ອິດສະລາແອນ-ຮາມັດສູ້ຮົບຢ່າງດຸເດືອດ ເສຍຊີວິດສອງຝ່າຍ 500 ກວ່າຄົນ ອິດສະລາແອນປະກາດ “ແກ້ແຄ້ນຄັ້ງໃຫຍ່”
ສະຖານະການສູ້ຮົບລະຫວ່າງອິດສະລາແອນກັບກຸ່ມຕິດອາວຸດຮາມັດຂອງປາແລັສຕິນຄັ້ງໃຫຍ່ທີ່ສຸດໃນຮອບຫລາຍທົດສະວັດ ຍັງທະວີຄວາມເຄັ່ງຕຶງຢ່າງຕໍ່ເນື່ອງ.
ຫລ້າສຸດວັນທີ 8 ຕຸລາ, ມີລາຍງານຈາກທາງການອິດສະລາແອນວ່າ: ຈໍານວນຜູ້ເສຍຊີວິດຈາກການຍິງຈະຫລວດ ແລະ ສົ່ງກອງກໍາລັງເຂົ້າໂຈມຕີຂອງກຸ່ມຮາມັດເພີ່ມຂຶ້ນເປັນຢ່າງໜ້ອຍ 300 ຄົນແລ້ວ ແລະ ບາດເຈັບຫລາຍກວ່າ 1.500 ຄົນ. ນອກຈາກນີ້ ຍັງມີລາຍງານແຮງງານໄທຖືກຈັບເປັນຕົວປະກັນຫລາຍຄົນ. ຂະນະທີ່ການສູ້ຮົບຍັງມີຂຶ້ນຢ່າງຕໍ່ເນື່ອງ ໂດຍຮາມັດໄດ້ລະດົມຍິງຈະຫລວດຮອບຫລ້າສຸດໂຈມຕີນະຄອນຫລວງເທລອາວີບ ແລະ ຫລາຍພື້ນທີ່.
ຂະນະທີ່ອິດສະລາແອນເປີດສາກຕອບໂຕ້ດ້ວຍ “ປະຕິບັດການດາບເຫລັກ” (Operation Iron Swords) ລະດົມໂຈມຕີທາງອາກາດຄັ້ງໃຫຍ່ຢູ່ເຂດກາຊາ ສົ່ງຜົນໃຫ້ມີຊາວປາແລັສຕິນເສຍຊີວິດແລ້ວຢ່າງໜ້ອຍ 232 ຄົນ, ບາດເຈັບຫລາຍກວ່າ 1.600 ຄົນ ຕາມລາຍງານຈາກໜ່ວຍແພດຢູ່ເມືອງກາຊາ.
ເບື້ອງຕົ້ນຄາດວ່າຕົວເລກຜູ້ເສຍຊີວິດຂອງທັງສອງຝ່າຍຈະຍັງເພີ່ມສູງຂຶ້ນອີກ ເນື່ອງຈາກກອງທັບອິດສະລາແອນຍັງລະດົມຖິ້ມລະເບີດໂຈມຕີເຂດກາຊາຢ່າງຕໍ່ເນື່ອງ. ຂະນະທີ່ຍັງມີການປະທະກັບກຸ່ມຮາມັດໃນຫລາຍພື້ນທີ່ຕອນໃຕ້ຂອງອິດສະລາແອນ ໂດຍໂຄສົກກອງທັບອິດສະລາແອນລະບຸວ່າ: ຍັງບໍ່ສາມາດຄວບຄຸມສະຖານະການໃນປະເທດໄດ້ທັງໝົດ.
ນາຍົກລັດຖະມົນຕີ ເບນຈາມິນ ເນທັນຢາຮູ ໄດ້ຖະແຫລງຜ່ານທາງໂທລະພາບວັນທີ 7 ຕຸລາ ໂດຍປະກາດສະຖານະການສົງຄາມ ພ້ອມລະດົມກໍາລັງສໍາຮອງ ແລະ ໃຫ້ຄໍາໝັ້ນວ່າຈະຕໍ່ສູ້ກັບກຸ່ມຮາມັດຈົນເຖິງທີ່ສຸດ ໂດຍຢືນຢັນວ່າ: ຈະແກ້ແຄ້ນຄັ້ງໃຫຍ່ໃຫ້ຊາວອິດສະລາແອນທຸກຄົນທີ່ເສຍຊີວິດ ແລະ ຈະປ່ຽນເຂດກາຊາ ເຊິ່ງຢູ່ພາຍໃຕ້ການປິດລ້ອມຂອງອິດສະລາແອນ ທັງທາງບົກ, ທາງອາກາດ ແລະ ທາງທະເລ ໃຫ້ກາຍເປັນ “ເກາະຮ້າງ” ພ້ອມເຕືອນຊາວປາແລັສຕິນໃຫ້ຟ້າວໜີອອກຈາກກາຊາທັນທີ.
ທັງນີ້, ການສູ້ຮົບເກີດຂຶ້ນຫລັງກຸ່ມຮາມັດເລີ່ມຍິງຈະຫລວດຫລາຍພັນລູກໂຈມຕີຈາກເຂດກາຊາໃສ່ອິດສະລາແອນ ແລະ ສົ່ງກອງກໍາລັງຕິດອາວຸດແຊກຊຶມເຂົ້າໂຈມຕີໃນຫລາຍເມືອງຊາຍແດນທາງໃຕ້ຂອງອິດສະລາແອນ ພາຍໃຕ້ປະຕິບັດການ “ພາຍຸອັລອັກຊໍ” (Operation Al-Aqsa Storm) ໂດຍອ້າງວ່າ ເພື່ອຕອບໂຕ້ຕໍ່ຄວາມໂຫດຮ້າຍທັງໝົດທີ່ຊາວປາແລັສຕິນຕ້ອງຜະເຊີນຈາກອິດສະລາແອນໃນຫລາຍທົດສະວັດ ເຊິ່ງລວມທັງການກະທໍາຂອງທາງການອິດສະລາແອນທີ່ບຸກມັດສະຢິດອັລ-ອັກຊໍ (Al-Aqsa) ໃນນະຄອນເຢລູຊາເລັມ ເຊິ່ງເປັນສະຖານທີ່ສັກສິດຂອງຊາວມຸດສະລິມ ແລະ ການປະຕິບັດອັນໂຫດຮ້າຍຕໍ່ນັກໂທດປາແລັສຕິນໃນຄຸກຢູ່ອິດສະລາແອນ.
ອ້າງອີງ:
- https://edition.cnn.com/middleeast/live-news/al-aqsa-storm-militants-infiltrate-israel-after-gaza-rockets-10-07-intl-hnk/index.html
- https://www.bbc.com/news/world-middle-east-67043563
- https://www.aljazeera.com/news/2023/10/7/world-is-watching-fears-grow-of-a-massive-gaza-invasion-by-israel
- https://www.reuters.com/world/middle-east/sirens-warning-incoming-rockets-sound-around-gaza-near-tel-aviv-2023-10-07/
