ເຈົ້າໜ້າທີ່ພາສີ ປະຈຳຈຸດປະສານງານນາເຕີຍ ຫລວງນ້ຳທາ ກວດກາ ແລະ ຢຶດລົດ Land Rover ໝົດກຳນົດ D53 ໄລຍະ 3 ປີ
ອີງຕາມກະຊວງການເງິນລາຍງານວ່າ: ເວລາ 19:00 ໂມງຂອງວັນທີ 21 ພະຈິກ 2022, ເຈົ້າໜ້າທີ່ພາສີພະແນກສືບສວນ-ສອບສວນ ແລະ ປາບປາມການລັກລອບໜີພາສີ (ພສປ) ປະຈຳຈຸດປະສານງານນາເຕີຍ ແຂວງຫລວງນໍ້າ, ໄດ້ຮັບແຫລ່ງຂ່າວຈາກພົນລະເມືອງດີແຈ້ງວ່າມີລົດໃຫຍ່ປະເພດລົດຈິບ, ຍີ່ຫຍໍ້: Land Rover, ສີຂາວຕິດແຜ່ນປ້າຍທະບຽນ ກຂ 9511 (ປ້າຍເອກະຊົນສະຫວັນນະເຂດ). ເຊິ່ງເປັນລົດສວມແຜນປ້າຍທະບຽນຂອງລົດຄັນອື່ນ.
ພາຍຫລັງໄດ້ຮັບຂ່າວເຈົ້າໜ້າທີ່ປະຈຳດ່ານຈຶ່ງໄດ້ອອກເຄື່ອນໄຫວຕິດຕາມພໍຮອດເວລາປະມານ 19:15 ໂມງໄດ້ພົບເຫັນລົດຄັນເປົ້າໝາຍແລ່ນລົງມາຮອດຈຸດປະສານງານນາເຕີຍ ແລະ ເຈົ້າໜ້າທີ່ໄດ້ຂໍອະນຸຍາດກວດກາເຫັນວ່າມີ: ໃບແຈ້ງພາສີສຳລັບພາຫະນະນຳເຂົ້າທ່ອງທ່ຽວຢ້ຽມຢາມ (D53) ນໍາເຂົ້າມາແຕ່ປີ 2019 ແລະ ມີເອກະສານອື່ນໆກ່ຽວກັບລົດແຕ່ມາຮອດປັດຈຸບັນເຫັນໝົດກໍານົດເວລາມາໄດ້ 3 ປີແລ້ວ.
ປັດຈຸບັນໄດ້ດຳເນີນຂັ້ນຕອນສືບສວນ-ສອບສວນ ແລະ ໄດ້ມອບສຳນວນຄະດີ, ພາຫະນະຂອງກາງໃຫ້ພາສີ ປະຈຳແຂວງຫລວງນ້ຳທາ, ເປັນຜູ້ດຳເນີນການແກ້ໄຂຄະດີຕາມຂັ້ນຕອນຂອງກົດໝາຍ ແລະ ລະບຽບການ.
