ໂມຣ໊ອກໂກເກີດແຜ່ນດິນໄຫວ 6,8 ແມກນິຈູດ ມີຜູ້ເສຍຊີວິດແລ້ວເກືອບ 300 ຄົນ
September 9, 2023 - 1:40 PM
ຄືນວັນທີ 8 ກັນຍາ ຕາມເວລາທ້ອງຖິ່ນ ເກີດເຫດແຜ່ນດິນໄຫວຄັ້ງໃຫຍ່ຂະໜາດ 6,8 ບໍລິເວນຕອນກາງຂອງປະເທດໂມຣ໊ອກໂກ ເຮັດໃຫ້ມີຜູ້ເສຍຊີວິດແລ້ວເກືອບ 300 ຄົນ, ບາດເຈັບອີກ 150 ກວ່າຄົນ ແລະ ສົ່ງຜົນໃຫ້ຊາວເມືອງຈຳນວນຫລາຍຕ່າງອອກມາຢູ່ຕາມຖະໜົນ ຖືເປັນເຫດແຜ່ນດິນໄຫວຄັ້ງຮຸນແຮງທີ່ສຸດຂອງໂມຣ໊ອກໂກໃນຮອບ 1 ກວ່າທົດສະວັດ.
ໜ່ວຍງານດ້ານທໍລະນີວິທະຍາຂອງອາເມລິກາ (USGS) ລະບຸວ່າ: ສູນກາງແຮງສັ່ນສະເທືອນຢູ່ເລິກລົງໄປປະມານ 18,5 ກິໂລແມັດ ແລະ ຢູ່ບໍ່ໄກຈາກພື້ນທີ່ທາງຕາເວັນຕົກສຽງໃຕ້ຂອງເມືອງມາຣາເກ ເມືອງທ່ອງທ່ຽວຍອດນິຍົມທີ່ມີປະຊາກອນອາໄສຢູ່ປະມານ 8,4 ແສນຄົນ.
ແຜ່ນດິນໄຫວຄັ້ງນີ້ເຮັດໃຫ້ເຮືອນຈໍານວນບໍ່ໜ້ອຍເປ່ເພເສຍຫາຍ, ບາງພື້ນທີ່ບໍ່ມີກະແສໄຟຟ້າໃຊ້ຊົ່ວຄາວ, ບາງຄອບຄົວຕິດຢູ່ພາຍໃຕ້ຊາກອາຄານທີ່ພັງລົງມາ. ເບື້ອງຕົ້ນທີມກູ້ໄພກໍາລັງເລັ່ງໃຫ້ການຊ່ວຍເຫລືອໂດຍດ່ວນແລ້ວ.
ອ້າງອີງ:
- https://edition.cnn.com/2023/09/08/africa/morocco-6-8-magnitude-earthquake-intl-hnk/index.html
- https://www.bbc.com/news/world-africa-66759069
- https://www.aljazeera.com/news/liveblog/2023/9/9/morocco-earthquake-live-news-powerful-6-8-magnitude-quake-shakes-morocco
