ລັດຖະມົນຕີກະຊວງກະສິກໍາ ແລະ ປ່າໄມ້ ລົງຊຸກຍູ້ສົ່ງເສີມສູນຄົ້ນຄວ້າ ກະສິກໍາເມືອງປາກຊ່ອງ ໃຫ້ນັບມື້ພັດທະນາຂຶ້ນ
ວັນທີ 4 ສິງຫາ 2023, ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ວຽກງານຢູ່ສູນຄົ້ນຄວ້າ ກະສິກໍາພາກໃຕ້ ຫລັກ 35 ເມືອງປາກຊ່ອງ ແຂວງຈໍາປາສັກ.
ທ່ານ ລັດຖະມົນຕີກະຊວງກະສິກໍາ ແລະ ປ່າໄມ້ ມີຄໍາເຫັນໂອ້ລົມໂດຍຍົກໃຫ້ຄະນະນໍາສູນ ເອົາໃຈໃສ່ນໍາພາ-ຊີ້ນໍາ, ປັບປຸງຍົກລະດັບປັບປຸງກໍ່ສ້າງພະນັກງານ, ສ້າງນັກຄົ້ນຄວ້າດ້ານວິຊາການ. ສ່ວນດ້ານວິຊາສະເພາະ ໃຫ້ສືບຕໍ່ຄົ້ນຄວ້າທົດລອງສ້າງ ແລະ ຜະລິດແນວພັນຂອງສູນຕົ້ນຕໍແມ່ນ ຊາ, ກາເຟ ແລະ ໄມ້ໃຫ້ໝາກ ໃຫ້ເປັນຂອງຕົນເອງ ແລ້ວສະເໜີຂຶ້ນທະບຽນ, ການເຄື່ອນໄຫວແຕ່ລະວຽກງານ ໃຫ້ຂຶ້ນແຜນຢ່າງລະອຽດຈະແຈ້ງ ແລ້ວສະເໜີຫາແຂວງ, ກະຊວງ ເພື່ອຂໍງົບປະມານສະໜັບສະໜູນ, ຂຶ້ນແຜນຊອກແຫລ່ງທຶນສະໜັບສະໜູນຈາກອົງການຈັດຕັ້ງຕ່າງໆຂອງສາກົນ ເພື່ອຂະຫຍາຍ ແລະ ປັບປຸງແນວພັນຂອງສູນໃຫ້ກວ້າງຂວາງ ທັງສອດຄ່ອງກັບສະພາບແວດລ້ອມຂອງແຕ່ລະທ້ອງຖິ່ນ, ສືບຕໍ່ຂຽນ-ປັບປຸງບັນດາເອກະສານ, ປຶ້ມຄູ່ມືທີ່ມີແລ້ວ ໃຫ້ສອດຄ່ອງກັບສະພາບແວດລ້ອມ ແລະ ມີຄວາມຮັບປະກັນ ທາງດ້ານຄຸນນະພາບຂອງຜົນຜະລິດ ຕິດພັນກັບການສ້າງລາຍຮັບເຂົ້າສູນ, ສ້າງຜົນປະໂຫຍດ ຕິດພັນກັບການເຄື່ອນໄຫວວຽກງານວິຊາສະເພາະ ມີລາຍຮັບທັງບຸກຄົນ ແລະ ການຈັດຕັ້ງ, ປັບປຸງກົນໄກແບແຜນວິທີເຮັດວຽກ ໃຫ້ຖືກຕ້ອງ ແລະ ສອດຄ່ອງຕາມແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ - ສັງຄົມຂອງລັດ ກໍຄືຂອງແຂວງ ແລະ ທ້ອງຖິ່ນ ເພື່ອເຮັດໃຫ້ວຽກງານຂອງສູນມີການພັດທະນານັບມື້ດີຂຶ້ນເລື້ອຍໆ.
