ການຄ້ານະຄອນຫຼວງວຽງຈັນ ອອກແຈ້ງການໃຫ້ເອົາໃສໃນການຊື້-ຂາຍ ແລະ ຊົມໃຊ້ການບໍລິການຜ່ານທາງອອນລາຍ
ວັນທີ 12 ເມສາ 2023 ຜ່ານມານີ້ ພະແນກອຸດສາຫະກໍາແລະການຄ້າ ນະຄອນຫຼວງວຽງຈັນ ອອກແຈ້ງການ ເຖິງບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ດຳເນີນການຄ້າຂາຍ ຫຼື ຊື້, ຊົມໃຊ້ ສິນຄ້າ ຫຼື ການບໍລິການຜ່ານທາງເອເລັກໂຕຣນິກ ໃນທົ່ວນະຄອນຫຼວງວຽງຈັນ, ເລື່ອງໃຫ້ເອົາໃຈໃສ່ໃນການຊື້-ຂາຍ ແລະ ຊົມໃຊ້ການບໍລິການຜ່ານທາງເອເລັກໂຕຣນິກ ໃຫ້ມີຄວາມຮັບປະກັນຜົນປະໂຫຍດທັງຜູ້ຊື້ ແລະ ຜູ້ຂາຍ.
ການຊື້-ຂາຍ ແລະ ການຊົມໃຊ້ການບໍລິການຜ່ານທາງເອເລັກໂຕຣນິກ ໄດ້ມີບົດບາດເຂົ້າມາໃນລະບົບການຄ້າ-ຂາຍຢ່າງກວ້າງຂວາງ ແລະ ໄວວາ ຢູ່ໃນນະຄອນຫຼວງວຽງຈັນ, ຊຶ່ງເປັນພາກສ່ວນການບໍລິການໜຶ່ງທີ່ສຳຄັນໃນການພັດທະນາເສດຖະກິດ-ສັງຄົມ ເຮັດໃຫ້ເສດຖະກິດມີການຂະຫຍາຍຕົວ, ພ້ອມກັນນັ້ນກໍເປັນເງື່ອນໄຂສະດວກໃຫ້ແກ່ຜູ້ຊື້ ແລະ ຜູ້ຂາຍ ໄດ້ພົບກັນໃນຊ່ອງທາງເອເລັກໂຕຣນິກ, ຄຽງຄູ່ກັນນັ້ນ ການບໍລິການຜ່ານຊ່ອງທາງດັ່ງກ່າວ ເນື່ອງຈາກບໍ່ໄດ້ພົບປະຊ່ອງໜ້າກັນ ແລະ ເບີ່ງສິນຄ້າຕົວຈິງ ເຮັດໃຫ້ເກີດມີສະພາບການສະເໜີຜ່ານສາຍດ່ວນ 1510 ເພີ່ມຂຶ້ນ ເຊັ່ນ: ສິນຄ້າບໍ່ມີຄຸນນະພາບ, ບໍ່ກົງກັບການໂຄສະນາ, ຊື້-ຂາຍກັນແລ້ວ ມີບັນຫາເກີດຂຶ້ນກໍບໍ່ສາມາດພົວພັນໄດ້, ຈຶ່ງມີຄວາມຈຳເປັນໃນການແກ້ໄຂ ແລະ ຮ່ວມມືກັນ ເພື່ອໃຫ້ເປັນປະໂຫຍດທັງຜູ້ຊື້້ ແລະ ຜູ້ຂາຍ
- ບຸກຄົນ, ນິຕິບຸກຄົນ ຫລື ການຈັດຕັ້ງທີ່ຊື້, ຊົມໃຊ້ ສິນຄ້າ ຫລື ການບໍລິການທາງເອເລັກໂຕຣນິກ່ອນຈະສະເໜີສ້າງສັນຍາທາງເອເລັກໂຕຣນິກ ສະແດງເຈດຈໍານົງສັ່ງຊື້ ສິນຄ້າ ແລະ ການບໍລິການ ຜ່ານລະບົບຄໍາສັ່ງຊື້ທາງເອເລັກ ໂຕຣນິກ ຫຼື ຜ່ານບັນຊີສື່ສັງຄົມອອນລາຍຂອງຕົນ ຕາມຂໍ້ມູນ ແລະ ເງື່ອນໄຂທີ່ຜູ້ຄ້າ ກໍານົດໄວ້ໃນຊ່ອງທາງເອເລັກ ໂຕຣນິກ ຄວນມີການກວດກາລາຍລະອຽດການສະຫນອງຂໍ້ມູນໃນເວລາວາງຈໍາຫນ່າຍສິນຄ້າ ແລະ ການບໍລິການ ດັ່ງນີ້:
– ຂໍ້ມູນ ກ່ຽວກັບການດໍາເນີນທຸລະກິດເປັນຕົ້ນຊື່, ທີ່ຢູ່ຖາວອນ, ຂໍ້ມູນຕິດຕໍ່, ໃບທະບຽນວິສາຫະກິດ ຫຼື ໃບ ອະນຸຍາດດໍາເນີນທຸລະກິດ;
