ກາຕາຮຽກຮ້ອງໃຫ້ເຈລະຈາ ເພື່ອຢຸດຕິວິກິດການອາຣັບ
ທ່ານ ເຊກ ທາມິນ ບິນ ຮາໝັດ ອັດທານີ ເຈົ້າຄອງລັດກາຕາ ຖະແຫຼງຮຽກຮ້ອງອີກເທື່ອໜຶ່ງໃຫ້ຈັດການເຈລະຈາໂດຍບໍ່ມີເງື່ອນໄຂ ເພື່ອຢຸດຕິວິກິດຂັດແຍ່ງລະຫວ່າງກາຕາກັບກຸ່ມປະເທດອາຣັບ. ຂະນະທີ່ປະທານາທິບໍດີ ໂດນັນ ທຣຳ ຜູ້ນຳອາເມລິກາ ກ່າວວ່າ: ບັນຫາດັ່ງກ່າວຈະໄດ້ຮັບການແກ້ໄຂໂດຍໄວ.
ເຈົ້າຄອງລັດກາຕາ ຖະແຫຼງໃນກອງປະຊຸມສະມັດຊາໃຫຍ່ສະຫະປະຊາຊາດ 193 ປະເທດວ່າ: ກາຕາຂໍຮຽກຮ້ອງໃຫ້ຈັດການເຈລະຈາໂດຍບໍ່ມີເງື່ອນໄຂອີກເທື່ອໜຶ່ງຕາມຫຼັກການເຄົາລົບອະທິປະໄຕຂອງປະເທດ. ກ່ອນໜ້ານີ້ ອາຣັບບີ ຊາອຸດິດ, ສະຫະນະຄອນ ອາເມຣັດ ເອມິເຣດ (UAE), ເອຢິບ ແລະ ບາເຣນ ປະກາດຕັດການພົວພັນທາງການທູດ ແລະ ການຄ້າກັບກາຕາໃນວັນທີ 5 ມິຖຸນາ ລວມທັງຢຸດເສັ້ນທາງຕິດຕໍ່ທາງອາກາດ ແລະ ການຂົນສົ່ງກັບກາຕາ ເຊິ່ງເປັນທີ່ຕັ້ງຖານທັບທະຫານແຫ່ງໃຫຍ່ທີ່ສຸດຂອງອາເມລິກາໃນພາກພື້ນດັ່ງກ່າວ. ນອກຈາກນີ້ ຜູ້ນຳອາເມລິກາ ແລະ ກາຕາ ຍັງໄດ້ຫາລືກັນໃນເວລາຕໍ່ມາ ເຊິ່ງເຈົ້າຄອງລັດກາຕາໄດ້ເນັ້ນເຖິງການພົວພັນທີ່ໝັ້ນແກ່ນລະຫວ່າງກາຕາກັບອາເມລິກາ ພາຍຫລັງປະທານາທິບໍດີ ທຣຳ ມີທ່າທີໂອນອ່ຽງໄປທາງອາຣັບບີ ຊາອຸດິດ ຫຼາຍກວ່າ.
