ສານປະຊາຊົນແຂວງວຽງຈັນ ຕັດສິນຄະດີທຳສຳເລົາເດັກ ແລະ ຕັດສິນປະຫານຊີວິດຄະດີຢາເສບຕິດ 1 ຄົນ

ປກສ ແຂວງວຽງຈັນ ລາຍງານໃຫ້ຮູ້ວ່າ: ວັນທີ 11 ພຶດສະພາ 2023 ຜ່ານມານີ້ ສານປະຊາຊົນແຂວງວຽງຈັນ ຕັດສິນຄະດີຈໍາເລີຍຈໍານວນ 5 ຄົນຄື:

1. ທ້າວ ສົມບູນ ອາຍຸ 59 ປີ,ອາຊີບ ຊາວນາ ຢູ່ບ້ານ ແຈ້ງ ເມືອງທຸລະຄົມ ແຂວງວຽງຈັນຖືກກັກຕົວ ຄັ້ງວັນທີ 22 ເມສາ 2021 ໃນຂໍ້ກ່າວຫາ ທຳສຳເລົາເດັກ,  ຖືກຕັດສິນລົງໂທດຕັດອິດສະຫຼະພາບ 3 ປີ, ປັບໃໝ 5 ລ້ານກີບ ພ້ອມທັງໃຊ້ແທນຄ່າສິ້ນເປືອງໃນການໄປມາພົວພັນຄະດີ 500.000 ກີບ ແລະ ເສຍຄ່າທຳນຽນ ແລະ ຄ່າສຳເນົາເອກະສານຕ່າງໆ 105.000 ກີບ.
2. ທ້າວ ໄມສີ ຫຼື ເຫວ ອາຍຸ 37 ປີ ອາຊີບ ຊາວນາ ຢູ່ບ້ານ ແຈ້ງ ເມືອງ ທຸລະຄົມ ແຂວງວຽງຈັນ ຖືກກັກຕົວ ຄັ້ງວັນທີ 17 ເມສາ 2023 ໃນຂໍ້ກ່າວຫາ ທຳສຳເລົາເດັກ, ຖືກຕັດສິນລົງໂທດຕັດອິດສະຫຼະພາບ 3 ປີ ປັບໃໝ 5 ລ້ານກີບ ໃຊ້ແທນຄືນຄ່າປົວແປງຈິດໃຈທຳອູ່ສູ່ຂວັນ 000.000 ກີບ, ຄ່າສິ້ນເປືອງການໄປມາຫາໝໍ ແລະ ເກີດລູກ 2.500.000 ກີບ, ຄ່າສິ້ນເປືອງໄປມາພົວພັນຄະດີ 2.500.000 ກີບ, ຄ່າລ້ຽງດູລູກນ້ອຍ ແຕ່ 1 ວັນ ຈົນຮອດ 18 ປີ ແລະ ເສຍຄ່າທຳນຽນ ແລະ ຄ່າສຳເນົາເອກະສານຕ່າງໆ 105.000 ກີບ.
3. ທ້າວ ສຸກສັນ ອາຍຸ 36 ປີ ອາຊີບເຮັດນາ ຢູ່ບ້ານ ແຈ້ງ ເມືອງທຸລະຄົມ ແຂວງວຽງຈັນ ຖືກກັກຕົວຄັ້ງວັນທີ 14 ສິງຫາ 2019 ໃນຂໍ້ກ່າວຫາຄ້າຂາຍຢາເສບຕິດ ປະເພດຢາບ້າ ຈໍານວນ 196 ເມັດ, ຖືກຕັດສິນລົງໂທດຕັດອິດສະຫຼະພາບຈຳເລີຍ 5 ປີ ປັບໃໝ 10 ລ້ານກີບ.
4. ທ້າວ ຄໍານ້ອຍ ອາຍຸ 42 ປີ ຢູ່ບ້ານ ເກີນກາງ ເມືອງທຸລະຄົມ ແຂວງວຽງຈັນ ຖືກກັກຕົວໃນຄັ້ງວັນທີ 21 ສິງຫາ 2019 ໃນຂໍ້ກ່າວຫາມີຢາບ້າໄວ້ໃນຂອບຄອງ, ຊຸກເຊື່ອງ, ການຄ້າຂາຍຊັບຢ່າງຜິດກົດໝາຍ ປະເພດຢາບ້າ 168 ເມັດ, ລົດຈັກ 4 ຄັນ, ຖືກຕັດສິນລົງໂທດຕັດອິດສະຫຼະພາບ 7 ປີ 9 ເດືອນ ປັບໃໝ 18 ລ້ານກີບ.
5. ທ້າວ ແທ່ນ ອາຍຸ 40 ປີ ອາຊີບ ເຮັດນາ ຢູ່ບ້ານ ນາໝໍ້ ເມືອງໝື່ນ ແຂວງວຽງຈັນ ຖືກກັກຕົວ ຄັ້ງວັນທີ 27 ກັນຍາ 2019 ໃນຂໍ້ກ່າວຫາຄ້າຂາຍຢາເສບຕິດ ປະເພດຢາບ້າ ຈຳນວນ 10,000 ເມັດ ເທົ່າກັບ 5 ມັດ, ຢາໄອ 2 ຖົງ, ຖືກຕັດສິນລົງໂທດຕັດອິດສະຫຼະພາບຈຳເລີຍ ປະຫານຊິວິດ.