ພັອດເຕີ ຍົກຄວາມດີໃຫ້ລູກທີມ ຫລັງຄວ້າໄຊຊະນະຈາກ ດັອດມຸນ ເຂົ້າຮອບ 8 ທີມ ແຊ້ມປຽນລີກ
ແກຣມ ພັອດເຕີ ຫົວຫນ້າຄູຝຶກ ເຊວຊີ ຍົກຄວາມດີໃຫ້ກັບລູກທີມທີ່ຮ່ວມໃຈກັນສູ້ຈົນເອົາຊະນະ ບຸຣຸສເຊຍ ດັອດມຸນ ຜ່ານເຂົ້າສູ່ຮອບ 8 ທີມໄດ້ສຳເລັດ.
ສິງໂຕນ້ຳເງິນຄາມ ເປີດບ້ານເອົາຊະນະ ເສືອເຫລືອງ 2-0, ລວມຜົນການແຂ່ງຂັນທັງສອງເກມຜ່ານເຂົ້າຮອບໄປດ້ວຍຄະແນນລວມ 2-1, ເຊິ່ງຄູຝຶກຊາວອັງກິດ ຍອມຮັບວ່າເປັນເກມທີ່ເຄັ່ງຕຶງຫລາຍ. ແລະ ຕ້ອງມອບຄວາມດີໃຫ້ກັບລູກທີມທີ່ບໍ່ຍອມແພ້ຈົນກ່ວານາທີສຸດທ້າຍ.
“ຂ້ອຍບອກຄວາມຮູ້ສຶກບໍ່ຖືກ ມັນມີຫລາຍອາລົມໃນໂຕຂ້ອຍ. ມັນເຄັ່ງຕຶງຫລາຍໃນຕອນທ້າຍເກມ ແຕ່ຂ້ອຍຄິດວ່າລູກທີມຂອງຂ້ອຍເຮັດໄດ້ເກັ່ງຫລາຍ. ໂດຍສະເພາະເຄິ່ງທໍາອິດ ພວກເຮົາສ້າງໂອກາດທີ່ດີ. ຂ້ອຍດີໃຈທີ່ ເຮົາຊະນະ ແລະ ມັນເພື່ອທຸກຄົນທີ່ຢູ່ທີ່ນີ້, ” ພັອດເຕີ ກ່າວ.
“ມັນເປັນຄວາມຮູ້ສຶກທີ່ດີຫລາຍໃນຫ້ອງແຕ່ງຕົວ. ທຸກຄົນມີຄວາມສຸກ ພວກເຮົາຢູ່ໃນເວລາທີ່ຫຍຸ້ງຍາກ. ເກມນີ້ມີຄວາມຫມາຍຫລາຍສໍາລັບພວກເຮົາ. ພວກເຮົາຕ້ອງການທີ່ຈະຜ່ານເຂົ້າໄປໃນຮອບ 8 ທີມ ແລະ ພວກເຮົາເຮັດໄດ້ສຳເລັດ.”
