ວາງສີລາລຶກໂຄງການກໍ່ສ້າງສູນກວດກາພະຍາດ ແຂວງເຊກອງ ມູນຄ່າ 20 ຕື້ດົງ ກຳນົດເວລາການກໍ່ສ້າງ 2 ປີໃຫ້ສໍາເລັດ
August 30, 2022 - 5:29 PM
ແຫລ່ງຂ່າວແຂວງເຊກອງ ໃຫ້ຮູ້ວ່າ: ອົງການປົກຄອງແຂວງເຊກອງ ສປປ ລາວ ແລະ ອົງການປົກຄອງແຂວງກວາງນາມ ສສ ຫວຽດນາມ ຈັດພິທີວາງສີລາ ລຶກໂຄງການກໍ່ສ້າງສູນກວດກາພະຍາດແຂວງເຊກອງ ໃນວັນທີ 30 ສິງຫາ 2022 ໂດຍມີ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ, ທ່ານ ເລ ຈິ ແທັງ ປະທານຄະນະກຳມະການປະຊາຊົນແຂວງກວາງນາມ ສສ ຫວຽດນາມ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ເລ ຈິ໋ ແທັງ ໄດ້ກ່າວວ່າ: ການວາງສີລາລຶກ ໂຄງການກໍ່ສ້າງສູນກວດກາພະຍາດຢູ່ແຂວງເຊກອງ ໃນຄັ້ງນີ້ ເປັນການສະແດງເຖິງນໍ້າໃຈຂອງຄະນະພັກ, ອຳນາດການປົກຄອງຂອງແຂວງກວາງນາມ ທີ່ມີຕໍ່ຄະນະພັກ ແລະ ປະຊາຊົນແຂວງເຊກອງ ເຊິ່ງເຫັນວ່າພາຍຫລັງທີ່ມີການລະບາດຂອງພະຍາດໂຄວິດ-19 ສູນກວດພະຍາດແມ່ນມີຄວາມສຳຄັນຫລາຍຕໍ່ກັບການກວດກາ ແລະ ສະກັດກັ້ນພະຍາດດັ່ງກ່າວ ກໍຄື ພະຍາດອື່ນໆ ເຊິ່ງຈະຊ່ວຍປະກອບສ່ວນຮັກສາສຸຂະພາບຂອງ ປະຊາຊົນແຂວງເຊກອງ, ໂຄງການນີ້ມີມູນຄ່າການກໍ່ສ້າງທັງໝົດ 20 ຕື້ດົງ ເຊິ່ງແມ່ນການຊ່ວຍລ້າຈາກຄະນະພັກ-ອົງການປົກຄອງແຂວງ ແລະ ປະຊາຊົນບັນດາເຜົ່າແຂວງກວາງນາມ, ມີເນື້ອທີ່ການກໍ່ສ້າງທັງໝົດ 1.200 ຕາແມັດ, ເປັນອາຄານເບຕົງ 2 ຊັ້ນ, ມີຂະໜາດ 42×21 ແມັດ, ມີ 15 ຫ້ອງ, ກຳນົດເວລາການກໍ່ສ້າງ 2 ປີໃຫ້ສໍາເລັດ ແລະ ພາຍຫລັງທີ່ມີການກໍ່ສ້າງສຳເລັດແລ້ວ ອຳ ນາດການປົກຄອງແຂວງກວາງນາມ ພ້ອມທີ່ຈະສືບຕໍ່ອຳນວຍຄວາມສະດວກດ້ານອຸປະ ກອນ ແລະ ບຸກຄະລາກອນການແພດ ເພື່ອໃຫ້ແທດເໝາະກັບສະພາບຄວາມເປັນຈິງ.
ທ່ານ ເຫລັກໄຫລ ສີວິໄລ ຕາງໜ້າໃຫ້ອຳນາດການປົກຄອງແຂວງ ກໍຄື ປະຊາຊົນແຂວງເຊກອງ ສະແດງຄວາມຮູ້ບຸນຄຸນຢ່າງຈິງໃຈ ຕໍ່ຄະນະພັກ-ອຳນາດການປົກຄອງແຂວງກວາງນາມ ທີ່ໄດ້ໃຫ້ການຊ່ວຍເຫລືອອັນລໍ້າຄ່າໃນຄັ້ງນີ້, ຖ້າໂຄງການດັ່ງກ່າວສໍາເລັດ ຈະເຮັດໃຫ້ວຽກງານການຄວບຄຸມ, ກວດພະຍາດຂອງແຂວງເຊກອງ ເພີ່ມຄວາມອາດສາມາດໃນການບໍລິການສັງຄົມ ໃຫ້ດີຂຶ້ນຕື່ມອີກບາດກ້າວໜຶ່ງ, ທັງເປັນການປະກອບ ສ່ວນສໍາຄັນໃຫ້ແກ່ວຽກງານສາທາລະນະສຸກແຂວງເຊກອງ ເຮັດສໍາເລັດໜ້າທີ່ຫລາຍຂຶ້ນກວ່າເກົ່າ, ພ້ອມນີ້ຍັງສະແດງເຖິງການພົວພັນຮ່ວມມືອັນແໜ້ນແຟ້ນ ລະຫວ່າງແຂວງເຊກອງ ແລະ ແຂວງກວາງນາມ ເຊິ່ງເປັນແຂວງແຮກສ່ຽວ ທີ່ມີຄວາມຮັກແພງເລິກເຊິ່ງ ແລະ ຈິງໃຈ.