– ຂໍ້ມູນ ກ່ຽວກັບສິນຄ້າ ຫຼື ການບໍລິການ ເປັນຕົ້ນ ຂະຫນາດ, ສີ, ຮູບປະພັນ ແລະ ລັກສະນະສະເພາະອື່ນ ໃຫ້ ຖືກຕ້ອງຕາມສະຫຼາກ;
– ຂໍ້ມູນ ກ່ຽວກັບລາຄາ ເປັນຕົ້ນລາຄາສິນຄ້າ ຫຼື ການບໍລິການ ຕໍ່ຫົວຫນ່ວຍ ຫຼື ຕໍ່ຄັ້ງ ແລະ ຄ່າໃຊ້ຈ່າຍອື່ນທີ່ກ່ຽວຂ້ອງ;
– ຂໍ້ມູນ ກ່ຽວກັບການຂົນສົ່ງ ເປັນຕົ້ນ ຮູບແບບການຈັດສົ່ງ, ເວລາກໍານົດ ແລະ ມູນຄ່າການຈັດສົ່ງ;
– ຂໍ້ມູນ ກ່ຽວກັບການຊໍາລະ ເປັນຕົ້ນ ຮູບແບບການຊໍາລະ ແລະ ໄລຍະເວລາການຊໍາລະ;
– ຂໍ້ມູນ ກ່ຽວກັບຄວາມພໍໃຈຂອງລູກຄ້າ ເປັນຕົ້ນ ເນື້ອໃນ ແລະ ຈໍານວນ ຄໍາເຫັນຂອງລູກຄ້າຕໍ່ກັບສິນຄ້າ ແລະ ການ ບໍລິການ ສໍາລັບຜູ້ໃຫ້ບໍລິການຕະຫຼາດທາງເອເລັກໂຕຣນິກ;
– ຂໍ້ມູນ ກ່ຽວກັບເງື່ອນໄຂ ແລະ ຂໍ້ກໍານົດຂອງທຸລະກິດການຄ້າທາງເອເລັກໂຕຣນິກ ເປັນຕົ້ນ ແຫຼ່ງທີ່ມາຂອງສິນຄ້າ ຫຼື ການບໍລິການ, ນະໂຍບາຍການສົ່ງຄືນ ແລະ ການຮັບປະກັນສິນຄ້າ ຫຼື ການບໍລິການ;
– ຂໍ້ມູນ ຕ້ອງສາມາດ ເກັບຮັກສາ, ພິມ ແລະ ສະແດງ ໃນລະບົບຂໍ້ມູນຂ່າວສານຂອງລູກຄ້າ ຊຶ່ງສາມາດເຂົ້າເຖິງໄດ້ ໃນພາຍຫຼັງ.
- ໃນກໍລະນີສັ່ງຊື້ ສິນຄ້າ ຫຼື ການບໍລິການ ມີຂໍ້ຂັດແຍ່ງກ່ຽວກັບການຄ້າທາງເອເລັກໂຕຣນິກ ໂດຍສະເພາະສິນຄ້າ ຫຼື ການບໍລິການ ທີ່ບໍ່ມີຄຸນນະພາບ, ບໍ່ໄດ້ມາດຕະຖານ ຕາມອົງການທີ່ກ່ຽວຂ້ອງກໍານົດໄວ້ ແລະ ອື່ນໆ ເຊິ່ງມີຜົນກະທົບຕໍ່ຊີວິດ, ສຸຂະພາບ, ຊັບສິນ, ສິດ ແລະ ຜົນປະໂຫຍດ ຄູ່ກໍລະນີ ສາມາດແກ້ໄຂຂໍ້ຂັດແຍ່ງດ້ວຍການປຶກສາຫາລື ແລະ ປະນີປະນອມກັນ ເພື່ອໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ ໂດຍປະຕິບັດຕາມຂັ້ນຕອນທີ່ໄດ້ກໍານົດໄວ້ໃນກົດໝາຍ ແລະ ລະບຽບການ, ຖ້າບໍ່ສາມາດແກ້ໄຂໄດ້ແມ່ນໃຫ້ຮີບຮ້ອນເກັບກໍາຂໍ້ມູນທັງໝົດກ່ຽວກັບການປະກາດຂາຍ, ຂໍ້ມູນການສົນທະນາ, ເບີໂທ, ເລກບັນຊີທະນາຄານ, ຫຼັກຖານການໂອນເງິນ ເພື່ອແຈ້ງຕໍ່ສາຍດ່ວນ ປົກປ້ອງຜູ້ຊົມໃຊ້ ເບີໂທ1510 ຂອງກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ ຫຼື ແຈ້ງຕໍ່ອົງການຄຸ້ມ ຄອງວຽກງານການຄ້າທາງເອເລັກໂຕຣນິກ ເພື່ອດໍາເນີນການແກ້ໄຂຕາມຂັ້ນຕອນ.
