ພິທີສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ສ. ຕີມໍ-ເລສ໌ເຕ ຄົບຮອບ 20 ປີ

ທ່ານ ນາງ ມາເຣຍ ຣີນາຕາ ເດິ ການດາສ ຈີຊຸສ (Maria Renata de Jesus), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສ.ຕີມໍ-ເລສ໌ເຕ ໄດ້ກ່າວປາໄສ ໂດຍສະແດງໃຫ້ເຫັນເຖິງສາຍພົວພັນອັນດີງາມ ລະຫວ່າງສອງປະເທດ ຕີມໍ-ເລສ໌ເຕ ແລະ ສປປ ລາວ ໃນຕະຫຼອດໄລຍະ 20 ປີຜ່ານມາ ພ້ອມທັງໄດ້ສະແດງຄວາມຂອບໃຈຢ່າງເລິກເຊິ່ງ ມາຍັງລັດຖະບານລາວ ແລະ ບັນດາປະເທດສະມາຊິກອາຊຽນ ທີ່ໄດ້ໃຫ້ການສະໜັບສະໜູນແກ່ ຕີມໍ-ເລສເຕ ຕະຫຼອດມາ ກໍ່ຄືການສະໜັບສະໜູນຂອງບັນດາຄູ່ຮ່ວມມືພາຍນອກ, ຊຶ່ງ ຕີມໍ-ເລສ໌ເຕ ຈະສືບຕໍ່ເຮັດວຽກຢ່າງຕັ້ງໜ້າເພື່ອຮັບປະກັນການເຂົ້າເປັນສະມາຊິກຂອງ ຕີມໍ-ເລັສ໌ເຕ ໃນອະນາຄົດ. ພ້ອມດຽວກັນນີ້, ສະຖານທູດ ຕີມໍ-ເລສ໌ເຕ ປະຈຳ ສປປ ລາວ ຈະສືບຕໍ່ສົມທົບກັບກະຊວງການຕ່າງປະເທດ ແລະ ບັນດາກະຊວງທີ່ກ່ຽວຂ້ອງ ໃນການປະສານງານ ແລະ ຕິດຕາມບັນດາບັນຫາດ້ານວິຊາການທີ່ພົ້ນເດັ່ນ ຮັດແໜ້ນການຮ່ວມມືໃນຂົງເຂດຕ່າງໆ ທີ່ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ ເປັນຕົ້ນເເມ່ນ ການຮ່ວມມືສອງຝ່າຍ, ຫຼາຍຝ່າຍ ແລະ ພາກພື້ນ ເພື່ອເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອອັນຍາວນານ ແລະ ການຮ່ວມມືທີ່ດີງາມລະຫວ່າງ ຕີມໍ-ເລສ໌ເຕ-ລາວ ໃຫ້ນັບມື້ນັບໄດ້ຮັບການພັດທະນາກ້າວຂຶ້ນ.

ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຕາງໜ້າລັດຖະບານລາວ ແລະ ປະຊາຊົນລາວ ສະແດງຄວາມຍິນດີ ແລະ ອວຍພອນໄຊອັນປະເສີດມາຍັງລັດຖະບານ ແລະ ປະຊາຊົນ ແຫ່ງ ສ. ຕີມໍ-ເລສເຕ ເນື່ອງໃນໂອກາດວັນປະກາດເອກະລາດ ຄົບຮອບ 47 ປີ, ພ້ອມທັງຊົມເຊີຍການພົວພັນຮ່ວມມືລະຫວ່າງ ລາວ ແລະ ຕີມໍ-ເລສ໌ເຕ ນັບເເຕ່ມີການລົງນາມໃນສັນຍາສ້າງຕັ້ງການພົວພັນທາງການທູດ ໃນວັນທີ 27 ກໍລະກົດ 2002, ຊຶ່ງຖືໄດ້ວ່າເປັນຂີດໝາຍປະ ຫວັດສາດໃນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຂອງພວກເຮົາທີ່ໄດ້ຕອບສະໜອງຄວາມມຸ່ງມາດປາດຖະໜາຂອງປະຊາຊົນສອງຊາດ, ຊຶ່ງຕະຫຼອດ 2 ທົດສະວັດ ແຫ່ງການພົວພັນລະຫວ່າງສອງປະເທດໄດ້ເພີ່ມທະວີການພົວພັນມິດຕະພາບຢ່າງເລິກເຊິ່ງໃນລະດັບຕ່າງໆທັງລັດຖະບານ ແລະ ປະຊາຊົນຕໍ່ປະຊາຊົນ. ການແລກປ່ຽນການຢ້ຽມຢາມທາງລັດຖະກິດລະດັບສູງຂອງບັນດາການນຳ ຊຶ່ງໄດ້ສ້າງເງື່ອນໄຂສະດວກໃຫ້ແກ່ຄວາມເຂົ້າໃຈ, ຄວາມໄວ້ເນື້ອເຊື່ອໃຈ ແລະ ເພີ່ມທະວີການຮ່ວມມືລະຫວ່າງສອງປະເທດ.

ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ອວຍພອນໃຫ້ ຕີມໍ-ເລສ໌ເຕ ປະສົບຜົນສຳເລັດໃນພາລະກິດກະກຽມຂໍ້ມູນເຂົ້າເປັນສະມາຊິກ ASCC ແລະ AEC ທີ່ນຳໄປສູ່ການຮັບຮອງເອົາຖະແຫຼງການຂອງບັນດາຜູ້ນຳອາຊຽນ ທີ່ກອງປະຊຸມສຸດຍອດຄັ້ງທີ 40 ແລະ 41 ທີ່ ກຳປູເຈຍ ກ່ຽວກັບການຮັບຮອງເອົາ ຕີມໍ-ເລສ໌ເຕ ເຂົ້າເປັນສະມາຊິກອາຊຽນ ທີ່ໄດ້ເຫັນດີເປັນເອກະສັນກັນໃນຫຼັກການອະນຸມັດການສະໝັກເຂົ້າເປັນສະມາຊິກອາຊຽນຂອງ ຕີມໍ-ເລສ໌ເຕ ເເລະ ສປປ ລາວ ພ້ອມແລ້ວທີ່ຈະສະໜັບສະໜຸນ ຕີມໍ-ເລັສ໌ເຕ ເພື່ອບັນລຸການເຂົ້າເປັນສະມາຊິກອາຊຽນຢ່າງເຕັມສ່ວນໃນອະນາຄົດອັນໃກ້ນີ້.