດເຂດແດນຂອງວັດ ແລະ ອອກໃບຕາດິນໃຫ້ສໍາເລັດກ່ອນ ແລ້ວຈຶ່ງເຂົ້າສູ່ບາດກ້າວຕໍ່ໄປ.