ສະເຫລີມສະຫລອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ

ພີທີເປີດງານໃນວັນທີ 24 ຕຸລາ ທີ່ສະຖາບັນຄົ້ນຄວ້າກະສິກໍາ ແລະ ພັດທະນາຊົນນະບົດ (ວິທະຍາເຂດດົງໂດກ) ໂດຍມີ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາຊາ ຮາຢັດ ຜູ້ຕາງໜ້າອົງການອາຫານ ແລະ ການກະເສດ ປະຈໍາ ລາວ, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ເພັດ ພົມພິພັກ ກ່າວວ່າ: ການສະເຫລີມສະຫລອງ ວັນອາຫານໂລກ ລະນຶກວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກປີນີ້ ຈັດຂຶ້ນທ່າມກາງບັນດາສິ່ງທ້າທາຍຫລາຍຢ່າງໃນທົ່ວໂລກ ຊຶ່ງໄດ້ມີຜົນສໍາເລັດເບື້ອງຕົ້ນໃນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ຄຽງຄູ່ກັນນັ້ນຫລາຍປະເທດໄດ້ຮັບຜົນກະທົບຈາກໄພພິບັດທຳມະຊາດ, ການລະບາດຂອງພະຍາດໂຄວິດ-19, ສຳລັບປະເທດລາວກໍຕົກຢູ່ໃນສະພາບເງື່ອນໄຂດຽວກັນ ແຕ່ເຖິງຢ່າງໃດກໍ່ຕາມຂະແໜງກະສິກຳ ແລະ ປ່າໄມ້ ໂດຍຮ່ວມກັບບັນດາຂະແໜງການ, ທ້ອງຖິ່ນ, ຄູ່ຮ່ວມພັດທະນາ ແລະ ຜູ້ປະກອບການ ໄດ້ສຸມໃສ່ຈັດຕັ້ງປະຕິບັດວຽກງານຜະລິດສະບຽງອາຫານ ແລະ ພັດທະນາຊົນນະບົດ ຊຶ່ງສາມາດຍາດໄດ້ຜົນງານທີ່ພົ້ນເດັ່ນເປັນຕົ້ນ: ຂະແໜງກະສິກຳ ແລະ ປ່າໄມ້ ຂະຫຍາຍໂຕ 2,9% ລື່ນແຜນສະພາຮັບຮອງ 0.2% ໃນນັ້ນຜະລິດເຂົ້ານາແຊງ 438.000 ໂຕນ ລື່ນຄາດໝາຍ 2,9%, ເຂົ້ານາປີບັນລຸ 768.224 ເຮັກຕາ ລື່ນແຜນການ 1,7%, ຜະລິດສະບຽງອາຫານໄດ້ 2,03 ລ້ານໂຕນ, ຜະລິດຊິ້ນ, ໄຂ່, ປາ, ໄດ້ 392.016 ໂຕ, ການສົ່ງອອກສິນຄ້າບັນລຸໄດ້ 1,1 ຕື້ໂດລາສະຫະລັດ, ຄາດວ່າໝົດປີຈະໄດ້ຕາມແຜນການທີ່ວາງໄວ້ 1,2 ຕື້ໂດລາ, ອັນໄດ້ປະກອບສ່ວນສໍາຄັນເຂົ້າໃນການຄ້ຳປະກັນສະບຽງອາຫານ ແລະ ລຶບລ້າງຄວາມອຶດຫິວ.

ສຳລັບການພັດທະນາຊົນນະບົດ ອີງຕາມມາດຖານໃໝ່ຂອງດຳລັດ 348/ລບ ມີເມືອງພົ້ນທຸກ 53 ເມືອງ ເທົ່າກັບ 35,82% ບ້ານພົ້ນທຸກ 4.792 ບ້ານ ເທົ່າກັບ 56,87% ແລະ ຄອບຄົວພົ້ນທຸກ 964. 149 ຄອບຄົວ ເທົ່າກັບ 77,78%, ມີຄອບຄົວພັດທະນາ 736.996 ຄອບຄົວ ເທົ່າກັບ 59,44% ບ້ານພັດທະນາ 747 ບ້ານ ເທົ່າກັບ 8,86% ບ້ານໃຫຍ່ເປັນຕົວເມືອງນ້ອຍໃນຊົນນະບົດ 14 ບ້ານ ແລະ ເມືອງເຂັ້ມແຂງຮອບດ້ານ 5 ເມືອງ ຊຶ່ງທັງໝົດເຫຼົ່ານັ້ນໄດ້ເປັນພື້ນຖານອັນສຳຄັນໃນການນຳເອົາປະເທດຫຼຸດພົ້ນອອກຈາກສະຖານະພາບ ປະເທດດ້ອຍພັດທະນາ ແລະ ບັນລຸເປົ້າໝາຍການພັດທະນາແບບຍືນຍົງ (SIM).

ພາຍໃນງານມີຫລາຍກິດຈະກຳ ເປັນຕົ້ນ ການປາຖະກະຖາ ຄຳຂວັນຂອງວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ, ການຈັດສຳມະນາ ແລະ ງານວາງສະແດງ ແລະ ຈຳໜ່າຍສິນຄ້າກະສິກຳ ຈົນເຖິງວັນທີ 28 ຕຸລາ 2022.