ໄຟໄໝ້ປ່າຢູ່ຮາວາຍຮຸນແຮງສຸດໃນຮອບ 100 ກວ່າປີ ມີຜູ້ເສຍຊີວິດສູງເຖິງ 93 ຄົນ
ເຈົ້າຄອງລັດຮາວາຍ ກ່າວໃນລະຫວ່າງການຖະແຫລງຂ່າວໃນວັນທີ 12 ສິງຫາວ່າ: ຈຳນວນຜູ້ເສຍຊີວິດມີທ່າອ່ຽງເພີ່ມຂຶ້ນອີກ ເນື່ອງຈາກທີມກູ້ໄພທະຍອຍຄົ້ນພົບຮ່າງຂອງມະນຸດຢູ່ເປັນໄລຍະ ໂດຍຕອນນີ້ໝາກູ້ໄພທີ່ຖືກຝຶກມາເພື່ອດົມກິ່ນຫາຮ່າງຜູ້ເສຍຊີວິດ ໂດຍສະເພາະປະຕິບັດໜ້າທີ່ໄດ້ພຽງ 3% ຂອງເນື້ອທີ່ທີ່ໄດ້ຮັບຄວາມເສຍຫາຍເທົ່ານັ້ນ.
ໄຟປ່າໄດ້ລາມເຂົ້າໃນເມືອງ ໄດ້ເຜົາໄໝ້ສິ່ງປູກສ້າງເຊັ່ນອາຄານບ້ານເຮືອນ ຈົນເສຍຫາຍໜັກ ແລະ ມີຄົນເສຍຊີວິດຢ່າງນ້ອຍ 93 ຄົນ ເມື່ອວັນເສົາ 12 ສິງຫາ 2023 ທີ່ຜ່ານມາ, ຈົນເປັນເຫດໄຟປ່າທີ່ເຮັດໃຫ້ມີຜູ້ຄົນເສຍຊີວິດຫຼາຍທີ່ສຸດໃນຮອບ 100 ປີ.
ເຈົ້າໜ້າທີ່ລັດຮາວາຍກ່າວວ່າ: ກຳລັງເລັ່ງຄົ້ນຫາຜູ້ເຄາະຮ້າຍທີ່ເສຍຊີວິດໃນຊາກອາຄານ ບ້ານເຮືອນທີ່ໄຟປ່າໄດ້ລາມມາຮອດເມືອງລາໄຮນາ ເທິງເກາະເມົາລີ ເປັນເມືອງທ່ອງທ່ຽວທີ່ມີປະຊາຊົນອາໄສກວ່າ 12,000 ຄົນ ຕາມການລາຍງານຂອງໜ່ວຍງານຈັດການສະຖານະການສຸກເສີນຂອງສະຫະລັດ ຄາດຄວາມເສີຍຫາຍຈາກໄພພິບັດໄຟປ່າສູງເຖິງ 5,500 ລ້ານໂດລາ ໂດຍມີອາຄານ, ຮ້ານອາຫານ, ໂຮງແຮມ, ລີສອດ ຖືກເຜົາໄໝ້ເປັນຂີ້ເຖົ່າກວ່າ 2000 ແຫ່ງ ແລະ ປະຊາຊົນຫຼາຍພັນຄົນບໍ່ມີທີ່ຢູ່.
ເຈົ້າໜ້າທີ່ໄດ້ກຽມຫ້ອງພັກຢູ່ໂຮງແຮມ 1.000 ກວ່າຫ້ອງໄວ້ສຳລັບຊ່ວຍເຫລືອຜູ້ທີ່ຕ້ອງສູນເສຍບ່ອນຢູ່ອາໄສໄປຈາກໄຟໄໝ້ ແລະ ກຳລັງຈັດຫາອະສັງຫາລິມະຊັບໃຫ້ເຊົ່າເພື່ອເປັນບ່ອນພັກໃຫ້ປະຊາຊົນ ໂດຍບໍ່ຄິດຄ່າໃຊ້ຈ່າຍໃດໆ ໂດຍປັດຈຸບັນມີປະຊາຊົນຫລາຍກວ່າ 1.400 ຄົນ ທີ່ອາໄສຢູ່ໃນສູນສຸກເສີນ.
ເຫດການໄຟໄໝ້ປ່າທີ່ເກີດຂຶ້ນຖືເປັນໄພພິບັດຮຸນແຮງທີ່ສຸດເທົ່າທີ່ຮາວາຍເຄີຍຜະເຊີນມາ ໂດຍຈຳນວນຜູ້ເສຍຊີວິດປັດຈຸບັນເພີ່ມເກີນຈຳນວນຜູ້ເສຍຊີວິດຈາກເຫດສຶນາມິທີ່ຂ້າຊີວິດປະຊາຊົນເຖິງ 61 ຄົນໃນປີ 1960 ຫລື 1 ປີຫລັງຈາກທີ່ຮາວາຍມີສະຖານະເປັນລັດໜຶ່ງຂອງອາເມລິກາ. ອີກທັງຍັງເປັນຈຳນວນຜູ້ເສຍຊີວິດຈາກເຫດໄຟໄໝ້ປ່າສູງສຸດນັບແຕ່ປີ 1918 ເຊິ່ງໃນເວລາດັ່ງກ່າວເກີດໄຟໄໝ້ປ່າຂຶ້ນໃນລັດມິນນິໂຊຕາ ແລະ ວິສຄອນຊິນ ຂ້າຊີວິດປະຊາຊົນໄປ 453 ຄົນ.
ອ້າງອີງ:
