ສານມຽນມາຕັດສິນໃຫ້ນາງ ອອງຊານ ຊູຈີ ຕິດຄຸກເພີ່ມອີກ 3 ປີ ໃນຂໍ້ຫາສໍ້ໂກງການເລືອກຕັ້ງ
ວັນທີ 2 ກັນຍາ 2022, ສານມຽນມາພິພາກສາໃຫ້ນາງ ອອງຊານ ຊູຈີ ອະດີດຜູ້ນຳມຽນມາ ຕິດຄຸກເພີ່ມອີກ 3 ປີ ພ້ອມໃຫ້ຮັບໂທດໃຊ້ແຮງງານໜັກ ຈາກຂໍ້ຫາທຸຈະລິດການເລືອກຕັ້ງເມື່ອ 2 ປີກ່ອນ.
ສານມຽນມາຕັດສິນວ່າ: ນາງ ອອງຊານ ຊູຈີ ກະທຳຄວາມຜິດຂໍ້ຫາທຸຈະລິດການເລືອກຕັ້ງທົ່ວໄປໃນເດືອນພະຈິກ 2020 ເຊິ່ງເວລານັ້ນ ພັກສັນນິບາດແຫ່ງຊາດເພື່ອປະຊາທິປະໄຕ (NLD) ໄດ້ຮັບໄຊຊະນະຢ່າງຫລວງຫລາຍ. ສ່ວນແຫລ່ງຂ່າວທີ່ບໍ່ເຄີຍເປີດເຜີຍຊື່ໃຫ້ສຳພາດຕໍ່ສຳນັກຂ່າວ Reuters ວ່າ: ປັດຈຸບັນຍັງບໍ່ແນ່ນອນວ່າໂທດໃຊ້ແຮງງານໜັກທີ່ລວມຢູ່ນຳຈະອອກມາໃນຮູບແບບໃດ. ຂະນະທີ່ທ່ານ ອູ ວິນ ມິນ ອະດີດປະທານາທິບໍດີມຽນມາ ກໍໄດ້ຮັບໂທດດັ່ງກ່າວເຊັ່ນດຽວກັນ.
ສ່ວນພັກ NLD ໄດ້ອອກມາປະຕິເສດຄຳຕັດສິນຂອງສານ ໂດຍຢືນຢັນວ່າທາງພັກຊະນະການເລືອກຕັ້ງດ້ວຍຄວາມໂປ່ງໃສ ແລະ ຍຸຕິທຳ.
ກ່ອນໜ້ານີ້, ນາງ ອອງຊານ ຊູຈີ ເຄີຍໄດ້ຮັບການຕັດສິນໂທດຕິດຄຸກ 17 ປີຈາກຂໍ້ຫາຕ່າງໆ ບໍ່ວ່າຈະເປັນການປຸກປັ່ນປະຊາຊົນໃຫ້ຕໍ່ຕ້ານກອງທັບມຽນມາ, ລະເມີດມາດຕະການໄລຍະຮັບມືສະຖານະການໂຄວິດ, ເຮັດຜິດກົດໝາຍດ້ານການສື່ສານຂອງມຽນມາ ລວມທັງຂໍ້ຫາທີ່ກ່ຽວຂ້ອງກັບການທຸຈະລິດສໍ້ລາດບັງຫລວງ ໂດຍນາງຖືກຄວບຄຸມຕົວຢູ່ພາຍໃນເຮືອນພັກນັບແຕ່ກອງທັບມຽນມາຕັດສິນໃຈກໍ່ລັດຖະປະຫານ ກ່ອນຈະຖືກຍ້າຍໄປຄວບຄຸມຕົວຢູ່ຄຸກໃນນະຄອນຫລວງເນປີດໍ ໃນເດືອນມິຖຸນາຜ່ານມາ.
ອ້າງອີງ:
- https://www.bbc.com/news/world-62763419
- https://m.dw.com/en/myanmar-jails-aung-san-suu-kyi-for-3-years-over-election-fraud/a-62999553
- https://www.reuters.com/world/asia-pacific/myanmars-suu-kyi-found-guilty-electoral-fraud-jailed-3-years-source-2022-09-02/
