ເກີດເຫດແຜ່ນດິນໄຫວຢູ່ໂມຣັອກໂກ ດ້ວຍຄວາມແຮງສັ່ນສະເທືອນ 6,8 ຣິກເຕີ ມີຜູ້ເສຍຊີວິດແລ້ວເກືອບ 300 ຄົນ
ສຳນັກຂ່າວຕ່າງປະເທດ ABCNEWS ລາຍງານວັນທີ 9 ກັນຍາ 2023 ວ່າ: ເກີດເຫດແຜ່ນດິນໄຫວດ້ວຍຄວາມແຮງສັ່ນສະເທືອນ 6,8 ຣິກເຕີ ໃນເມືອງມາຣາເກສ ເມືອງທ່ອງທ່ຽວສຳຄັນ ຂອງໂມຣັອກໂກ, ສົ່ງຜົນໃຫ້ຕຶກອາຄານຫລາຍຫລັງພັງຖະຫລົ່ມລົງ, ເຊິ່ງປະຊາຊົນຕ່າງກໍພາກັນແລ່ນໜີຕາຍອອກມາຢູ່ກາງແຈ້ງ ຂະນະທີ່ໂຮງໝໍຕ້ອງເລັ່ງອົບພະຍົບຄົນເຈັບໄປ.
ໂດຍໃນສື່ສັງຄົມອອນລາຍມີການໂພສຄລິບວີດີໂອຂະນະທີ່ອາຄານພັງຖະຫລົ່ມລົງ ເຫລືອພຽງແຕ່ເສດຊາກຫັກພັງ, ໂດຍມີກຳແພງແດງທີ່ອ້ອມລ້ອມຮອບເມືອງມາຣາເກສ ເປັນເມືອງປະຫວັດສາດສຳຄັນ ແລະ ແຫ່ງມໍລະດົກໂລກຂອງອົງການຢູເນສໂກກໍພັງທະລາຍລົງບາງສ່ວນ.
ສ່ວນດ້ານກົມສຳຫລວດທໍລະນີວິທະຍາສະຫະລັດກ່າວວ່າ: ເຫດແຜ່ນດິນໄຫວດ້ວຍຄວາມແຮງສັ່ນສະເທືອນ 6,8 ຣິກເຕີ ເກີດຂຶ້ນໃນເວລາ 23:11 ໂມງຕາມເວລາທ້ອງຖິ່ນ, ມີຈຸດສູນກາງຂອງແຜ່ນດິນໄຫວຢູ່ໃຕ້ດິນປະມານ 18 ກິໂລແມັດ, ໂດຍສັ່ນສະເທືອນເປັນເວລາຫລາຍວິນາທີ ແລະ ຍັງມີການລາຍງານວ່າເກີດແຜ່ນດິນໄຫວລະດັບ 4,9 ຣິກເຕີທີ່ເກີດຂຶ້ນພາຍໃນ 19 ນາທີ ຫລື ອັບເຕີຊ໊ອກ, ໃນເບື້ອງຕົ້ນມີລາຍງານວ່າມີຜູ້ເສຍຊີວິດຢ່າງໜ້ອຍ 296 ຄົນ ແລະ ບາດເຈັບອີກຫລາຍຄົນ. ແຕ່ຍັງບໍ່ທັນມີຕົວເລກຢືນຢັນຢ່າງເປັນທາງການ ໂດຍແຮງສັ່ນສະເທືອນໃນຄັ້ງນີ້ ຮູ້ສຶກວ່າຢູ່ໄກເຖິງປະເທດສະເປນ, ແອລຈີເຣຍ ແລະ ປອກຕຸຍການ.
