ທີມຊາດອອສເຕເລຍ ສະແດງຈຸດຢືນ ຕໍ່ຕ້ານການລະເມີດສິດທິມະນຸດໃນກາຕ້າ ຢ່າງເປັນທາງການ
ທີມຊາດອອສເຕເລຍ ກາຍເປັນທີມທຳອິດໃນຈຳນວນ 32 ທີມທີ່ໄດ້ເຂົ້າໄປຫລິ້ນໃນບານໂລກ 2022 ຮອບສຸດທ້າຍ ເຊິ່ງໄດ້ອອກມາສະແດງຈຸດຢືນຢ່າງຊັດເຈນ ໃນການຕໍ່ຕ້ານການລະເມີດສິດທິມະນຸດໃນກາຕ້າ.
ອີງຕາມການລາຍງານຂອງໜັງສືພິມ The Sydney Morning Herald, ໜັງສືພິມລາຍວັນຂອງອອສເຕເລຍ ວັນພະຫັດທີ່ຜ່ານມາ ບານເຕະທີມຊາດອອສເຕເລຍໄດ້ອອກຖະແຫລງການຮ່ວມປະນາມກາຕ້າ ກ່ຽວກັບການກົດຂີ່ແຮງງານອົບພະຍົບຂ້າມຊາດ ແລະການກີດກັ້ນຄວາມສຳພັນລະຫວ່າງເພດດຽວກັນ ໂດຍໄດ້ນໍານັກເຕະທີມຊາດອອສເຕເລຍ 16 ຄົນ ມາສື່ສານຜ່ານຂໍ້ຄວາມວິດີໂອ
ເບິ່ງຄລິບ: https://twitter.com/thepfa/status/1585360307102552064
ນັກເຕະໄດ້ກ່າວໃນຄລິບວີດີໂອວ່າ “ການຕັດສິນໃຈເປັນເຈົ້າພາບບານໂລກຂອງກາຕ້າ ໄດ້ສົ່ງຜົນໃຫ້ເກີດຄວາມທຸກທໍລະມານ ແລະ ອັນຕະລາຍຕໍ່ຜູ້ອອກແຮງງານອົບພະຍົບນັບບໍ່ຖ້ວນ ການຈັດການກັບບັນຫາເຫລົ່ານີ້ບໍ່ແມ່ນເລື່ອງງ່າຍ ແລະ ເຮົາຍັງບໍ່ສາມາດແກ້ໄຂໄດ້ທັງຫມົດ.”
“ເຮົາຢືນຢັດຮ່ວມກັບອົງການຕ່າງໆທີ່ກ່ຽວຂ້ອງ ເພື່ອຊອກຫາແນວທາງປະຕິຮູບ ແລະ ສ້າງການປ່ຽນແປງທີ່ດີໃນກາຕ້າ ລວມທັງການສ້າງຕັ້ງສູນອົບພະຍົບ ການແກ້ໄຂສໍາລັບຜູ້ທີ່ຖືກກີດກັນສິດທິຂອງເຂົາເຈົ້າ ແລະ ການຕັດສິນຫລຸດທອນການລະເມີດຄວາມສຳພັນຂອງເພດດຽວກັນທັງໝົດ.”
“ນີ້ແມ່ນສິດຂັ້ນພື້ນຖານທີ່ທຸກຄົນຄວນມີ ແລະ ຈະຮັບປະກັນຄວາມຈະເລີນກ້າວໜ້າຢ່າງຕໍ່ເນື່ອງໃຫ້ກັບກາຕ້າ ທີ່ຈະກ້າວໄປໄດ້ໄກກວ່າການເປັນເຈົ້າພາບບານໂລກ 2022.”
ຕໍ່ມາທີມບານເຕະທີມຊາດອອສເຕເລຍ ໄດ້ອອກຖະແຫລງການແຍກຕ່າງຫາກ ເຊິ່ງປະກາດວ່າ “ງານແຂ່ງຂັນກິລາທີ່ເກີດຈາກຄວາມທຸກທໍລະມານຂອງແຮງງານອົບພະຍົບ ແລະ ຄອບຄົວຂອງເຂົາເຈົ້າ. ພວກເຮົາບໍ່ສາມາດຍອມຮັບສິ່ງເຫລົ່ານັ້ນໄດ້.”
“ຍ້ອນວ່າກິລາບານເຕະແມ່ນກິລາທີ່ມີຄວາມຫລາກຫລາຍທາງດ້ານວັດທະນະທຳຫລາຍທີ່ສຸດໃນປະເທດພວກເຮົາ. ພວກເຮົາເຊື່ອວ່າທຸກຄົນຄວນມີຄວາມຮູ້ສຶກປອດໄພ ແລະ ມີອິດສະລະທີ່ຈະສະແດງໂຕຕົນທີ່ແທ້ຈິງຂອງເຂົາເຈົ້າອອກມາຜ່ານໂລກຂອງບານເຕະ.”
ໃນຂະນະທີ່ ອອສເຕເລຍ ກາຍເປັນປະເທດທຳອິດທີ່ອອກມາຕໍ່ຕ້ານການລະເມີດສິດທິມະນຸດໃນກາຕ້າຢ່າງເປັນທາງການ, ປະເທດອື່ນໆເອງກໍ່ໄດ້ສະແດງໃຫ້ເຫັນເຖິງລັກສະນະກ່ຽວກັບບັນຫາສິດທິມະນຸດທີ່ເກີດຂຶ້ນໃນກາຕ້າເຊັ່ນດຽວກັນ.
