ລີໂອເນວ ເມສຊີ່ ສຳເລັດຂໍ້ຕົກລົງ ຍ້າຍຮ່ວມ ອິນເຕີ ໄມອາມີ່ ໃນ ເມຈີລີກ ອາເມລິກາ ເຊິ່ງມີ ເດວິດ ເບັກແຮມ ເປັນເຈົ້າຂອງຮ່ວມ
ລີໂອເນລ ເມສຊີ່ ກອງໜ້າແຊ້ມໂລກອາເຈນຕິນາ ຕັດສິນໃຈເຂົ້າຮ່ວມທີມ ອິນເຕີ ໄມອາມີ່ ໃນ ເມຈີລີກ ຊັອກເກີ (MSS) ສະຫະລັດອາເມລິກາແລ້ວ. ອີງຕາມການຢືນຢັນຂອງນັກຂ່າວທີ່ມີຊື່ສຽງ Fabrizio Romano ແລະ ສື່ມວນຊົນຊັ້ນນໍາຫລາຍແຫ່ງໃນທົ່ວໂລກ.
ດາວຍິງເຈົ້າຂອງລາງວັນ ບັນລົງດໍ 7 ສະໄໝ ອຳລາ “PSG” ປາຣີ ແຊັງ-ແຊັກແມັງ ຫລັງຈາກສັນຍາຈະຫມົດອາຍຸໃນທ້າຍເດືອນມິຖຸນານີ້ ໃນຕອນທໍາອິດ, ຫລາຍຄົນຄາດວ່າເຂົາອາດຈະເລືອກທີ່ຈະກັບຄືນໄປຫາບາເຊໂລນາ, ຕົ້ນສັງກັດເກົ່າທີ່ປຸກປັ້ນຈົນມີຊື່ສຽງ. ຫລື ໄປເກັບເງິນກັບທີມໃນລີກໃນ ຊາອຸດິ ອາຣາເບຍ.
ຢ່າງໃດກໍ່ຕາມ, ກອງໜ້າທີມຊາດອາເຈນຕິນາ ແຊ້ມບານໂລກ 2022 ໄດ້ເລືອກຄວາມທ້າທາຍໃໝ່ກັບ ອິນເຕີ ໄມອາມີ່, ທີມທີ່ມີເຈົ້າຂອງຮ່ວມຄື ເດວິດ ເບັກແຮມ ຕຳນານຈອມປັ່ນຟີຄິກຂອງແມນຢູ. ໂດຍການຕັດສິນໃຈດັ່ງກ່າວຈະຖືກປະກາດຢ່າງເປັນທາງການໃນບໍ່ເທົ່າໃດຊົ່ວໂມງຂ້າງຫນ້ານີ້.
ໃນຂະນະດຽວກັນ, ມີລາຍງານວ່າ ອິນເຕີ ໄມອາມີ່ ໄດ້ຍື່ນຂໍ້ສະເໜີໃຫ້ ເມສຊີ່ ພິຈາລະນາ ເຊິ່ງເຮັດໃຫ້ລາວຍາກທີ່ຈະປະຕິເສດ ໂດຍ “ສະປອດ” ສື່ຊື່ດັງໃນສະເປນ. ເຜີຍໜຶ່ງໃນຂໍ້ສະເໜີດັ່ງກ່າວໜຶ່ງແມ່ນລາຍໄດ້ຈຳນວນ 43 ລ້ານປອນ ຕໍ່ປີ ຫລື ສະເລ່ຍປະມານ 830,000 ປອນ ຕໍ່ອາທິດ.
