ອົງການສຸພະນິມິດສາກົນ ປະຈຳລາວ ສະໜັບສະນູນ ໂຄງການເຊື່ອມສານດ້ານໂພຊະນາການຢູ່ 2 ເມືອງແຂວງຄຳມ່ວນ ມູນຄ່າ 983.209 ໂດລາ
October 19, 2022 - 10:00 AM
ວັນທີ 18 ຕຸລາ 2022 ນີ້ ທ່ານ ອາຊິດ ກູມາ (Ashit Kumar) ຮັກສາການແທນ ອໍານວຍການອົງການສຸພານິມິດສາກົນ ປະຈຳລາວ ລົງນາມສັນຍາຮ່ວມໃຫ້ການສະໜັບສະໜູນໂຄງການ ເຊື່ອມສານດ້ານໂພຊະນາການ ຢູ່ ເມືອງ ຍົມມະລາດ ແລະ ໄຊບົວທອງ ແຂວງຄຳມ່ວນ ໂດຍການເປັນປະທານຂອງ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ.
ໂດຍໄດ້ຮັບການສະໜັບສະໜູນຈາກອົງການສຸພະນິມິດສາກົນ ປະຈຳລາວ, ມີເປົ້າໝາຍ2 ເມືອງຄື: ເມືອງຍົມມະລາດ ແລະ ເມືອງໄຊບົວທອງ ລວມ 13 ບ້ານ ເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ ຄັ້ງທີ 9 (2021-2025).
ປະກອບມີ 4 ກິດຈະກຳຫລັກຄື: ປັບປຸງ ແລະ ສົ່ງເສີມວຽກງານສຸຂະພາບແມ່, ເດັກ ແລະ ໂພຊະນາການ; ປັບປຸງ ແລະ ສົ່ງເສີມ ວຽກງານການຜະລິດກະສິກຳ ເພື່ອປັບປຸງຊີວິດການເປັນຢູ່ຂອງປະຊາຊົນ; ປັບປຸງ ແລະ ສົ່ງເສີມວຽກງານນໍ້າສະອາດ ແລະ ສຸຂະອະນາໄມ; ສ້າງຄວາມເຂັ້ມແຂງໃນດ້ານການປະສານງານຂອງຫລາຍຂະແໜງການ ເພື່ອສະໜັບສະໜູນການເບິ່ງແຍງເດັກກ່ອນໄວຮຽນ ແລະ ການສ້າງສຳພັນສາມັກຄີໃນຄອບຄົວ ແລະ ຊຸມຊົນ.
ໂຄງການມີໄລຍະ 4 ປີ 2022-2025 ມີມູນຄ່າລວມທັງໝົດ 983.209 ໂດລາສະຫະລັດ, ໃນນີ້ ເມືອງໄຊບົວທອງ 533.008 ໂດລາສະຫະລັດ ແລະ ເມືອງຍົມມະລາດ 450.201 ໂດລາສະຫະລັດ.
