ສາມາດເກັບລາຍຮັບຄ່າທຳນຽມທາງ ແບບເອເລັກໂຕຣນິກ ໄດ້ 68,8 ຕື້ກີບ, ຈໍານວນພາຫະນະ 372.159 ຄັນ
July 14, 2023 - 3:22 PM
ວັນທີ 11 ກໍລະກົດ 2023 ຜ່ານມານີ້ ທ່ານ ບຸນປະເສີດ ສີກຸນລະບຸດ, ຫົວໜ້າກົມສ່ວຍສາອາກອນໃຫ້ຮູ້ວ່າ: ແຕ່ເດືອນ ມິຖຸນາ 2022 ເປັນຕົ້ນມາ ໃນການພັດທະນາລະບົບ ແລະ ປັດຈຸບັນ ໄດ້ສຳເລັດການຜັນຂະຫຍາຍ ລະບົບຄຸ້ມຄອງການເກັບລາຍຮັບຄ່າທຳນຽມທາງ ແບບເອເລັກໂຕຣນິກ ສ່ວຍສາອາກອນປະຈຳ 18 ແຂວງ, ສ່ວຍສາອາກອນ 148 ເມືອງ, ກອງຄຸ້ມຄອງພາຫະນະ ແລະ ການຂັບຂີ່ ໃນຂອບເຂດທົ່ວເທດ ແລະ ພ້ອມທັງຊຳລະຜ່ານລະບົບຂອງທະນາຄານທຸລະກິດ ໂດຍຜ່ານລະບົບ FinLink.
ຜ່ານການຈັດຕັ້ງປະຕິບັດຈັດເກັບລາຍຮັບຄ່າທໍານຽມທາງຮອດປະຈຸບັນ ແມ່ນສາມາດຈັດເກັບຄ່າທໍານຽມທາງໄດ້ປະມານ 68,8 ຕື້ກີບ, ຈໍານວນພາຫະນະ 372,159 ຄັນ, ທຽບໃສ່ແຜນການປີ 2023 ໄດ້ 55%, ທຽບໃສ່ປີຜ່ານມາແມ່ນ 41.6% ຂອງປີ 2022.
