ມີຜູ້ຕິດເຊື້ອມາລາເລຍ-ໄຂ້ເລືອດອອກ ຈຳນວນຫລາຍຫລັງນ້ຳຖ້ວມໃຫຍ່ຢູ່ອາຊີໃຕ້

​ເຈົ້າໜ້າ​ທີ່ ​ແລະ ໜ່ວຍ​ງານ​ບັນ​ເທົາ​ທຸກ ກ່າວ​ວ່າ: ປະຊາຊົນ​ນັບ​ໝື່ນ​ຄົນ​ໄດ້​ຮັບ​ເຊື້ອພະຍາດ​ຖອກທ້ອງ​, ມາ​ລາ​ເລຍ ​ແລະ ​ໄຂ້​ເລືອດ​ອອກ​ລະບາດ​ຢູ່​ບັງ​ກະລາ​ເທດ ​ແລະ ​ເນ​ປານ, ຂະນະ​ທີ່​ລະດັບ​ນ້ຳຈາກ​ອຸ​ທົກ​ກະ​ໄພ​ຄັ້ງຮຸນ​ແຮງ​ທີ່​ສຸດ​ໃນ​ຮອບ 10 ປີ​ເລີ່​ມບັນ​ເທົາ​ລົງ​ແລ້ວ.

ປະຊາຊົນ​ກວ່າ 1.400 ຄົນ​ເສຍ​ຊີວິດ​ຈາກ​ນ້ຳຖ້ວມ​ຢູ່​ອາຊີ​ໃຕ້​ໄລຍະ 2 ​ເດືອນ​ຜ່ານ​ມາ ​ແລະ ອີກ​ຫລາຍ​ໝື່ນ​ຄົນ​ຕ້ອງ​ອາ​ໄສ​ຢູ່​ໃນ​ເຕັ້ນ ​ແລະ ​ໂຮງຮຽນ. ທ່ານ ມາຣຕິນ ຟໍ​ເລີ ຮອງ​ຜູ້ອຳນວຍການ​ຄະນະ​ກຳມະການ​ກາ​ແດງ​ສາກົນ ປະຈຳ​ພາກພື້ນອາຊີ-ປາຊີ​ຟິກ ກ່າວ​ວ່າ: ຄົນ​ເຫລົ່າ​ນີ້​ຕ້ອງການ​ການ​ຊ່ວຍ​ເຫລືອ ​ແລະ ພວກ​ເຂົາ​ຈະ​ດຳ​ເນີນ​ການ​ຢ່າງ​ດີ​ທີ່​ສຸດ ​ເພື່ອ​ໃຫ້​ພຽງພໍ​ຕໍ່​ຄວາມ​ຕ້ອງການ, ປະຊາຊົນ​ປະມານ 13.000 ຄົນ​ປ່ວຍ​ຈາກ​ພະຍາດ​ຖອກທ້ອງ ​ແລະ ຕິດ​​ເຊື້ອລະບົບ​ທາງ​ເດີນ​ຫາຍ​ໃຈຢູ່​ບັງ​ກະລາ​ເທດ ພາຍຫລັງ​ນ້ຳຖ້ວມ​ທາງ​ພາກ​ເໜືອ. ກາ​ແດງ​ບັງ​ກະລາ​ເທດ​ຖະ​ແຫລ​ງວ່າ: ພົບ​ພະຍາດ​ລະບາດ​ເຊັ່ນ: ຖອກທ້ອງ, ມາລາ​ເລຍ ​ແລະ ​ໄຂ້​ເລືອດ​ອອກ​ເພີ່ມ​ຂຶ້ນ​ຢູ່​ບາງ​ພື້ນທີ່ ​ແລະ ຕ້ອງ​ປ້ອງ​ກັນ​ບໍ່​ໃຫ້​ມີ​ລາຍ​ງານ​ຜູ້​ເສຍ​ຊີວິດ ​ແລະ ຕິດ​ເຊື້ອອີກ, ສ່ວນ​ຢູ່​ເນ​ປານ​ມີ​ລາຍ​ງານ​ຜູ້​ປ່ວຍ 26.944 ຄົນ. ອົງການ​ເຊ​ຟ​ເດ​ອະ​ຊິ​ລ​ເດນ​ລາຍ​ງານ​ວ່າ: ​ເດັກນ້ອຍ 17 ລ້ານ​ຄົນ​ຈຳ​ເປັນ​ຕ້ອງ​ໄດ້​ຮັບ​ການ​ເບິ່ງ​ແຍງ​ດ້ານ​ສາທາລະນະ​ສຸກ ​ແລະ ​ໂພຊະ​ນາ​ການ​ຢູ່​ອິນ​ເດຍ.