- ຜູ້ດໍາເນີນການຄ້າທາງເອເລັກໂຕຣນິກຕ້ອງປະຕິບັດສິດ ແລະ ພັນທະຕາມທີ່ໄດ້ກໍານົດໄວ້ໃນດໍາລັດວ່າດ້ວຍການຄ້າ ທາງເອເລັກໂຕຣນິກ ສະບັບເລກທີ 296/ລບ, ລົງວັນທີ 12 ເມສາ 2021 ຢ່າງເຂັ້ມງວດ.
- ຂໍ້ຫ້າມສໍາລັບຜູ້ດໍາເນີນການຄ້າທາງເອເລັກໂຕຣນິກມີພຶດຕິກໍາດັ່ງນີ້:
– ດໍາເນີນທຸລະກິດ ໂດຍບໍ່ແຈ້ງການຄ້າທາງເອເລັກໂຕຣນິກ ຕາມກໍານົດໄວ້ໃນດໍາລັດວ່າດ້ວຍການຄ້າທາງເອເລັກ ໂຕຣນິກ ແລະ ລະບຽບການທີ່ກ່ຽວຂ້ອງ.
– ດໍາເນີນທຸລະກິດທີ່ບໍ່ສອດຄ່ອງກັບຂອບເຂດທີ່ໄດ້ແຈ້ງ.
– ດໍາເນີນທຸລະກິດຄ້າຂາຍສິນຄ້າ ຫຼື ການບໍລິການ ເກືອດຫ້າມ ຕາມທີ່ໄດ້ກໍານົດໄວ້ໃນກົດໝາຍ ແລະ ລະບຽບການ;
– ດໍາເນີນການລະດົມທຶນ ຜ່ານຊ່ອງທາງການຄ້າທາງເອເລັກໂຕຣນິກ ໂດຍບໍ່ໄດ້ຮັບອະນຸຍາດ.
– ສະຫນອງຂໍ້ມູນກ່ຽວກັບສິນຄ້າ ຫຼື ການບໍລິການ ໂດຍບໍ່ສອດຄ່ອງກັບສິນຄ້າ ຫຼື ການບໍລິການຕົວຈິງ.
– ເກັບກໍານໍາໃຊ້ ຫຼື ເຜີຍແຜ່ຂໍ້ມູນຂອງລູກຄ້າໂດຍບໍ່ໄດ້ຮັບອະນຸຍາດ.
– ສົ່ງຂໍ້ຄວາມທີ່ເປັນການໂຄສະນາ ສິນຄ້າ ຫຼື ຄ່າບໍລິການຂອງຕົນ ເກີນຂອບເຂດທີ່ກໍານົດໄວ້;
– ມີພຶດຕິກໍາອື່ນ ທີ່ເປັນການລະເມີດ ກົດໝາຍ ແລະ ລະບຽບການ.
- ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ລະເມີດກົດໝາຍ ແລະ ລະບຽບການ ກ່ຽວກັບວຽກງານການຄ້າທາງເອເລັກ ໂຕຣນິກ ຈະຖືກປະຕິບັດມາດຕະການກ່າວເຕືອນ, ສຶກສາອົບຮົມ, ປັບໃໝ ໃນແຕ່ລະກໍລະນີ ເລີ່ມແຕ່ 1.000.000 ກີບ ຫາ 10.000.000 ກີບ ແລະ ປະຕິບັດມາດຕະການທາງບໍລິຫານອື່ນ, ໃຊ້ແທນຄ່າເສຍຫາຍທາງແພ່ງ ແລະ/ຫຼື ຮັບຜິດຊອບທາງອາຍາ ຕາມແຕ່ກໍລະນີເບົາ ຫຼື ໜັກ ຕາມກົດໝາຍ ແລະ ລະບຽບການທີ່ກ່ຽວຂ້ອງ.
- ມອບໃຫ້ຂະແຫນງການຄ້າພາຍໃນ, ຫ້ອງການອຸດສາຫະກໍາ ແລະ ການຄ້າ 9 ຕົວເມືອງປະສານສົມທົບຂະແຫນງການທີ່ກ່ຽວຂ້ອງນໍາເອົາເນື້ອໃນແຈ້ງການສະບັບນີ້ໄປໂຄສະນາ, ເຜີຍແຜ່ໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງ ທັງ ພາຍໃນ ແລະ ຕ່າງປະເທດ ທີ່ເຄື່ອນໄຫວຢູ່ນະຄອນຫຼວງວຽງຈັນໃຫ້ຮັບຊາບຢ່າງກວ້າງຂວາງ.
ດັ່ງນັ້ນ, ຈຶ່ງແຈ້ງມາຍັງບັນດາທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດດ້ວຍ.
